Біятлон у «Раўбічах» — гэта заўсёды прыгожа

У біятлонным доме зноў свята. У Рэспубліканскім цэнтры алімпійскай падрыхтоўкі па зімовых відах спорту «Раўбічы» ў гэтыя дні праходзіць трэці этап Кубка Садружнасці па біятлоне. За медалі спаборнічаюць каля 60 спартсменаў з Беларусі і Расіі, сярод іх — чэмпіёны і прызёры Алімпійскіх гульняў, чэмпіянатаў свету і Еўропы, а таксама біятланісты, якія толькі пачынаюць заваёўваць аўтарытэт. «Для нас вялікі гонар тут, на аб’екце сусветнага ўзроўню, прымаць трэці этап Кубка Садружнасці па біятлоне. Калі ў дачыненні да беларускіх і расійскіх спартсменаў былі прыменены санкцыі, якія абсалютна не адпавядаюць ніякім міжнародным правілам, нормам і стандартам, нашы спартыўныя сем’і стварылі ўмовы для трэніровак і спаборніцтваў. Традыцыйнае наша вялікае спаборніцтва — Кубак Садружнасці па біятлоне — ужо другі год знаходзіцца ў календары найважнейшых спартыўных мерапрыемстваў. У Беларусі, як і ў Расіі, любяць, шануюць і паважаюць біятлон», — адзанчыў намеснік прэм’ер-міністра Беларусі Ігар Петрышэнка падчас ўрачыстай цырымоніі адкрыцця спаборніцтваў. 

Віцэ-прэзідэнт саюза біятланістаў Расіі Павел Растоўцаў заўважыў, што «Раўбічы» шмат гадоў прымаюць спаборніцтвы рознага ўзроўню. «І сёння дзякуючы зладжанай рабоце сотняў людзей, якія рыхтавалі трасы і аб’ект у цэлым, у няпростае надвор’е створаны неабходныя ўмовы для правядзення спаборніцтваў на найвышэйшым узроўні», — адзначыў ён. 

На лыжных трасах знакамітага спартыўнага комплекса ў розныя часы выступалі ўсе зоркі сусветнага біятлона. У 1974-м годзе тут прайшоў чэмпіянат свету па біятлоне. Менавіта, да гэтага турніру і быў пабудаваны новы біятлонны стадыён. Раўбічы выдатна адпавядалі ўсім крытэрыям: мяккі зімовы клімат, перасечаная мясцовасць, блізка ад аэрапорта і вакзала. У 1974 годзе спартыўны комплекс быў ўрачыста адкрыты. Варта правесці няхітрыя матэматычныя разлікі, каб усвядоміць, што сёлета «Раўбічы» святкуюць сваё пяцідзесяцігоддзе. Юбілейны год пачынаецца выдатна! 

У сваёй гісторыі «Раўбічы» прымалі чэмпіянат свету яшчэ два разы: у 1982-м і 1990-м гадах. У 1998, 2004, 2019 і 2020 гадах спартыўны компплекс прымаў чэмпіянаты Еўропы па біятлоне, у 2020 тут таксама прайшоў этап Кубка IBU па біятлоне. І кожны раз спаборніцтвы праходзілі на высокім узроўні. Таму зусім недзіўна, што яшчэ да пачатку трэцяга этапа Кубка Садружнасці, турнір выклікаў станоўчыя водгукі.

«Біятлон у Раўбічах — гэта заўсёды прыгожа. Плюсы — ідальныя ўмовы для спартсменаў: цікавая траса, закрытае з усіх бакоў ад ветру стрэльбішча, спуск да рубяжа, каб была магчымасць максімальна аднавіць дыханне і, адпаведна, максімальна добра страляць. Цяпер гэта адназначна адзін з лепшых біятлонных комплексаў Еўропы. Калі не самы лепшы», — напісала ў сваім Telegram-канале расійская спартыўная журналістка Алена Вайцяхоўская. 

