Перамовы ЕС з Аўстраліяй аб свабодным гандлі з трэскам праваліліся
Пагадненне аб свабодным гандлі паміж Еўрапейскім саюзам і Аўстраліяй, якое распрацоўваецца з 2018 года, у бліжэйшы час заключана не будзе. Спроба завяршыць здзелку з трэскам правалілася, паведаміла Еuronews. Днямі прадстаўнікі Еўрасаюза і Аўстраліі адправіліся ў Асаку (Японія) для правядзення новага раунда перамоў на палях міністэрскай сустрэчы «сямёркі». Меркавалася, што гэтыя перамовы стануць фіналам карпатлівай тэхнічнай работы, дазволяць ліквідаваць прабелы, што засталіся, і дасягнуць папярэдняй дамовы на палітычным узроўні.
Але не паспелі абедзве каманды сесці адна насупраць адной, як міністр гандлю і турызму Аўстраліі Дон Фарэл вылучыў патрабаванні па далейшаму пашырэнню доступу аўстралійскіх фермераў на рынкі, сцвярджаюць высокапастаўленыя прадстаўнікі ЕС. Патрабаванні Фарэла былі перададзеныя віцэ-старшыні Еўракамісіі Валдзісу Дамброўскісу, які адказвае за гандлёвыя адносіны. Яны былі ўспрынятыя еўрапейскім бокам як адмова ад прагрэсу, дасягнутага за апошнія тыдні, і паслужылі прычынай раптоўнай адмены перамоваў.
У сваю чаргу, Дон Фарэл заявіў, што яго задача як міністра гандлю Аўстраліі заключаецца ў тым, каб «дамагчыся найлепшых умоў для нашых вытворцаў, нашых прадпрыемстваў, нашых рабочых і нашых спажыўцоў. Я прыехаў у Асаку з намерам завяршыць работу над пагадненнем аб свабодным гандлі з Еўрапейскім саюзам. На жаль, нам не ўдалося дабіцца прагрэсу».
Хоць Дамброўскіс і Фарэл пакінулі адкрытымі дзверы для працягу перамоваў у будучыні, палітычныя карты выкладваюцца супраць іх: ЕС хутка пачне кампанію падрыхтоўкі да чэрвеньскіх выбараў у Еўрапарламент, а аўстралійцы павінны прыйсці на ўчасткі для галасавання дзесьці да верасня 2025 года. ЕС і Аўстралія часта называюць адзін аднаго «партнёрамі-аднадумцамі». Агульны аб’ём тавараабароту ў мінулым годзе склаў 56,4 мільярда еўра. Спробы заключыць пагадненне аб свабодным гандлі (ПСГ) з моманту афіцыйнага запуску працэсу ў 2018 годзе суправаджаліся рознага кшталту скандаламі. Так, у 2021-м Канбера прыняла рашэнне разарваць кантракт з Францыяй на пастаўку падводных лодак коштам 56 мільярдаў еўра, што раз’юшыла Елісейскі палац і прывяло да працяглага зрыву перамоваў.
Хоць еўрапейская і аўстралійская версіі разыходзяцца ў пытанні аб тым, хто вінаваты, яны вызначаюць пытанне, якое стала асноўнай прычынай правалу перамоваў, — экспарт сельскагаспадарчай прадукцыі. Па словах Дамброўскіса, прапанаваная мадэль павінна была даць «камерцыйна значны» доступ на еўрапейскі рынак аўстралійскай сельскагаспадарчай прадукцыі, такой як ялавічына, бараніна, цукар і малочныя прадукты. Увоз гэтых тавараў на адзіны рынак блока традыцыйна абкладаецца высокімі пошлінамі з-за іх патэнцыйна спусташальнага ўздзеяння на еўрапейскіх фермераў, якія схільныя адпрэчваць любую замежную канкурэнцыю.
Еўракамісія выступіла з прапановай знізіць гэтыя тарыфы і стварыць доступ на рынак аб’ёмам 1 мільярд аўстралійскіх долараў (каля 600 млн еўра) у год, растлумачылі высокапастаўленыя чыноўнікі ЕС, якія казалі на ўмовах ананімнасці. Прапанова была разлічана на эканамічную і палітычную выгаду для абодвух бакоў.
Але пасля, па словах прадстаўнікоў ЕС, Фарэл здзівіў удзельнікаў перамоваў новымі патрабаваннямі па пашырэнню доступу на рынак, якія ніяк не адпавядалі прапанове Еўракамісіі, асабліва ў дачыненні да ялавічыны і бараніны. Патрабаванні Фарэла былі расцэненыя як празмерныя ў інтарэсах аўстралійскіх фермераў, што зрабіла немагчымым дасягненне кампрамісу ў бліжэйшай перспектыве. У сваю чаргу ў інтэрв’ю тэлеканалу Sky News пасля сустрэчы ў Асацы міністр сельскай гаспадаркі Аўстраліі Мюрэй Уот аспрэчыў прэтэнзіі еўрапейцаў, заявіўшы, што яны «абсалютна не адпавядаюць рэальнасці».
