Учора, сёння, заўтра

Дэпутаты Палаты прадстаўнікоў Нацыянальнага сходу ўпэўнены: краіна будзе і надалей паступальна развівацца.

19-12

Уладзімір ЧАРАВАЧ, намеснік старшыні Пастаяннай камісіі па заканадаўстве:

— Дзяржава развіваецца паступальна. Прывяду прыклад з маёй прафесійнай сферы. У пачатку 90-х гадоў у нас быў разгул злачыннасці, можна сказаць, жыццё вызначалі бандыцкія групіроўкі, іх дзеянні адрозніваліся асобай жорсткасцю. Успамінаю адзін жахлівы выпадак з маёй практыкі, калі даводзілася расследаваць справу па забойстве з расчляненнем трупа. Самае страшнае, што ў тыя гады такія здарэнні не былі адзінкавымі. Зараз, натуральна, такога няма, і паказчык злачыннасці кожны год зніжаецца, асабліва ў тым, што тычыцца цяжкіх і асабліва цяжкіх злачынстваў. Усё гэта вынік намаганняў улады.

Што да будучыні, то тэндэнцыя па зніжэнні ўзроўню злачыннасці будзе працягвацца. Тым больш што прычыны для здзяйснення цяжкіх і асабліва цяжкіх злачынстваў нівеліруюцца. Тады, у 90-я гады, эканоміка краіны была развалена, у магазінах былі пустыя прылаўкі — менавіта ў гэтых умовах выходзяць з ценю такія элементы і бяруць на сябе функцыі ўлады. Калі ж улада на месцы, калі яна абараняе інтарэсы людзей, то спрыяльнага клімату для фарміравання злачынных групіровак няма.

19-10

Алена ШАМАЛЬ, намеснік старшыні Пастаяннай камісіі па ахове здароўя, фізічнай культуры, сямейнай і маладзёжнай палітыцы:

— У пачатку 90-х я была зусім яшчэ юнай дзяўчынай, заканчвала школу. І тут разваліўся Саюз. На выпускны баль туфлі, сукенкі мы куплялі па талонах... Сёння ж кожная дзяўчына можа выбраць на свой густ усё, што жадае.

У тыя гады здавалася, што дзіцячыя садкі, школы, універсітэты проста разбураюцца. Ні на што не было грошай — ні на ацяпленне, ні на рамонт. Сёння ж усё прыведзена ў парадак. А якія спартыўныя залы ў сучасных школах — пра такія дваццаць гадоў таму ніхто нават і не марыў!

Сёння крызісная сітуацыя перажываецца складана, таму што мы многае можам сабе даволіць і ні ад чаго не хочацца адмаўляцца. Аднак важна вырашыць для сябе, што сапраўды важна, а з чым можна пачакаць. У любым выпадку крызіс рана ці позна скончыцца, і краіна будзе развівацца далей.

19-11

Вольга ПАЛІЦІКА, член Пастаяннай камісіі па прамысловасці, паліўна-энергетычным комплексе, транспарце і сувязі:

— Якую галіну ні вазьмі, у любой мы прайшлі за апошнія дзесяцігоддзі вялікі шлях. Напрыклад, Дзяржкаммаёмасць — цяпер не трэба чакаць месяцамі афармлення даведак, усё робіцца вельмі хутка. Тое ж можна сказаць і ўвогуле наконт якасці здзяйснення дзяржавай сваіх функцый — укараненне службы «адно акно» вартае многага.

Што да матэрыяльнага дабрабыту насельніцтва, то пра яго можна меркаваць па колькасці аўтамабіляў на вуліцах. На бытавым узроўні ў беларускіх сем'ях таксама ёсць шмат сучаснай тэхнікі, пра якую калісьці людзі нават і не чулі.

Інтэнсіўна развіваецца айчыннай харчовая прамысловасць — асобныя найменаванні нашай прадукцыі займаюць істотнае месца на сусветным рынку. Немалаважна і тое, што за гады свайго суверэнітэту наша краіна ўвайшла ў спіс касмічных дзяржаў. А з будаўніцтвам АЭС прамысловасць Беларусі выйдзе на новы ўзровень.

У той жа час трэба разумець, што свет мяняецца. Мы не можам спыніцца на дасягнутым, каб не страціць тое, што маем. У любым выпадку галоўнае для развіцця ў нас ёсць — гэта чалавечы патэнцыял.

Надзея ЮШКЕВІЧ

yushkevich@zviazda.by