Так, на заняткі гуртка па развіваючым чытанні ў бібліятэку прыходзіць самы сапраўдны сабака. Як высветлілася, чатырохногі сябар можа быць уважлівым і ўдзячным слухачом. А яшчэ ён любіць гуляць з малымі. Яны ж не хаваюць свайго захаплення. Малыя без апаскі падыходзяць, гладзяць, нават абдымаюць сабачку, а галоўнае, усе стараюцца добра чытаць.
Гэты незвычайны праект бібліятэка рэалізоўвае пяты год. Першы такі занятак адбыўся ў 2019 годзе. Каардынатарам праекта, можна сказаць, яго аўтарам з’яўляецца загадчыца аддзела аўтаматызацыі бібліятэчных працэсаў Брэсцкай цэнтральнай гарадской бібліятэкі імя А. С. Пушкіна Ірына Клімовіч. Праект для дзіцячай аўдыторыі зладзілі ў дзіцячай бібліятэцы, якая з’яўляецца філіялам гарадской.
Гурток называецца «СоЧитайка». На яго заняткі запісваюцца загадзя, апошняе асабліва важна для навічкоў, бо бацькі павінны даць пісьмовую згоду і пацвердзіць, што ў дзіцяці няма алергіі на сабак, што дзіця не баіцца сабак. Калі ўсё патрэбнае ёсць, можна прыходзіць на заняткі, якія праходзяць звычайна раз на месяц. Цяпер нават у Вайберы з'явілася група аматараў гуртка, таму яго расклад усе ведаюць загадзя. Гурток наведваюць хлопчыкі і дзяўчынкі з першага па пяты клас. Але гэта не строгія рамкі, за якія нельга выйсці. Напрыклад, сёння былі і шасцікласнік Коля, і дзве сястрычкі-двайняткі дашкольніцы.
Ірына Клімовіч расказала, што спачатку, чатыры гады таму, звярнуліся да дыпламаванага кінолага, і першымі ўдзельнікамі гуртка былі службовыя сабакі. За гэты час слухачамі юных чытальнікаў станавіліся і джэк-расел-тэр’ер Джэкі, і нямецкая аўчарка Бьёрн, і йорк Рыч, і бернскі зененхунд Берта. А вось цяпер апавяданні і казкі слухае зененхунд Фрося.
Загадчыца Гарадской дзіцячай бібліятэкі-філіяла №13 Святлана Івашкова, расказала, што ніводная сустрэча аматараў гуртка не бывае падобнай на папярэднюю. Кожны раз выкарыстоўваюцца новыя формы. На занятках бываюць віктарыны і конкурсы, мультфільмы па кнігах і літаратурныя гульні. Прапаноўваюцца практыкаваннні для паляпшэння тэхнікі чытання, якія распрацавалі самі бібліятэкары. І самае галоўнае, што дзеці з захапленнем удзельнічаюць у занятку, камунікуюць з чацвяраногім сябрам. У апошнім змагла ўпэўніцца аўтар гэтых радкоў, калі пабывала на занятках 11 лютага.
На гэты раз занятак быў прысвечаны творчасці Віталя Біянкі, 130-годдзе якога адзначаецца ў гэтым месяцы і менавіта ў гэты дзень.
Святлана Іванаўна, як кіраўнік гуртка, запрасіла малых у падарожжа па памяшканні бібліятэкі. Ішлі доўгімі, пакручастымі калідорамі, што прыдало загадкавасці. Зайшлі ў цёмнае памяшканне, расселіся на мяккім дыване і ўключылі праектар. На экране паявілася карцінка і некалькі радкоў з апавядання «Першае паляванне» Біянкі. Хуценька разабраліся па нумарах, хто за кім чытае, і пачалі. Коля, як самы старэйшы, чытаў першым, за ім самыя актыўныя і смелыя дзяўчынкі. Малыя Соня і Паліна, папярэдзілі, што не ўмеюць чытаць, за іх чытала Святлана Іванаўна. Але ў астанім — у конкурсах і гульнях — дзяўчыкі-двайняткі былі вельмі актыўныя.
Хутка прачыталі першае апавяданне, узяліся за гульні. Трэба было шукаць таблічкі з назвамі жывёл, з дапамогай інтэрактыўнай указкі хадзіць па лабірынтах разам з насельнікамі лесу. І самае большае захапленне выклікала, калі Фрося таксама пачала ўдзельнічаць у гульнях. Напрыклад, паказваюцца дзве карцінкі, на адной воўк, на другой кракадзіл, задаецца пытанне: «Пра якую з гэтых жывёл мог пісаць наш аўтар?» І што вы думаеце? Фрося выбірае карцінку з ваўком! Потым на адным з заданняў яна адгадала вавёрку, што стала яшчэ адной нагодай для агульнай радасці.
Шмат чаго было на гэтым гуртку. Адгадвалі насельнікаў лесу па гуках. І галоўнае, тут ніхто нікога не прымушае, не робіць заўваг па тэхніцы чытання. Скажам, Ліза, якая была першы раз, сказала, што чытаць не будзе, і ёй тут жа прапанавалі проста паслухаць. Затое у іншых конкурсах дзяўчынка ўдзельнічага актыўна.
Святлана Яроміч, мама 9-гадовай удзельніцы гуртка Марыны, сказала, што дачка любіць наведваць гурток, імкнецца загадзя падрыхтаваць урокі, каб вызваліць дзень для паходу ў бібліятэку. Святлана заўважыла, што Марына пачала лепш чытаць, з ахвотай бярэ кнігі ў бібліятэцы: «Ды і сама форма заняткаў вельмі пазнавальная, дзеці атрымліваюць шмат карыснай інфармацыі, а ў гульнявой форме яна засвойваецца. Думаю, агучу меркаванне ўсіх бацькоў, чые дзеці тут займаюцца, калі скажу, што мы вельмі ўдзячныя за гурток "СоЧитайка"», — падсумавала мама школьніцы.
Таксама ўдзячныя арганізатары і наведвальнікі Кацярыне Астапчык, гаспадыні Фросі, за тое, што выступае валанёрам добрай справы, і кожны месяц прыязджае з гадаванцам у бібліятэку.
Святлана ЯСКЕВІЧ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
