Урачыстая цырымонія старту 13 сезона рэспубліканскага маладзёжнага праекта «100 ідэй для Беларусі» прайшла ў Мінску на базе навучальнага цэнтра холдынгу «Гарызонт».
Конкурс за 12 гадоў ужо стаў не толькі брэндам БРСМ, але і цудоўнай стартавай пляцоўкай для беларускіх вучоных.
— Для нас гэта новая прыступка ў развіцці не толькі праекта «100 ідэй для Беларусі», але і важная прыступка на шляху фарміравання канкурэнтаздольнасці нашай краіны як на ўнутраным, так і на міжнародным інтэлектуальным рынку, — заявіў першы сакратар Цэнтральнага камітэта грамадскага аб’яднання «Беларускі рэспубліканскі саюз моладзі» Аляксандр Лук’янаў.
Таксама значнасць конкурсу падчас цырымоніі старту новага сезона падкрэсліў і галоўны вучоны сакратар Нацыянальнай акадэміі навук Беларусі Васіль Гурскі:
— Калі малады чалавек пачынае ўдзельнічаць у такога кшталту конкурсах, праектах, то найважнейшым вынікам з’яўляецца не толькі сама ідэя ці той невялікі макет, які вы маглі б прадэманстраваць тут. Самым галоўным вынікам з’яўляецеся вы самі, вашыя кампетэнцыі, здольнасці, вашыя таленты, якія несумненна развіваюцца падчас рэалізацыі такога кшталту праектаў.
Аднак нават невялікія макеты і ідэі ўдзельнікаў уражваюць. Так, перад мерапрыемствам усе прысутныя маглі азнаёміцца з навукова-тэхнічнымі распрацоўкамі ўдзельнікаў мінулых сезонаў. Тут вам і віртуальны навігатар па экамаршрутах Беларусі ад Святланы Далюк, і інавацыйныя матэрыялы для рамонту калдобін на дарожным пакрыцці ад Ягора Жукоўскага, і практычны, энергаэфектыўны камплект адзення з абуткам, які не патрабуе падзарадкі ад Уладзіслава Малаткова, і шмат іншых цікавых распрацовак.
Праект увесь час развіваецца і мадэрнізуецца. Якія ж асноўныя новаўвядзенні чакаюць удзельнікаў «100 ідэй для Беларусі» ў 13 сезоне? Па-першае, сёлета пераможцаў стане больш: не дваццаць, а трыццаць. Па-другое, конкурс будзе ажыццяўляцца ў трох узроставых групах, а не ў дзвюх, як гэта было раней. І, па-трэцяе, павялічацца крытэрыі ацэнкі праекту.
Пасля таго, як ганаровыя госці на чале з Аляксандрам Лук’янавым націснулі на кнопку, даўшы сімвалічны старт пачатку 13 сезона, на абноўленым сайце 100ideas.by адкрыўся прыём заявак. Іх можна падаць да 30-га лістапада.
Лізавета ГОЛАД
Фота аўтара
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.