— Калі мы гаворым пра адхіленне расійскіх спартсменаў і бядуем, што наймацнейшыя нашы біятланісты не могуць выступаць на Кубках свету, то паверце, калі параўноўваць, атмасфера ў Раўбічах самая што ні на ёсць кубкавая. Гэта будуць дзіўныя старты і перапоўненыя трыбуны, — адзначаў «голас расійскага біятлону» Дзмітрый Губерніеў у эфіры «Матч ТБ».

Што да галоўнай часткі Кубка Садружнасці — спартыўнай, то яна ўжо ў першы дзень спаборніцтваў парадавала. Героем дня стаў лідар беларускай зборнай Антон Смольскі — ён стаў пераможцам у спрынтарскай гонцы. На дыстанцыю ён выйшаў адным з апошніх, але абодва агнявыя рубяжы Смольскі прайшоў без промахаў. На фінішы Антон на 24 секунды перасягнуў вынік Аляксандра Корнева, які стаў другім, трэцім аказаўся яшчэ адзін расіянін Аляксандр Логінаў. 

«Сёння я ставіў перад сабой толькі максімальную задачу — этап хатні, значыць, трэба было перамагаць. Да гэтага ў пачатку зімовага сезона былі няўдалыя старты, але гэта таксама досвед, я спрабую з любога выніку чэрпаць карысныя высновы. Да гэтага этапу я рыхтаваўся і маральна і фізічна, вельмі рады, што ўсё склалася. Стан дазваляў змагацца, траса добрая. Калі ішоў на фініш, трэнеры казалі, што супернікі крыху адыгрываюць, таму я ўключыўся і працаваў на максімум да самых апошніх метраў.Тэмпература сёння была вельмі камфортнай. Цела працавала так, як трэба, мышцы не былі скаваныя... У моцны мароз думаеш аб тым, як бы не змерзнуць, а сёння ўсе думкі былі толькі аб гонцы», — падзяліўся спартсмен сваімі ўражаннямі.

Сваёй перамогай ён парадаваў усіх аматараў, але больш за ўсіх, напэўна, радавалася жонка біятланіста, алімпійская чэмпіёнка Дзінара Алімбекава, якая ў пятніцу адзначыла дзень нараджэння. Дзінара таксама магла б парадаваць сваім выступленням, але зараз яна знаходзіцца ў дэкрэтным адпачынку, таму за спаборнцітвамі назірае з трыбун. 

Спорт — гэта калі перамогі і паражэнні ідуць побач. У жаночай паловы беларускай зборанай у пятніцу нічона не атрымалася. Дзяўчаты не ўвайшлі нават ў дзесятку лепшых па выніках спрынтарскай гонкі. Найлепшы вынік паказала Ганна Сола, якая размясцілася на 16-й пазіцыі, Адэліна Сабітава стала 17-й, Ірына Лешчанка — 20-я, Алена Кулак — 23-я, Дар’я Кудаева — 25-я, Наталля Карніцкая — 26-я.

Спаборніцтвы ў «Раўбічах» будуць праходзіць усе выхадныя. На суботу 6 студзеня запланаваныя гонкі пераследу, у 11.00 стартуюць мужчыны, у 14.00 — жанчыны. У нядзелю пройдуць мас-старты: 11.00 — мужчынскі, 14.00 — жаночы. Арганізатары паклапаціліся аб тых, хто хоча падтрымаць сваіх куміраў: для гледачоў арганізавана работа прыгараднага экспрэснага аўтобуснага маршруту нумар 949Э «Мінск — Раўбічы» ад прыпыначнага пункта «Станцыя метро «Барысаўскі тракт» (пасадка пасажыраў будзе ажыццяўляцца на баку Усходніх могілак) і ад прыпыначнага пункта «Раўбічы».

Валерыя СЦЯЦКО

Фота: Віктар ІВАНЧЫКАЎ