Вы тут

Каго залічаць у профільны клас?


Пастановай Міністэрства адукацыі ад 3 сакавіка 2018 года № 10 унесены змяненні і дапаўненні ў Палажэнне аб установе агульнай сярэдняй адукацыі.


— Гэты дакумент прымаўся яшчэ ў 2011 годзе, таму была неабходнасць яго адкарэктаваць з улікам многіх новых абставін і прывесці ў адпаведнасць з Указам Прэзідэнта Рэспублікі Беларусь "Аб прыёме ва ўстановы агульнай сярэдняй адукацыі і навучанні ў іх", — растлумачыла начальнік галоўнага ўпраўлення агульнай сярэдняй, дашкольнай і спецыяльнай адукацыі Міністэрства адукацыі Святлана УКЛЕЙКА.

У прыватнасці, цяпер у палажэнні зафіксаваная магчымасць навучання ў класах з вывучэннем асобных вучэбных прадметаў на павышаным узроўні (раней у дакуменце гэтага пункта не было). Прычым такія класы ці групы могуць стварацца ва ўстановах агульнай сярэдняй адукацыі не толькі на трэцяй, але і на другой ступені адукацыі. Для таго каб прэтэндаваць на залічэнне ў профільны клас на старшай ступені школы (10—11 класы), трэба мець сярэдні бал пасведчання аб агульнай базавай адукацыі не ніжэй за 6 балаў, а па вучэбных прадметах, што будуць вывучацца на павышаным узроўні, не менш за 7 балаў.

— Для старшай ступені школы нічога не змянілася — такія ж патрабаванні для залічэння ў класы з павышаным узроўнем вывучэння асобных прадметаў дзейнічалі і раней, — удакладніла Святлана Уклейка. — А на другой ступені навучання конкурсны адбор у класы, дзе пэўныя прадметы будуць вывучацца на павышаным узроўні, увогуле не прадугледжаны. Не будзе больш экзаменаў і ў пятыя класы гімназій. Вучні, якія атрымалі пачатковую адукацыю ў гімназіях і гімназіях-інтэрнатах, па жаданні могуць працягнуць навучанне ў тых жа ўстановах на ІІ ступені агульнай сярэдняй адукацыі. Але ёсць адзін нюанс: прыём асоб для атрымання базавай адукацыі ў гімназіях-каледжах мастацтваў будзе ажыццяўляцца па конкурсе на падставе праверкі іх здольнасцяў у галіне асобных відаў мастацтва. Гэта значыць, што творчае выпрабаванне для іх застаецца, а мову і матэматыку яны больш не здаюць.

Тыя, хто скончыў дзевяць класаў у гімназіі, змогуць і далей — без іспытаў і праверкі творчых здольнасцяў — працягнуць навучанне ў 10-м і 11-м класах. Здараецца, што ў дзясятым класе ў гімназіях з'яўляюцца свабодныя месцы. Тых, хто будзе на іх прэтэндаваць, чакаюць два ўступныя экзамены па прадметах, якія тут вывучаюцца на павышаным узроўні (экзамены прадугледжваліся і раней). Гэта можа быць дыктант, дыктант з граматычным заданнем, тэставыя заданні, кантрольная работа ў пісьмовай форме, тэарэтычныя пытанні для правядзення экзамену ў вуснай форме, тэарэтычныя пытанні і практычныя заданні для правядзення ўступных іспытаў пры спалучэнні вуснай і практычнай формаў. Тэрмін правядзення экзаменаў — з 2 па 12 жніўня.

Экзамены ў 10-ы клас ліцэяў будуць арганізаваныя з 16 па 20 чэрвеня. Будучыя ліцэісты здаюць два ўступныя іспыты з ліку вучэбных прадметаў, вызначаных вучэбным планам для вывучэння на павышаным узроўні. Гэта могуць быць не толькі матэматыка і фізіка ці матэматыка і інфарматыка, а, напрыклад, матэматыка і хімія.

Таксама Святлана Уклейка звярнула ўвагу яшчэ на адзін важны нюанс: дакументы ад бацькоў аб прыёме іх дзяцей у першы клас цяпер будуць прымацца не з 2 чэрвеня, як было раней, а з 12 чэрвеня па 28 жніўня. Паколькі ў першай дэкадзе месяца ва ўстановах адукацыі ідуць выпускныя экзамены, праходзяць выпускныя вечары, было вырашана пасунуць гэты тэрмін, каб не ўскладаць на педагагічны калектыў залішнюю нагрузку.

Надзея НІКАЛАЕВА

Выбар рэдакцыі

Калейдаскоп

Хутка выпускны! Што выбраць, каб выглядаць годна на галоўным школьным свяце?

Хутка выпускны! Што выбраць, каб выглядаць годна на галоўным школьным свяце?

Пачнём, зразумела, з дзяўчынак, бо менавіта іх мамы ўжо цяпер ламаюць галаву над выпускным уборам дачок.

Грамадства

Дружалюбнасць да сем'яў і моладзі — важны крытэрый сацыяльна арыентаванай дзяржавы. Круглы стол

Дружалюбнасць да сем'яў і моладзі — важны крытэрый сацыяльна арыентаванай дзяржавы. Круглы стол

Нацыянальным брэндам Беларусі па праве лічыцца сацыяльная падтрымка сем'яў дзяржавай, і таму напярэдадні Міжнароднага дня сям'і прадстаўнік