Развітальны акорд ІІ Еўрапейскіх гульняў прагучыць заўтра

У дні ІІ Еўрапейскіх гульняў Мінск пачаў размаўляць на дзясятках моў, тысячы балельшчыкаў з усяго свету сабраліся тут, каб паназіраць за выступленнямі сваіх любімых спартсменаў. А заадно і пазнаёміцца з беларускай сталіцай, а таксама культурнай і гістарычнай спадчынай усёй Беларусі.

Большасць узнагарод Еўрапейскіх гульняў у Мінску ўжо разыграна, за гэтыя дні на спартыўныя арэны выйшлі тысячы спартсменаў, у тым ліку сусветныя зоркі, рэкардсмены і алімпійскія чэмпіёны з 50 краін Еўропы. Вачыма сотняў журналістаў з усяго свету самую буйную спартыўную падзею гэтага лета ўбачылі аматары спорту ўсёй планеты.

Апошнім акордам Гульняў стане цырымонія закрыцця, якая заўтра адбудзецца на Нацыянальным алімпійскім стадыёне «Дынама». Ужывую ў Мінску яе змогуць убачыць 22 тысячы чалавек, а таксама мільёны тэлегледачоў ва ўсім свеце.

Ключавымі героямі цырымоніі стануць самі спартсмены, члены дэлегацый краін-удзельніц, валанцёры і, вядома ж, балельшчыкі, якія падтрымлівалі атлетаў на працягу 10 дзён спаборніцтваў. У шоу прымуць удзел 4500 валанцёраў і каля 2000 спартсменаў. Па словах рэжысёра-пастаноўшчыка шоу Аляксея Сечанава, «цырымонія закрыцця — гэта заўсёды падвядзенне вынікаў. Вынікаў дзесяці спаборніцкіх дзён, якія былі напоўнены не толькі захапленнем і радасцю перамог, але і слязамі расчаравання. Каля чатырох тысяч спартсменаў сабралася ў Мінску, каб выканаць свае мары. І чыесьці мары спраўдзіліся, а хтосьці паставіў сабе новыя мэты, правёўшы работу над памылкамі. Гэта будзе маляўнічае, маштабнае шоу, над якім працуе вялікая шматнацыянальная рэжысёрска-пастановачная група. Госці і гледачы цырымоніі змогуць прагартаць яркі альбом успамінаў, яшчэ раз акунуцца ў атмасферу спаборніцкіх дзён і адчуць тыя самыя эмоцыі, якія перажывалі спартсмены і іх трэнеры».

Спецыяльна да цырымоніі закрыцця створаны ўнікальны відэарад, які раскрые патаемныя моманты і шчырыя эмоцыі вялікага спорту. Кожны эпізод прысвечаны пэўнай грані спорту. Музычным суправаджэннем тэатралізаваных эпізодаў мерапрыемства стануць вядомыя сучасныя кампазіцыі. Адно з цэнтральных месцаў у цырымоніі адведзена сучаснай Беларусі. Стваральнікі шоу натхняліся прадстаўнікамі прагрэсіўнай моладзі Беларусі, іх ідэямі, у якіх інтэлект, адукаванасць, культура спалучаюцца з сапраўдным драйвам і імкненнем да самаўдасканалення. Энергія беларускай моладзі, энергія атлетаў, спартсменаў-удзельнікаў ІІ Еўрапейскіх гульняў знойдуць сваё адлюстраванне ў нядзельнай пастаноўцы.

У рамках цырымоніі закрыцця Гульняў выступяць шырока вядомыя беларускія выканаўцы — групы ІOWA, J:Морс, Tesla Boy і «Лепрыконсы». У лік запрошаных артыстаў увойдуць таксама народны артыст Расіі, Украіны і Чачэнскай Рэспублікі Мікалай Баскаў і заслужаная артыстка Рэспублікі Беларусь Аксана Волкава.

Таксама ва ўрачыстай цырымоніі закрыцця Гульняў плануецца ўдзел высокіх гасцей, прэзідэнта Таджыкістана Эмамалі Рахмона і прэзідэнта Расіі Уладзіміра Пуціна.

Прамую трансляцыю ўрачыстага закрыцця ў 21:55 пачнуць каналы «Беларусь 1», «Беларусь 5», «Беларусь 5. Інтэрнэт», а таксама сайт медыяхолдынга tvr.by.

За час турніру госці, спартсмены і спартыўныя менеджары выказалі мноства водгукаў пра ІІ Еўрапейскія гульні і пра Беларусь у цэлым. Прыводзім некаторыя з іх:

Кіраўнік Еўрапейскай лёгкаатлетычнай асацыяцыі Свен Арнэ ХАНСЭН:

— Мінск для мяне з'яўляецца адным з найпрыгажэйшых гарадоў Еўропы. Мне вельмі спадабалася цырымонія адкрыцця Еўрапейскіх гульняў, яна была відовішчнай, цікавай, проста выдатнай. Новы фармат спаборніцтваў па лёгкай атлетыцы, які быў паказаны на Гульнях, — гістарычны момант, я вельмі рады, што ён адбыўся менавіта ў Мінску.

Дзяржсакратар Саюзнай дзяржавы Рыгор РАПОТА:

— У ІІ Еўрапейскіх гульняў бліскучая арганізацыя. Я быў на адкрыцці і пераканаўся ў тым, што сапраўды Рэспубліка Беларусь уклала душу ў тое, каб гэтыя гульні адбыліся на высокім сусветным узроўні. А якія вынікі будуць канчатковыя — гэта залежыць ад спартсменаў, а не ад арганізатараў. Я думаю, што для спартсменаў тут створаны ўсе неабходныя ўмовы.

Грэчаскі велагоншчык Хрыстас ВАЛІКАКІС:

— Старты такога ўзроўню не бываюць лёгкія, у Беларусі сабраліся спартсмены высокага ўзроўню, імёны якіх вядомыя ва ўсім свеце. Я часта прыязджаю выступаць у Мінск. Тут мне падабаецца, я адчуваю сябе шчаслівым. У маёй калекцыі ўзнагарод ёсць тыя, што былі выйграны менавіта тут. Праўда, горад паглядзець ніяк не атрымліваецца: увесь час праводжу на трэніроўках або ў гасцініцы. Так што любімае месца ў мяне пакуль адно — веладром «Мінск-Арэны».

Надзвычайны і Паўнамоцны Пасол Малдовы ў Беларусі Віктар САРАЧАН:

— Усе вельмі задаволеныя ўмовамі. Маштабы Гульняў уразілі, таму што прыняць пяць тысяч чалавек адначасова на адной тэрыторыі, каб ім было камфортна, накарміць іх своечасова, смачна і карысна — гэта шмат чаго варта. Для нас гэта было дзіўна. У спартсменаў няма пытанняў па размяшчэнні, усё вельмі добра, вольны час арганізаваны, добра працуе транспарт. Вельмі шмат людзей: шматгалоссе, шматмоўе. Маса ўражанняў, як арганізаваны фан-зоны. Добра, што ёсць дні розных краін, канцэрты, забавы і разнастайная ежа. Тое, як арганізаваны гэтыя Гульні, наколькі адказна падышлі мясцовыя ўлады, я вам скажу, што гэта ўзровень еўрапейскі і сусветны. Мы бачылі шмат спаборніцтваў, і як усё зроблена тут — гэта выдатна. Ужо вядома, хто будзе наступным гаспадаром Гульняў, ім будзе складана вас пераскочыць.

Дар'я ЛАБАЖЭВІЧ

Фота БелТА