З якім настроем сустракае гэты дзень айчынная медыцына, расказалі спецыялісты Міністэрства аховы здароўя.
— Штогод паступаць у медыцынскія ВНУ прыходзяць выпускнікі з самымі высокімі баламі, — адзначыла начальнік галоўнага ўпраўлення арганізацыі медыцынскай дапамогі і экспертызы Міністэрства аховы здароўя Алена БОГДАН. — Мы ганарымся, што высокаадукаваныя маладыя людзі становяцца нашымі студэнтамі.
Штогод мы мяняем сістэму падрыхтоўкі кадраў у адпаведнасці з сучаснымі патрабаваннямі. У прыватнасці, з новага вучэбнага года на 1-м курсе студэнты пачнуць вывучаць «Асновы догляду пацыента», на 6-м курсе будзе ўведзена дысцыпліна «Медыцынскае права з пытаннямі біяэтыкі і камунікацый паміж урачом і пацыентам».
Мяняецца і структура аказання медыцынскай дапамогі на ўзроўні пярвічнага звяна, у прыватнасці, адбываецца пераход ад тэрапеўтаў да ўрачоў агульнай практыкі. Летась у Беларусі ўрачамі агульнай практыкі працавалі ўжо 1174 спецыялісты, а гэта 40 %. Мяркуецца, што сёлета гэта лічба дасягне 60% (або 2 тысячы ўрачоў агульнай практыкі).
Тэрапеўты праходзяць перападрыхтоўку, пасля чаго могуць спалучаць функцыі эндакрынолага, оталарынголага, афтальмолага, пульманолага і кардыёлага. Разам з гэтым працоўныя месцы ўрачоў агульнай практыкі аснашчаюць неабходным дыягнастычным абсталяваннем — глюкометрамі (для вымярэння ўзроўню глюкозы ў крыві), афтальмаскопамі (для агляду вочнага дна), прыборамі для агляду лор-органаў, кардыёграфамі (для вымярэння біяэлектрычнай актыўнасці сэрца). Холтэраўскім манітарыраваннем (прыбор, які фіксуе работу сэрца на працягу сутак) працоўныя месцы будуць абсталяваны з разліку адна сістэма на пяць урачоў.
Для ранняга выяўлення хвароб, у тым ліку і анкалагічных, у нашай краіне ўсё больш распаўсюджваюцца скрынінгавыя праграмы. Для Беларусі гэта актуальна — тут штогод рак выяўляецца ў больш чым 50 тысяч чалавек. Сёння паспяхова ўкараняюцца скрынінгавыя праграмы па выяўленні рака чатырох самых распаўсюджаных лакалізацый: шыйкі маткі, малочных залоз, прастаты і кішэчніка. У найбліжэйшых планах, як паведаміў дырэктар РНПЦ анкалогіі і медыцынскай радыялогіі імя М. М. Аляксандрава, член Савета Рэспублікі Алег СУКОНКА, з'явіцца яшчэ чатыры праекты па скрынінгу раку. Гэта дазволіць выяўляць на ранніх стадыях рак лёгкага, ратаглоткі, яечнікаў і скуры. А пілотны праект па скрынінгу раку лёгкага ўжо рэалізуецца на базе Мінскага абласнога туберкулёзнага дыспансера.
Пакуль у структуры смяротнасці першае месца займаюць не анкалагічныя, а сардэчна-сасудзістыя хваробы. Яны становяцца прычынай гібелі да 58 % людзей, адзначыў галоўны пазаштатны кардыёлаг Міністэрства аховы здароўя, дырэктар РНПЦ «Кардыялогія» Аляксандр МРОЧАК. Тым часам імкліва развіваюцца тэхналогіі ў аказанні кардыялагічнай дапамогі.