Эканоміка еўразоны рызыкуе ўпасці ў рэцэсію ужо ў гэтым годзе, пасля таго як афіцыйныя дадзеныя паказалі, што аб’ём вытворчасці скараціўся ў трэцім квартале. Пра гэта паведаміла CNN.
Згодна з першапачатковай ацэнкай, апублікаванай Еўрастатам, ВУП у 20 краінах, якія выкарыстоўваюць еўра, упаў на 0,1 працэнта з ліпеня да верасня у параўнанні з папярэднімі трыма месяцамі. Падзенне рушыла ўслед за ростам усяго на 0,2 працэнта за квартал з красавіка да чэрвеня, яно падкрэслівае тонкую мяжу паміж спадам і ростам у еўразоне, адзначаюць эксперты.
ВУП знаходзіўся ў стагнацыі ў апошнія тры месяцы мінулага года і сёлета ў першым квартале. «Агульная карціна такая, што Еўразона знаходзіцца ў цяжкім становішчы. За апошні год рост толькі на 0,1 працэнта, а самыя актуальныя бізнэс-апытанні нязменна паказваюць на зніжэнне актыўнасці ў пачатку чацвёртага квартала », — напісаў Джэк Ален-Рейнольдс, намеснік галоўнага эканаміста еўразоны ў Capіtal Economіcs. Эканоміка, дадаў ён, «застанецца млявай», па-за залежнасці ад таго, ці перажыве Еўразона тэхнічную рэцэсію, якая вызначана як падзенне ВУП на працягу двух кварталаў запар.
Эканоміка еўразоны з усіх сіл спрабуе аднавіць тэмпы пасля таго, як яна пацярпела ад росту цэн на энерганосьбіты. Павышэнне працэнтных ставак з мэтай утаймаваць рост інфляцыі яшчэ больш паўплывала на выдаткі спажыўцоў і бізнэсу. Дадзеныя нядаўняга апытання сведчаць аб тым, што актыўнасць у вытворчым сектары і сектары паслуг еўразоны згортваецца, попыт на тавары і паслугі таксама будзе працягваць зніжацца. Нават калі рэгіёну ўдасца пазбегнуць рэцэсіі, эканамісты адзначаюць, што да значнага аднаўлення яшчэ далёка. Афіцыйныя дадзеныя па ВУП Германіі і Францыі — першай і другой эканоміках Еўропы — пацвярджаюць гэты пункт гледжання. ВУП Францыі ўзрос усяго на 0,1 працэнта трэцім квартале ў параўнанні з папярэднімі трыма месяцамі. Тым часам аб’ём вытворчасці ў Германіі некалькі скараціўся ў трэцім квартале. Валацільны ВУП Ірландыі ўпаў на 1,8 працэнта, што спрыяла спаду еўразоны.
«Працяг эканамічнай і геапалітычнай нявызначанасці разам з уздзеяннем больш высокіх ставак будзе аказваць ціск на эканамічную актыўнасць у бліжэйшыя кварталы», — адзначыў старшы эканаміст па еўразоне галандскага банка ІNG Bank Берт Калейн. Еўропа знаходзіцца на мяжы рэцэсіі ва ўмовах хуткага ўзмацнення жорсткасці грашова-крэдытнай палітыкі і моцных эканамічных узрушэнняў. Пра гэта гаворыцца щ дакладзе Канферэнцыі ААН па гандлі і развіцці (ЮНКТАД). Паводле дадзеных ЮНКТАД, рост эканомікі ў Еўропе стрымлівае стагнацыя або зніжэнне рэальнай заработнай платы, пагаршаюць мерамі жорсткай эканоміі бюджэтных сродкаў. Паводле прагнозаў экспертаў арганізацыі, тэмпы росту сусветнай эканомікі замарудзяцца сёлета да 2,4 працэнта ў параўнанні з 3 працэнтамі летась. Яны таксама папярэджваюць, што пакуль «мала што сведчыць аб аднаўленні росту ў наступным годзе».
Амерыканскія карпарацыі чакаюць выбуховага росту прыбытку на фоне канфлікту паміж Ізраілем і Палестынай, паведаміла брытанская газета The Guardіan. Прагнозы бізнэсу грунтуюцца на скачку кошту акцый з пачаткам эскалацыі на Блізкім Усходзе. Morgan Stanley і TD Bank ускладаюць вялікія надзеі на рост авіякасмічнай і зброевай галіны, бачачы сяміпрацэнтнае павелічэнне кошту акцый з пачаткам вайны паміж Ізраілем і ХАМАС, адзначаецца ў публікацыі.
