Сенатар Алег Дзячэнка расказаў асіповіцкім школьнікам пра экстрэмізм

У Магілёўскай вобласці працягваюцца сустрэчы навучэнскай моладзі са спікерамі з ліку парламентарыяў, грамадскіх дзеячаў, ветэранаў у фармаце ШАГ (школа актыўнага грамадзяніна). На гэты раз яна адбылася ў сценах асіповіцкай сярэдняй школы № 1. Яе ўдзельнікамі сталі вучні старшых класаў. Перад імі выступіў намеснік старшыні Пастаяннай камісіі Савета Рэспублікі Нацыянальнага сходу Рэспублікі Беларусь па адукацыі, навуцы, культуры і сацыяльным развіцці Алег Дзячэнка.

Напачатку размовы сенатар прапанаваў сваім слухачам самім сфармуляваць, што азначае слова экстрэмізм і якія яно выклікае асацыяцыі. Прагучалі меркаванні, што гэта небяспека, прыхільнасць да радыкалізму, крайніх метадаў дзеяння.

— А ў вашым жыцці прысутнічае экстрым? — пацікавіўся спікер. — Напрыклад, зняць для сацыяльных сетак які-небудзь здымак, каб займець як мага больш лайкаў?

Пытанне выклікала ў зале гоман. Які ж малады чалавек не жадае папулярнасці? Але ж хапае прыкладаў, калі спроба зрабіць экстрэмальнае фота заканчваецца трагічна.

— Балансіроўка на краі заўсёды вельмі небяспечная, — аргументаваў Алег Дзячэнка. — Экстрэмізм можа быць у розных сферах — рэлігійнай, палітычнай, сацыяльнай, этнічнай. І ў кожнага свае метады, свае інструменты дасягнення эпатажнасці. Сэнс у тым, што яны крайнія. Палітычны экстрэмізм, напрыклад, пераследуе мэты разгайдаць палітычны лад. І дзейнічаюць радыкалы шляхам парушэння заканадаўства.

Сенатар нагадаў, што Беларусь шматнацыянальная краіна. У ёй пражывае каля 130 народнасцяў і нацыянальнасцяў. І ўсе яны суіснуюць у міры і сяброўстве. Гэта наш нацыянальны брэнд.

— Сутыкаць паміж сабой народы, гэта і ёсць экстрэмізм, — падкрэсліў ён. — Нацыянальныя і рэлігійныя пачуцці самыя найглыбейшыя. Мэта рэлігійнага экстрэмізму парушыць міжканфесійны і грамадзянскі мір і згоду, падарваць дзяржаўную бяспеку і тым самым разбурыць нацыянальную згоду краіны.

Выступоўца падзяліўся сваімі разважаннямі наконт парламенцкіх выбараў у Сербіі, дзе ён прысутнічаў у якасці міжнароднага назіральніка.

— Я бачыў тыя сілы, якія разгойдвалі там абстаноўку, фінансавалі незадаволеных, падбухторвалі на радыкальныя дзеянні, — паведаміў ён.

Небяспека крыецца ў тым, што экстрэмісцкія ідэі распаўсюджваюцца ў тым ліку і праз сацыяльныя сеткі. Аднаму нешта спадабалася, ён лайкнуў, звярнуў увагу на пост сваіх сяброў. І гэтак далей па ланцужку. Потым высвятляецца, што інфармацыя была экстрэмісцкай і забароненай для распаўсюджвання.

— Ты ўжо і не памятаеш, што лайкнуў, а гэта было злачынства, — аргументаваў дакладчык. — Рэпост ужо расцэньваецца як распаўсюджванне. Справакаваць можа хто заўгодна, але заўсёды ў сеціве застаецца след. У мабільніку ўсё празрыста. І прыйдзецца адказваць перад законам.

Сенатар параіў слухачам быць больш разважлівымі і пільнымі.

— У кожнай масавай бязладзіцы ёсць рэжысёр і свае правілы гульні, — удакладніў ён. — Ёсць вонкавыя экстрэмісцкія пагрозы і ўнутраныя. Тыя ж тэрарыстычныя акты для падрыву абстаноўкі ўнутры. Распаўсюджванне экстрэмісцкіх ідэй ідзе праз «Тэлеграм», «Цік-ток», іншыя сацсеткі. Тыя, хто жадаюць разваліць краіну, актыўна дзейнічаюць у тым ліку і праз месенджары.

Спікер паведаміў таксама, якія ў краіне выпрацаваны меры супрацьдзеяння экстрэмізму, якая існуе адказнасць.

— Каб быць паспяховымі, трэба добра вучыцца і развівацца, — падкрэсліў ён. — І нельга дапускаць таго, каб быць уцягнутымі ў сумнеўныя гульні. Іншымі словамі, трэба навучыцца быць годнымі грамадзянамі нашай краіны, сапраўднымі патрыётамі.

— Каштоўнасць праекта «Школа актыўнага грамадзяніна», які існуе ў краіне ўжо не першы год, садзейнічаць палітычнай сацыялізацыі маладых грамадзян, — рэзюмаваў Алег Дзячэнка. — У рамках праекта арганізуюцца сустрэчы з вядомымі палітычнымі, грамадскімі дзеячамі, ветэранамі вайны і працы. Для моладзі вельмі важна падсілкоўвацца ідэямі, якія садзейнічаюць выхаванню патрыятызму, пачуцця высокай грамадзянскай адказнасці, знаёмству з палітычнымі і гістарычнымі традыцыямі беларускага народа. Тэма экстрэмізму была абрана невыпадкова. Апошнім часам узрастае яго праяўленне ў маладзёжным асяроддзі. Таму мэтазгодна як мага часцей праводзіць такія сустрэчы з навучэнцамі, каб дэталёва пазнаёміць са зместам законаў аб супрацьдзеянні экстрэмізму і аб недапушчэнні рэабілітацыі нацызму, якія былі прынятыя парламентам і ўступілі ў юрыдычную сілу ў 2021 годзе. Мы расказваем навучэнцам на канкрэтных прыкладах пра формы і метады дэструктыўнага ўздзеяння на іх свядомасць з боку інфармацыйных рэсурсаў, якія размешчаны ў глабальнай камп’ютарнай сетцы Інтэрнэт, паказваем, што сёння з’яўляецца ў адпаведнасці з дзеючым заканадаўствам экстрэмізмам, паказваем яго прыкметы і на канкрэтных прыкладах ілюструем, як гэта можа праявіцца ў іх жыцці.

Нэлі ЗІГУЛЯ

Фота аўтара

г. Асіповічы