Больш за 80 % маладых спецыялістаў застаюцца на сваіх першых рабочых месцах

Сёлета 1 жніўня ў бальніцы і паліклінікі краіны на свае першыя рабочыя месцы выйшла больш за 9 тысяч медыкаў. З іх 5,5 тысячы — маладыя ўрачы-спецыялісты і ўрачы-інтэрны, і больш за 3,5 тысячы — спецыялісты з сярэдняй спецыяльнай адукацыяй.

Больш за 80 % маладых спецыялістаў, паводле інфармацыі ўпраўлення кадравай палітыкі, устаноў адукацыі Міністэрства аховы здароўя, застаюцца на сваіх першых рабочых месцах. Гэтага ўдалося дасягнуць у тым ліку і дзякуючы таму, што наймальнік прыязджае на размеркаванне, запрашае студэнтаў у сваю ўстанову, паказвае, дзе спецыяліст будзе жыць і працаваць і якая ў яго будзе зарплата.

Застацца ў рэгіёнах матывуе і жыллё. Наймальнікі нярэдка прапануюць арэндныя кватэру ці дом, а не пакой ці месца ў інтэрнаце. Да таго ж, у сельскай мясцовасці больш магчымасцяў кар'ернага росту, і адпаведна атрымання вышэйшай заработнай платы.

Міністэрства аховы здароўя пастаянна кантактуе з мясцовай выканаўчай уладай, абмяркоўваючы пытанні адаптацыі маладых спецыялістаў.