— Мы можам выратоўваць людзей ад інфаркту міякарда, з вострым каранарным сіндромам, кардыяміяпатыяй — натуральным вынікам гэтага стане павелічэнне працягласці жыцця і колькасці пацыентаў з сардэчнай недастатковасцю. Фінальная стадыя аказання дапамогі такім пацыентам — трансплантацыя. У Беларусі ўжо праведзена 293 перасадкі сэрца, выканана ўнікальная аперацыя па трансплантацыі «сэрца+лёгкія», — расказаў Аляксандр Мрочак.
Летась стартавалі сістэмныя праграмы па элімінацыі (выключэнні) такіх хвароб, як ВІЧ, туберкулёз і гепатыт С, распачата лячэнне рассеянага склерозу. У прыватнасці, пачата лячэнне віруснага гепатыту С за сродкі рэспубліканскага бюджэту. Беларусь, дарэчы, стала першай краінай свету, дзе гэта магчыма за дзяржаўныя сродкі. У праграму пакуль уключана 2 тысячы пацыентаў. Калі раней прэпараты на лячэнне гэтай хваробы закупляліся за сродкі Глабальнага фонду, то зараз асноўныя лекі выпускаюцца айчыннымі фармакалагічнымі прадпрыемствамі. Дзякуючы гэтаму курс лячэння аднаго пацыента стаў таннейшы ў 40 разоў. Калі 7-8 гадоў таму яно каштавала 30-40 тысяч долараў, то зараз — 800—900 долараў. Лячэнне гепатыту С у 96 % выпадкаў паспяховае і вядзе да поўнага знікнення хваробы, у пацыента не развіваецца цыроз і рак печані.
Усяго ў Беларусі каля 34 тысяч хворых на вірусны гепатыт С. Акрамя 2 тысяч ужо ўключаных у праграму сфарміравана заяўка на лячэнне яшчэ 4 тысяч. Такім чынам, штогод такіх пацыентаў будуць накіроўваць на лячэнне, і адпаведна іх колькасць паступова зменшыцца, расказаў каардынатар праграм Сусветнай арганізацыі аховы здароўя па інфекцыйных хваробах у Рэспубліцы Беларусь Вячаслаў ГРАНЬКОЎ.
Каля 70 % ВІЧ-станоўчых беларусаў атрымліваюць лячэнне за дзяржаўны кошт. Беларусь, дарэчы, адна з першых краін свету, дзе ўкаранілі саматэставанне на ВІЧ.
З мая гэтага года такой методыкай ахоплены ўсе рэгіёны. Тэст на ВІЧ можна набыць у звычайнай аптэцы і зрабіць яго дома. Ужо каля двух дзясяткаў чалавек пасля такой працэдуры звярнулася ў медыцынскія ўстановы для пацвярджэння дыягназу.
Поспехі беларускіх фармаколагаў не толькі ў выпуску прэпаратаў для лячэння такіх складаных хвароб як гепатыт С. Сёння на беларускім рынку каля 53 % лекаў — айчыннай вытворчасці. 84 % з іх каштуюць не больш за 10 рублёў, нягледзячы на тое, што гэта высокаінтэлектуальны прадукт, які адпавядае ўсім крытэрыям эфектыўнасці, паведаміла начальнік упраўлення фармацэўтычнай інспекцыі і арганізацыі лекавага забеспячэння Міністэрства аховы здароўя Людміла РЭУЦКАЯ. За апошнія 15 гадоў у Беларусі не выяўлена выпадкаў фальсіфікацыі лекавых сродкаў, а з правераных 5,3 тысячы серый прэпаратаў айчыннай вытворчасці забракаваны ўсяго 0,1 % падчас допуску на рынак. Пры гэтым праверкі ў аптэчных сетках браку не выявілі.
— Мы змагаемся з павышэннем цэн на лекавыя сродкі. У прыватнасці, былі скаргі на тое, што ў Расіі некаторыя прэпараты таннейшыя, чым у Беларусі. Мы працавалі з вытворцамі і пастаўшчыкамі і дамагліся зніжэння цэн, — адзначыла Людміла Рэуцкая.
Алена КРАВЕЦ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
