Медыкі б’юць трывогу з-за колькасці траўмаваных дзяцей пры катанні на цюбінгах

У мінулую нядзелю ў Лагойску школьнік атрымаў цяжкія траўмы галавы пры катанні на цюбінгу, паведамляе Следчы камітэт.

Па дадзеных следства, днём 14 студзеня 8-гадовы хлопчык разам з 11-гадовым стрыечным братам каталіся на цюбінгах з горкі. Пасля абеду, калі непаўналетнія вярталіся дадому, малодшы прапанаваў працягнуць забаву ў лесе. Пры спуску з небяспечнай гары цюбінг выскачыў з-пад дзіцяці, у выніку чаго хлопчык упаў на зямлю і пакаціўся ўніз. Ад удару ён страціў прытомнасць. Брыгада хуткай дапамогі, якая прыбыла, шпіталізавала дзіця з цяжкімі чэрапна-мазгавымі траўмамі.

Спецыялісты Міністэрства аховы здароўя б’юць трывогу з-за колькасці атрыманых траўм пры катанні на цюбінгу.

Як паведамілі ў Міністэрстве аховы здароўя, з пачатку зімы ўжо звыш 200 дзяцей звярнуліся ва ўстановы аховы здароўя з-за траўм, атрыманых у выніку катання з горак на цюбінгах, лядзянках, санках. Так, у РНПЦ неўралогіі і нейрахірургіі з пачатку зімы звярнуліся 48 дзяцей з траўмамі, а ў РНПЦ траўматалогіі і артапедыі 17 дзяцей — усе з цяжкімі траўмамі пасля, здавалася б, вясёлай зімовай забавы.

Высокая хуткасць і некіравальнасць цюбінга, немагчымасць своечасова затармазіць пры спуску ў большасці выпадкаў прыводзіць да сур’ёзных траўмаў, а часам і да гібелі людзей.

Медыкі просяць дарослых звярнуць увагу на наступныя акалічнасці.

• Неабходна навучыць дзяцей правілам паводзін, якія дазваляюць пазбегнуць небяспекі атрымання траўмаў.
• Пры куплі інвентара трэба абавязкова пацікавіцца ў прадаўцоў-кансультантаў аб правілах карыстання таго ці іншага сродку перамяшчэння, якія сродкі абароны рэгламентаваны пры іх выкарыстанні, высветліць іх якасць, падабраць прыдатны для дзіцяці памер прылады.
• Выйдзіце з дзецьмі на зімовую прагулку і вызначыце месца для катання.
• Катацца на цюбінгах можна на спецыяльна абсталяваных трасах, роўных, з выдзеленымі палосамі, з плоскім з’ездам, ухілам не больш за 20-30 градусаў, дзе ўсе катаюцца строга па чарзе.
• Месца для спуску на санках або цюбінгах абавязкова павінна быць удалечыні ад праезнай часткі дарог, дрэў, слупоў ці іншых перашкод, з ухілам не больш за 20 градусаў і дастатковым месцам для тармажэння.
• Перш чым пачаць спуск па непадрыхтаванай трасе агледзьце яе на прадмет наяўнасці ям і грудоў — гэтыя перашкоды могуць стаць своеасаблівым трамплінам.
• Азнаёмце дзіця з правіламі кіравання і бяспекі — нагадайце, што пры спуску ўсе прылады развіваюць вялікую хуткасць, пры гэтым у цюбінга адсутнічаюць тармазы і ім немагчыма кіраваць.
• Ватрушка павінна быць у меру напампаваная, у ёй можа сядзець толькі адзін чалавек, трымаючыся за ручкі.
• Пры катанні небяспечныя трампліны, счэпкі санак і ватрушак, прывязка да аўто, снегахода.
• Раскажыце, чым небяспечна сутыкненне з дрэвам, пры катанні спінай або стоячы на счэпленых цюбінгах або санках, пры спуску некалькіх чалавек у адным «бубліку».
• Калі горка выклікае ў вас асцярогі, спачатку пракаціцеся з яе без дзіцяці, выпрабуйце спуск.
• Нагадайце дзіцяці, што ў крытычнай сітуацыі лепш перавярнуцца ці заваліцца на бок, чым сутыкнуцца з дрэвам ці іншымі санкамі.

І самае асноўнае правіла: не пакідайце дзяцей адных, без нагляду!

Алена КРАВЕЦ