Да чэмпіянату свету па хакеі ў Мінску застаецца крыху больш за тры месяцы, самы час завочна пазнаёміцца з гасцямі турніру і сапернікамі беларускай зборнай.
У першы гульнявы дзень, 9 мая, зборная Беларусі згуляе са зборнай ЗША, раней гэтыя каманды сустракаліся на чэмпіянатах свету ў 2007‑м і ў 2012 гадах, двойчы амерыканскія хакеісты атрымлівалі перамогу.
«Цуд на лёдзе»
Зборная ЗША па хакеі з шайбай базуецца ў горадзе Эн Арбор, сёння займае 6 месца ў рэйтынгу ІІХФ (2013 года).
Самым вядомым поспехам зборнай ЗША стаў «Цуд на лёдзе» на Алімпіядзе 1980 года ў Лэйк-Плэсідзе, калі на шляху да золата амерыканская каманда выйграла ў абсалютнага фаварыта — зборнай Савецкага Саюза. Да гэтага часу «Цуд на лёдзе» лічыцца адным з найвялікшых дасягненняў у гісторыі амерыканскага спорту.
Акрамя таго, хакейная зборная двойчы перамагала на Алімпійскіх гульнях (1960, 1980), а таксама выйграла Кубак свету ў 1996 годзе. Апошняе дасягненне на чэмпіянатах свету — бронзавыя медалі ў 2013 годзе, на Алімпійскіх гульнях — сярэбраныя медалі ў 2010‑м.
У 1990‑х гадах амерыканскі хакей меў шмат выдатных хакеістаў, у іх ліку славутыя гульцы НХЛ Брэт Хал, Пэт Лафантэн, Крыс Чэліяс, Філ Хаўслі, Майк Рыхтэр, Браян Ліч, Джэрэмі Ронік, Майк Мадана.
Нядаўні поспех
На мінулым чэмпіянаце свету ў 2013 годзе зборная ЗША выйшла ў чвэрцьфінал, дзе перамагла Расію, але ў паўфінале саступіла швейцарцам. У матчы за трэцяе месца амерыканскія хакеісты па булітах абыгралі зборную Фінляндыі.
У складзе бронзавых прызёраў згулялі былы нападаючы мінскага «Дынама» Цім Стэплтан і амерыканец беларускага паходжання Алекс Гальчанюк (нападаючы з'яўляецца сынам экс-хакеіста зборнай Беларусі Аляксандра Гальчанюка). На той чэмпіянат галоўны трэнер Джо Сака сабраў у зборнай 20 гульцоў асноўных камандаў Нацыянальнай хакейнай лігі (НХЛ).
У Сочы па золата
Перад мінскім чэмпіянатам свету зборная ЗША згуляе на Алімпіядзе ў Сочы. Генеральны менеджар зборнай Дэвід Пойл абвясціў склад каманды, якая адправіцца на зімовыя Алімпійскія гульні.
Варатары: Джымі Ховард («Дэтройт»), Раян Мілер («Бафала»), Джонатан Куік («Лос-Анджэлес»).
Абаронцы: Джон Карлсан («Вашынгтон»), Джасцін Фолк («Караліна»), Кэм Фаўлер («Анахайм»), Пол Марцін («Пітсбург»), Раян Макдона («Рэйнджэрс»), Брукс Орпік («Пітсбург»), Кевін Шатэнкірк («Сэнт-Луіс»), Раян Сутэр («Мінесота»).
Нападаючыя: Дэвід Бэкес, Ці-Джэй Ашы (абодва — «Сэнт-Луіс»), Дасцін Браўн («Лос-Анджэлес»), Раян Кэлахэн, Дэрэк Стэпан (абодва — «Рэйнджэрс»), Патрык Кейн («Чыкага»), Раян Кеслер («Ванкувер»), Філ Кесэл, Джэймс ван Рымсдайк (абодва — «Таронта»), Макс Пачыярэці («Манрэаль»), Зак Парызе («Мінесота»), Джо Павелскі («Сан-Хасэ»), Пол Шцясны («Каларада»), Блэйк Уілер («Вініпег»).
Усе гульцы прадстаўляюць адну з наймацнейшых хакейных ліг свету — НХЛ. Трынаццаць удзельнікаў мінулых Алімпійскіх гульняў увайшлі ў склад зборнай ЗША па хакеі на Гульнях‑2014. Акрамя таго, у складзе самы каштоўны гулец зімовай Алімпіяды 2010 года ў Ванкуверы Раян Мілер і самы каштоўны гулец плэй-оф Кубка Стэнлі Патрык Кейн.
Каманда атрымалася досыць спелай і моцнай, сярэдні ўзрост алімпійскай зборнай — 27 гадоў. Узначальвае зборную ЗША Дэн Байлсме. Ён гуляў у НХЛ на працягу 12 гадоў. Байлсме працуе галоўным трэнерам у «Пітсбург Пінгвінз» з сезона 2008–2009 года. У першым жа годзе разам з камандай выйграў Кубак Стэнлі. Дэн Байлсме заявіў прэсе, што яго каманда едзе ў Сочы па золата.
Праляцелі міма
За бортам алімпійскай зборнай засталіся такія зоркі сусветнага хакея, як Бэн Бішоп (гулец «Тампа Бэй» з'яўляецца лідарам сярод варатароў НХЛ па працэнце адбітых шайбаў), Джэк Джонсан (абаронца «Каламбуса»), Кіт Ендл (абаронца «Фінікса»), Бобі Раян (нападаючы «Атавы»), Брэндан Саад (нападаючы «Чыкага»), Джэйсан Памінвіль (нападаючы «Мінесоты»).
Які склад прыедзе ў Мінск, сказаць складана, сярод спецыялістаў існуе думка, што ў алімпійскі год на чэмпіянаце свету збіраюцца не самыя моцныя хакеісты. Ды і занятасць у плэй-оф НХЛ можа перашкодзіць лідарам прыехаць у Беларусь. У першую чаргу гэта тычыцца Пола Марціна і Брукса Орпіка, чый «Пітсбург» мае 72 ачкі і знаходзіцца на першым месцы Усходняй канферэнцыі. З вялікай верагоднасцю ў плэй-оф НХЛ трапіць прадстаўнік «Анахайма» Кэм Фаўлер, яго каманда займае першы радок у Заходняй канферэнцыі. «Чыкага» Патрыка Кейна і «Каларада» Пола Шцясных таксама маюць вялікія шанцы на барацьбу за Кубак Стэнлі.
Дакладна можна сцвярджаць адно — у ЗША досыць доўгая лаўка запасных, таму зборная з любымі гульцамі будзе прэтэндаваць на п'едэстал.
Дар'я Лабажэвіч
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».