Вы тут

Ці бяспечныя грыбочкі са слоіка?


Многія перакананыя, што натуральныя прадукты, у першую чаргу дары лесу, ідэальна падыходзяць для аздараўленчай дыеты, і з’ядаць іх можна ў неабмежаваных колькасцях, у тым ліку дзецям. Ці так гэта насамрэч, «Алесі» распавёў загадчык аддзялення гігіены харчавання Мінскага абласнога Цэнтра гігіены, эпідэміялогіі і грамадскага здароўя Юрый Гузік.


Фота: pixabay.com

З’ясі, малеча, ягадку…

— Ягады для дзіцяці ва ўзросце да года абавязкова трэба ператвараць у пюрэ, — адзначыў Юрый Гузік. — Самае цяжкае для засваення — абалонка і костачкі, не забудзьце іх выдаліць. Дробныя костачкі толькі нашкодзяць дзіцяці са слабым кішэчнікам. Менавіта з-за іх ягадны прыкорм для малых пачынаюць не раней, чым з паўгадовага ўзросту. Лепшыя плады для пачатку — чорная парэчка, чарніцы (калі дзіця не пакутуе на запоры) і маліна. Пачынаюць з кропелькі ягаднага пюрэ на кончыку чайнай лыжкі. Калі вы добра накармілі дзіця ягадамі, то садавіну і гародніну ў гэты дзень лепш не даваць. За два тыдні з пачатку прыкорму норма ягад даводзіцца да 30-40 г. Калі дзіцяці споўніўся год, норма — не больш за 80-100 г, а для трохгадовага — 150 г.

Змешваючы з кісламалочнымі прадуктамі свежыя ягады, дадавайце іх у тварог ці кефір адразу перад ужываннем, каб не загінулі кісламалочныя бактэрыі. Старайцеся не дадаваць у страву цукар, каб не правакаваць дадатковую нагрузку на арганізм. У ягадах і так ёсць глюкоза і фруктоза. 

А раптам алергія?

Пачаставаўшы дзіця ягадамі, сачыце за яго паводзінамі і тварам, асабліва за шчочкамі, папярэдзіў Юры Гузік. Не мяркуйце па сабе — будзьце асцярожныя з клубніцамі, вішняй і чарэшняй. За адзін прыём дзіця да двух гадоў не павінна з’ядаць больш за тры-пяць ягад. Ад чарэшні можа здарыцца ўздуцце жывата, а ў клубніцах шмат рэчыва, якое выклікае алергію. Дзіцяці-алергіку можна прапанаваць кампот або сок з ягад, разведзеныя вадой. Ягады лепш даваць без костак, пасля тэрмічнай апрацоўкі. Самыя гіпаалергенныя ягады — агрэст, чырвоная і белая парэчка.

Дзецям з алергіяй супрацьпаказаны любыя чырвоныя ягады, а тым, хто мае праблемы ў стрававальным тракце, — ягады наогул. У іх шмат кіслот і цукроў, яны выклікаюць браджэнне ў кішэчніку, таму пры пераяданні любых ягад можа праявіцца і сіндром атручвання.

— Калі дзіця бескантрольна зрывае ягадкі з куста, у рот трапляюць і няспелыя, — падкрэсліў Юрый Гузік. — Атручванне зялёнымі ягадамі бывае вельмі сур’ёзным. Ягады могуць стаць прычынай кішэчных інфекцый, калі не мыць іх перад ужываннем. Можна нават абліць іх кіпенем.

Бацькам важна памятаць: ягады — біялагічна актыўны прадукт. Яны не бяскрыўдныя, асабліва пры злоўжыванні. Напрыклад, парэчка змяшчае больш за 70 неабходных чалавеку біялагічна актыўных рэчываў, у брусніцах іх больш за 80. Закормліваць дзіця ягадамі ўсё роўна, што даросламу жменямі глытаць лекі.

Асцярожней з... грыбамі! 

