Мінфін: прымаць рашэнне аб павышэнні падаткаў у дадзены момант немэтазгодна

Прымаць рашэнне аб павышэнні падаткаў у дадзены момант немэтазгодна. Пра гэта ў эфіры тэлеканала «Беларусь 1» заявіў міністр фінансаў Юрый Селіверстаў, паведамляе БелТА.

«Прымаць рашэнне аб павышэнні падаткаў, лічу, у дадзены момант немэтазгодна. Таму што гэта пэўным чынам дзесьці супярэчыць тым падыходам па падтрымцы эканомікі, якія цяпер патрэбныя. У нас быў паказчык на пяцігодку 26% падатковая нагрузка, сёння яна 24%. У прынцыпе, тыя разлікі, з якіх мы зыходзілі, што нам трэба каля 26%, таму, калі будзем пачынаць новы бюджэтны цыкл, трэба глядзець. Можа быць, нейкія плацяжы трэба перафарматаваць, можа быць, і падняць. Некаторыя, упэўнены, у гэтых умовах, можа быць, трэба і паменшыць», — сказаў Юрый Селіверстаў.

Па словах міністра, падаходны падатак трэба пакінуць як ёсць. «Там ёсць іншыя рэчы, якія абцяжарваюць. Напрыклад, усе хочуць інвестыцыйныя вылікі па падатку на прыбытак. Купіў машыну і абсталяванне — 100% аднёс гэта на выдаткі. Напэўна, гэта лагічна. Але чымсьці гэта трэба кампенсаваць. Таму ў гэтых умовах трэба глядзець і ўсё ўзважваць», — канстатаваў ён.

Прэв’ю: pexels.com