Вы тут

Якіх спецыялістаў чакае рынак працы?


Пераход да абавязковай для ўсіх навучэнцаў сярэдняй адукацыі, які ініцыюе Міністэрства адукацыі, ніяк не адаб'ецца на напаўненні ўстаноў прафесійна-тэхнічнай і сярэдняй спецыяльнай адукацыі. У выпускнікоў базавай школы па-ранейшаму будзе магчымасць выбару: або працягнуць навучанне ў прафесійным ліцэі ці каледжы і паралельна з прафесіяй атрымліваць таксама агульную сярэднюю адукацыю, або пайсці ў 10—11-ты клас, пасля чаго таксама можна будзе выбіраць, на якім узроўні атрымліваць далейшую адукацыю. Хтосьці зробіць выбар на карысць ВНУ, а хтосьці паступіць на ўзровень прафесійна-тэхнічнай або сярэдняй спецыяльнай адукацыі.


— Сёння больш як на 90 працэнтах спецыяльнасцяў у прафтэхустановах разам з рабочай прафесіяй навучэнцы атрымліваюць і завершаную агульную сярэднюю адукацыю, — запэўнівае кансультант упраўлення прафесійнай адукацыі Міністэрства адукацыі Таццяна АРЦЕМ'ЕВА. — Раней было больш спецыяльнасцяў пасля базавай школы, дзе навучэнцам давалі толькі прафесію, але ў апошнія гады запатрабаванасць такіх праграм няўхільна зніжалася, што цалкам зразумела: бацькі жадаюць, каб іх дзеці засвоілі поўны школьны курс, бо без атрымання агульнай сярэдняй адукацыі немагчыма затым працягнуць навучанне ва ўстановах сярэдняй спецыяльнай або вышэйшай адукацыі.

У апошнія гады ў прафесійна-тэхнічныя навучальныя ўстановы накіроўвалася каля 20 працэнтаў выпускнікоў базавай школы, а з выпускнікоў сярэдняй школы атрымліваць рабочую прафесію ішлі 14—15 працэнтаў ад агульнай колькасці.

20 жніўня ў прафесійна-тэхнічных навучальных установах завяршыўся прыём дакументаў. А некалькі днямі раней завяршылася прыёмная кампанія ва ўстановах сярэдняй спецыяльнай адукацыі. Чым яна запомнілася?

Па словах кансультанта ўпраўлення прафесійнай адукацыі Міністэрства адукацыі Беларусі Таццяны Караткевіч, у 2017 годзе ў ССНУ планавалі прыняць 39 тысяч чалавек, у тым ліку 24 тысячы — за кошт сродкаў бюджэту.

 «Па папярэдніх звестках, агульны працэнт выканання плана прыёму склаў 97,1%, што некалькі лепш, чым паказчыкі за аналагічны перыяд мінулага года (96,7%). Бюджэтныя месцы запоўненыя на 99,5%. Гэта таксама больш высокі паказчык, чым у 2016 годзе», — падкрэсліла Таццяна Караткевіч. Што датычыцца плана прыёму на платную форму навучання, то ён выкананы на 93%.

На вяршыні папулярнасці ў абітурыентаў традыцыйна знаходзіцца «правазнаўства». Конкурс на гэту спецыяльнасць склаў 5 чалавек на месца, а прахадны бал — 9,5 з 10. У топ увайшлі таксама такія спецыяльнасці, як «фатаграфія», «аўтасэрвіс», «лінгвістычнае забеспячэнне сацыякультурнай дзейнасці». Ахвотна маладыя людзі выбіраюць спецыяльнасці ў медыцынскіх і педагагічных каледжах: і там, і там конкурс перавысіў 3 чалавекі на месца. А прахадны бал на педагагічныя спецыяльнасці склаў 8,8 з 10.

