Ці бачылі вы, як на Мазыршчыне выканаўцы народнага танца «Зайчык» скачуць цераз вілкі для гаршкоў? Ці чулі вы, як у Чачэрскім раёне танцуюць «Барыню» і адначасова расказваюць гледачам пра свае хатнія справы? Ці ведаеце вы, што парны танец «Сто адзін» у самым хуткім тэмпе здаўна выконваюць пад Барысавам?
Шмат цікавага пра народныя танцы даведаліся гледачы незвычайнага канцэрта, які днямі адбыўся на галоўнай сцэне Беларускага дзяржаўнага ўніверсітэта культуры і мастацтва. Справаздачнае выступленне наладзілі студэнты пад кіраўніцтвам вядомага этнахарэографа, даследчыка танцавальнай спадчыны Мікалая Козенкі (на здымку). Як выкладчык, ён уважліва назіраў з залы за сваімі выхаванцамі, фіксаваў відэакамерай кожнае па. Такі відэазапіс спатрэбіцца, каб потым параўнаць студэнцкае выкананне танца з тым, як здаўна танцуюць у вёсцы.
Менавіта ў вёсках розных рэгіёнаў Беларусі былі сабраны гэтыя ўзоры танцавальнай і песеннай спадчыны. Студэнты неаднаразова бывалі там у экспедыцыях, пераймалі ад носьбітаў полькі, кадрылі, традыцыйныя песенныя і гульнявыя карагоды.
Акадэмічны канцэрт-справаздача супаў для маладых этнолагаў і фалькларыстаў з самым адказным часам: зараз падводзяць вынікі іх вучобы, і праз некалькі месяцаў яны атрымаюць дыпломы. Веды народнай спадчыны і павага да яе назаўжды застануцца для іх бясцэнным здабыткам.
Яўген ПЯСЕЦКІ
Фота аўтара
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
