Вы тут

Ёсць хлебны рэкорд!


У адкрытым акцыянерным таварыстве "Александрыйскае" Шклоўскага раёна ўшанавалі першых у Магілёўскай вобласці "5-тысячнікаў".

Сямейны экіпаж камбайна ў складзе Міхаіла і Сяргея Байдаковых намалаціў у сёлетняе жніво больш за 5 тысяч тон збожжа. Вадзіцель Дзяніс Латыпаў перавёз больш за 5 тысяч тон хлеба новага ўраджаю. Гэта на сёння лепшы вынік у рэгіёне і краіне.

У сераду 14 жніўня на полі "Александрыйскага" каля вёскі Калінаўка віншаваць лепшую "тройку" прыехалі кіраўнікі вобласці, раёна і гаспадаркі. Усе легкавыя аўтамабілі здаюцца малымі побач з магутнай сельскагаспадарчай тэхнікай. На камбайне і грузавым "МАЗе" — чырвоныя сцяжкі, бо тут працуюць перадавікі сёлетняга жніва ў рэгіёне.

1376583238972_15-37

— Хочам вам сказаць вялікі дзякуй, — звярнуўся да працаўнікоў старшыня Магілёўскага аблвыканкама Пётр Руднік.

— Хлеб ніколі лёгка не даваўся. Умовы надвор'я не спрыялі, але дзякуючы вашай зладжанай працы мы маем вынік.

Жніво ў Александрыі набліжаецца да фінішу, але кіраўніцтва Шклоўскага раёна вырашыла, што экіпаж Байдаковых можа дапамагчы на палях суседніх сельскіх гаспадарак. Таму сапраўды намалот у 6 тысяч тон можа быць цалкам рэальным.

Камбайнеры — сціплыя людзі, якія шмат не гавораць, мала ўсміхаюцца і ўвесь час нібыта азіраюцца на машыны, каб хутчэй вярнуцца да працы. Аднак экіпаж Байдаковых, які вырваўся наперад ва ўборачнай кампаніі, і Дзяніса Латыпава, вадзіцеля, які перавозіў збожжа, віншуюць з працоўнымі поспехамі не ўпершыню. Кветкі, падарункі, словы ўдзячнасці, фота на памяць, кароткія інтэрв'ю для прэсы.

Міхаілу Байдакову — 45 гадоў. Ён нарадзіўся на Шклоўшчыне, усё жыццё працуе ў сельскай гаспадарцы.

— Нам прыемныя ўвага і падарункі, і добрыя заробкі, — кажа селянін. — Галоўнае — хацець працаваць, і я жадаю ўсім працаўнікам жніва пазітыўнага настрою, добрага надвор'я і нармальных заробкаў.

Сыну Міхаіла і яго памочніку Сяргею толькі 19 гадоў. З бацькам на жніве ён працуе ўжо 8-ы(!) сезон. Ён цяпер вучыцца ў Буйніцкім прафесійным агралесатэхнічным каледжы і мяркуе з часам атрымаць вышэйшую адукацыю.

— Я з дзяцінства прызвычаіўся да сельскай працы, але прыносіць карысць грамадству можна не толькі будучы трактарыстам ці камбайнерам, але і, напрыклад, інжынерам, — разважае пра сваё будучае Сяргей.

Дзяніс Латыпаў — вадзіцель кіраўніка таварыства "Александрыйскае", але кожны сезон ён ужо звыкла перасаджваецца з "Фольк-
свагена" на грузавы "МАЗ", каб браць удзел у жніве.

— Сёмы год так працую, кожны раз імкнуся перавезці ўсё больш збожжа і, безумоўна, зарабіць больш, — усміхаецца малады чалавек.

Перасесці на грузавік, пераконвае ён, не вельмі цяжка, тым больш што "МАЗ", як жартуюць усе вадзіцелі, заўсёды на галоўнай дарозе. Сам Дзяніс калісьці прыехаў з бацькамі ў Александрыю з Расіі, з Казані.

— Мне тут спадабалася: прырода, людзі, усё, — кажа Латыпаў.

Цяпер Дзянісу 27 гадоў, яго жонка працуе галоўным дыспетчарам у гаспадарцы. У маладой сям'і вялікія планы на будучае. А цяпер Дзяніс хоча, каб на жніве іх не падводзіла тэхніка, ураджайнасць была добрая і ўсе былі здаровымі. Тады і вынікі будуць.

Цяпер у Магілёўскай вобласці 205 экіпажаў камбайнаў, якія намалацілі больш за тысячу тон збожжа, і 333 вадзіцелі, якія перавезлі больш за тысячу тон. Пётр Руднік падкрэслівае, што гэта сведчыць пра эфектыўнасць выкарыстання новай тэхнікі, якой забяспечвае сельскую гаспадарку дзяржава.

У гэтым за прыклад усім ставяць ААТ "Александрыйскае", дзе новыя сучасныя тэхніка і тэхналогіі дазволілі атрымаць 72-73 цэнтнеры з гектара. Увогуле Шклоўскі раён традыцыйна дэманструе высокую ўраджайнасць — сёлета 53-54 цэнтнеры з гектара.

"Тэхніка ў добрых руках!" — гаворыць на гэта кіраўнік вобласці, але найперш дзякуе людзям, якія на ёй працуюць.

Жніво ў рэгіёне завершыцца ў бліжэйшыя некалькі дзён. Засталося ўбраць менш за 5% пасяўных плошчаў. Аднак аграрыям раяць не расслабляцца: наперадзе ўборка кукурузы. Праца працягваецца.

Ілона Іванова,
фота аўтара.

Шклоўскі раён.

Выбар рэдакцыі

Грамадства

Як дзейнічалі партызаны ва Усакінскім лесе на Клічаўшчыне

Як дзейнічалі партызаны ва Усакінскім лесе на Клічаўшчыне

Піша сын аднаго з партызан Генадзь Сахрай.

Грамадства

Алена Богдан: Любы рух павінен быць паступальным, а не разбуральным

Алена Богдан: Любы рух павінен быць паступальным, а не разбуральным

Яна расказала чытачам «Звязды», ці плануе Беларускі саюз жанчын стаць першай жаночай палітычнай партыяй у краіне і як гэта — сумяшчаць работу ў дзяржапараце з актыўнай грамадскай дзейнасцю.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Хітра ўладкавана чалавечая памяць. Бывае, нешта ўбачыў-пачуў, а што — хоць забі — назаўтра не ўспомніш, а нешта — якраз наадварот — «ляжыць» там гадамі ці нават дзесяцігоддзямі і ўспамінаецца досыць часта...

Грамадства

Чаму ў старасці псуецца характар, з'яўляюцца бяссонніца і трывожнасць

Чаму ў старасці псуецца характар, з'яўляюцца бяссонніца і трывожнасць

Аб праблемах старэння і тым, як заўважыць і, магчыма, прадухіліць розныя псіхалагічныя захворванні ў пажылых, мы паразмаўлялі з урачом-псіхатэрапеўтам Гарадскога клінічнага псіхіятрычнага дыспансера Марынай Шчаслянок.