Насуперак народнай мудрасці, якая абвяшчае, што беднага і грыб пракорміць, гэты прадукт усё ж застаецца пікантным прысмакам на закуску, не больш, лічыць Юрый Гузік.

— Грыбы часам завуць «раслінным мясам» з-за высокага ўтрымання бялку, але бялок у іх хаваецца за хітынам — рэчывам, з якога зроблены, напрыклад, панцыр ракаў і жукоў, — звяртае ўвагу спецыяліст. — У грыбоў, у адрозненне ад раслін, хітын замяняе цэлюлозу, з якой ён падобны па хімічных і фізічных уласцівасцях і па біялагічнай ролі.

Малыя пратэстуюць супраць неабдуманых эксперыментаў дарослых гучным плачам ад рэзяў у жываце. Да 12–14 гадоў дзіця не ў стане пераварыць грыбны хітын: стрававальны сок не можа яго расшчапіць. Таму для дзяцей грыбы варта наразаць як мага драбней, а то і ператвараць у парашок ці пасту. Лясныя грыбы трэба абавязкова вымочваць і варыць не менш за гадзіну, пасля закіпання пажадана замяніць ваду на свежую.

— Строга кажучы, грыбы — умоўна ядомы прадукт з-за таксінаў, якія ў іх утрымліваюцца, але разбураюцца пры варцы, — падкрэсліў Юрый Гузік. — Дзіцячы арганізм не можа справіцца з рэшткамі гэтых рэчываў, бо не мае дастатковай колькасці харчовых ферментаў, каб паўнавартасна перапрацаваць нават карысныя бялкі. Штогод летам і восенню ў дзіцячыя рэанімацыйныя аддзяленні таксікалогіі паступаюць дзеці з цяжкімі атручваннямі «бяспечнымі» ядомымі грыбамі, сабранымі і прыгатаванымі па ўсіх правілах. Прапаноўваючы дзіцяці грыбочкі са слоіка, задумайцеся пра статыстыку: са 100 дзяцей, якія атруціліся грыбамі, 5-6 гінуць, а 25-30 становяцца інвалідамі на ўсё жыццё. Ніколі не давайце дзіцяці кансерваваных хатнім спосабам грыбоў, нават калі сабралі іх самі і абсалютна ўпэўнены ў іх бяспечнасці!

Трохгадовым дзецям можна зрэдку даваць малую колькасць грыбоў, вырашчаных культываваным спосабам (вешанка, шампіньёны, кітайскія сушаныя грыбы), але выключна ў выглядзе пасты і ў спалучэнні з гароднінай, гэта аблегчыць іх засваенне. Малым, якія маюць нейкія праблемы са страўнікава-кішэчным трактам або схільнасць да алергій, грыбы наогул не ўводзяцца ў рацыён.

Выбар рэдакцыі

Тэатр

Барыс Цяцёркін: Я аднолькава ўлюбёны і ў тэатр, і ў кіно

Барыс Цяцёркін: Я аднолькава ўлюбёны і ў тэатр, і ў кіно

Артыст Купалаўскага тэатра —  пра дзяцінства, шлях да сцэны і вывучэнне беларускай мовы.

Грамадства

Праўда і міфы аб паўфабрыкатах

Праўда і міфы аб паўфабрыкатах

У Год якасці мы задалі навукоўцам нязручныя пытанні аб тым, што «ўнутры» магазіннай пельмешкі або катлеткі.

Калейдаскоп

Усходні гараскоп на наступны тыдзень

Усходні гараскоп на наступны тыдзень

Для Блізнятаў надыходзіць тыдзень сур’ёзных змен у асабістым жыцці.

Адукацыя

Беларуская мадэль дашкольнай адукацыі: якасць, даступнасць, адказнасць

Беларуская мадэль дашкольнай адукацыі: якасць, даступнасць, адказнасць

У нашай краіне амаль 90 працэнтаў дзяцей ад года да шасці атрымліваюць дашкольную адукацыю.