Другі год запар ажыццяўляўся набор на ўзровень сярэдняй спецыяльнай адукацыі па спецыяльнасці «аперацыйная дзейнасць у лагістыцы». Гэта вельмі перспектыўны і запатрабаваны кірунак, таму сёлета пашырылася кола ўстаноў, дзе пачалі рыхтаваць адпаведных спецыялістаў.

Установы прафесійна-тэхнічнай адукацыі, у сваю чаргу, пачнуць падрыхтоўку па пяці новых прафесіях: электрамеханік па сродках аўтаматыкі і прыбораў тэхналагічнага абсталявання, рабочы па комплексным абслугоўванні будынкаў і збудаванняў, аператар лічбавага друку, кузаўшчык і вытворца тварагу. Усяго ж на ўзроўні прафесійна-тэхнічнай адукацыі можна атрымаць 251 рабочую прафесію. Пры гэтым доля спецыяльнасцяў рэальнага сектара эканомікі складае каля 80%. Для забеспячэння патрэбаў інавацыйнай вытворчасці па шэрагу прафесій рыхтуюцца рабочыя з больш высокім разрадам: выпускнікі прафтэхустаноў атрымліваюць не менш як чацвёрты разрад.

Як зазначыла Таццяна Арцем'ева, пачынаючы з 2006 года ў краіне ажыццяўляецца аптымізацыя сеткі ўстаноў прафтэхадукацыі. У параўнанні з папярэднім навучальным годам колькасць устаноў прафесійна-тэхнічнай адукацыі зменшыцца на 19 адзінак: у Віцебскай вобласці — на 5 адзінак, у Гомельскай — на 3, Гродзенскай — на 3, у Магілёўскай — на 7, у Мінску — на адну. Усяго падрыхтоўку будуць весці 135 устаноў прафесійна-тэхнічнай адукацыі. Колькасць устаноў сярэдняй спецыяльнай адукацыі скароціцца на дзве адзінкі.

Для абітурыентаў 2018 года можа аказацца карыснай наступная інфармацыя. На партале Міністэрства адукацыі ў раздзеле «Абітурыенту» змешчаны электронны даведнік для тых, хто паступае ў ССНУ. Там можна знайсці і ўсе ўстановы, і ўсе спецыяльнасці, і прахадныя балы. Даведнік рыхтавалі спецыялісты выдавецтва «Вышэйшая школа». Для большай зручнасці ён пераведзены ў электронны фармат і знаходзіцца ў свабодным доступе.

Надзея НІКАЛАЕВА

nіkаlаеvа@zvіаzdа.bу

Загаловак у газеце: «Лагістыка» і «вытворчасць тварагу»

Выбар рэдакцыі

Грамадства

Беларуская Амазонка​. Ці стане Палессе аб'ектам сусветнай спадчыны?

Беларуская Амазонка​. Ці стане Палессе аб'ектам сусветнай спадчыны?

Адзін з найбуйнейшых рэгіёнаў, які захаваўся ў некранутым стане і які за разнастайнасць азёр, рэк і балот празвалі Еўрапейскай Амазонкай (ці морам Герадота), усё яшчэ застаецца невядомым шырокаму колу турыстаў

Грамадства

Дружалюбнасць да сем'яў і моладзі — важны крытэрый сацыяльна арыентаванай дзяржавы. Круглы стол

Дружалюбнасць да сем'яў і моладзі — важны крытэрый сацыяльна арыентаванай дзяржавы. Круглы стол

Нацыянальным брэндам Беларусі па праве лічыцца сацыяльная падтрымка сем'яў дзяржавай, і таму напярэдадні Міжнароднага дня сям'і прадстаўнік

Калейдаскоп

Хутка выпускны! Што выбраць, каб выглядаць годна на галоўным школьным свяце?

Хутка выпускны! Што выбраць, каб выглядаць годна на галоўным школьным свяце?

Пачнём, зразумела, з дзяўчынак, бо менавіта іх мамы ўжо цяпер ламаюць галаву над выпускным уборам дачок.