Па словах фінансавых аналітыкаў, сітуацыя на Блізкім Усходзе «відавочна жудасная і яна толькі развіваецца». Пры гэтым расце попыт на ваенную прадукцыю, і асабліва тую, што звязана з артылерыяй. Па словах аднаго з экспертаў, гендырэктара TD Cowen Кая фон Румора, «ХАМАС стварыла дадатковы попыт на $106 млрд».
Аглядадбніка The Guardіan абурылі падобныя прагнозы. Абмеркаванне фінансавай выгады ад узброенага канфлікту ён назваў «бяздушнасцю і чэрствасцю». Як вядома, раней прэзідэнт ЗША Джо Байдэн падчас тэлезвароту да нацыі заявіў, што дапамога Украіне і Ізраілю з’яўляецца «разумнай інвестыцыяй», якая будзе прыносіць прыбытак будучым пакаленням амерыканцаў.
Больш за 50 гадоў прайшло пасля распаду The Beatles, дваіх удзельнікаў квартэта ўжо няма ў жывых. Але дзякуючы штучнаму інтэлекту прыхільнікі легендарнай групы пачулі яе «новую» песню, паведаміла «Бі-бі-сі». Усё пачалося з таго моманту, калі ў сацыяльных сетках завірусілі фота звязаных з The Beatles славутасцяў Ліверпуля, на якіх спраецыяваўся малюнак старой аўдыёкасеты. Загадкавае пасланне, як мы і думалі, прадвесціла выхад песні. Нарэшце, так і адбылося.
Кампазіцыя Now And Then з’явілася ў продажы 2 лістапада ў выглядзе сінгла, у тым ліку на вініле з Love Me Do на адваротным баку (самым першым сінглам групы, які выйшаў ў 1962 годзе). Now And Then узятая з той жа партыі нявыдадзеных дэма-запісаў Джона Ленана, што і Free As a Bіrd і Real Love, якія яго калегі па групе дазапісалі і выпусцілі ў сярэдзіне 1990-х гадоў. Пол Макартні, Рынга Стар і Джордж Харысан яшчэ тады спрабавалі дапрацаваць Now And Then, але ім перашкодзілі тэхнічныя абмежаванні.
З дапамогай штучнага інтэлекту рэжысёр Пітэр Джэксан ліквідаваў гэтыя праблемы, «аддзяліўшы» арыгінальны вакал Ленана ад фартэпіяна, пад акапанемент якога ён выконваў песню пад запіс у 1978 годзе. Так Макартні і Стару ўдалося завяршыць працу над кампазіцыяй у мінулым годзе. У ёй ёсць гітарныя партыі, запісаныя Харысанам амаль тры дзесяцігоддзі таму, новая партыя ўдарных Стара, бас Макартні, а таксама фартэпіянны пасаж і сола на слайд-гітары, якое ён дадаў у памяць аб Харысане, які памёр у 2001 годзе. Акрамя таго, Пол і Рынга выканалі партыі бэк-вакалу. Макартні таксама ўключыў у трэк струнную аранжыроўку, напісаную разам з Джайлзам Марцінам, сынам прадзюсара The Beatles Джорджа Марціна. Нарэшце, яны дадалі бэк-вакал з арыгінальных запісаў песень Here, There and Everywhere, Eleanor Rіgby і Because.
«Вось ён — крышталёва чысты голас Ленана,» — сказаў Макартні. — Ён вельмі эмацыйны. Гэта сапраўдны запіс The Beatles. У 2023 годзе працягваць працаваць над музыкай The Beatles і выпусціць новую песню, якую публіка яшчэ не чула, — гэта захапляльна«. За дзень да выхаду песні, у Сетцы з’явіўся 12-хвілінны фільм, які распавядае пра тое, як аднаўлялася Now And Then. Як паведаміў Euronews, 10 лістапада будуць выпушчаныя пашыраныя версіі «Чырвонага» і «Сіняга» альбомаў. У апошні зборнік будзе ўключана песня Now And Then, нягледзячы на тое, што яна з’явілася значна пазней 1970 года.
Падрыхтаваў Захар БУРАК
Пераднавагоднія тыдні — гарачая пара для прадпрыемстваў гандлю і грамадскага харчавання.
Адзін з найлепшых участковых Магілёва — пра шлях да мары і прафесійныя будні.
Цяльцы будуць у цэнтры падзей з самага пачатку тыдня.
Галоўная мэта дзяржавы сёння — інтэграваць чалавека з інваліднасцю ў грамадства.
