Вы тут

Лёгкаатлеты здабылі медальны скарб


У традыцыйным аглядзе «Звязды» расказваем галоўныя спартыўныя навіны


 

Фота БелТА

Падзея тыдня. Зборная Італіі выйграла чэмпіянат Еўропы па футболе. У фінальным паядынку Еўра-2020 італьянцы перамаглі каманду Англіі ў серыі пасляматчавых пенальці з вынікам 3:2 (гульнявы час — 1:1).

Зборная Англіі ўпершыню ў гісторыі выйшла ў фінал чэмпіянату Еўропы, у паўфінале яны былі мацнейшыя за каманду Даніі — вынік сустрэчы 2:1 у дадатковы час. Для зборнай Італіі гэты фінал стаў чацвёртым у гісторыі чэмпіянатаў Еўропы.

Найлепшымі бамбардзірамі Еўра-2020 сталі партугалец Крышціяну Раналду і чэх Патрык Шык, якія забілі па пяць мячоў.

Гераіня тыдня. Арына Сабаленка ўпершыню ў кар’еры паднялася на трэцяе месца ў рэйтынгу Жаночай тэніснай асацыяцыі (WTA). Перад стартам Уімблдонскага турніру яна была чацвёртая, а пасля выхаду ў яго паўфінал паднялася на адну пазіцыю. Цяпер у актыве беларускай тэнісісткі 6965 балаў.

Герой тыдня. Беларус Яўген Каралёк стаў пераможцам этапу Кубка нацый па веласіпедным спорце, які праходзіў у Санкт-Пецярбургу. Наш суайчыннік заняў першае месца ў омніуме, набраўшы 177 балаў. Яўген Каралёк лідзіруе ў дысцыпліне «омніум» у агульным заліку Кубка нацый, маючы 1520 балаў.

Надзеі тыдня. Беларускія баксёры выйгралі тры «бронзы» на чэмпіянаце Еўропы сярод юніёраў у Грузіі. У вагавой катэгорыі 50 кг сярод хлопцаў вызначыўся Вітас Гарцуеў, ён стаў бронзавым прызёрам. Аналагічны вынік паказаў і Кірыл Станкевіч, які выступае ў катэгорыі 60 кг. Бронзавым медалём скарбонку Беларусі папоўніла і Ганна Серада (63 кг).

Перамога тыдня. Беларуская тэнісістка Крысціна Дзмітрук у пары з расіянкай Дзіянай Шнайдэр перамаглі ў фінальным матчы юніёрскага разраду на Уімблдоне. Беларуска-расійскі дуэт аказаўся мацнейшы за бельгійку Софію Кастоўлас і фінку Лауру Хіетарантой. Вынік сустрэчы — 6:1, 6:2.

Медалі тыдня. На мінулым тыдні беларускія лёгкаатлеты сабралі цэлую калекцыю медалёў розных міжнародных турніраў. Аляксандра Коньшына выйграла «золата» маладзёжнага чэмпіянату Еўропы (U-23) у Таліне ў кіданні кап’я. У сваёй найлепшай спробе яна закінула снарад на 59 м 14 см, гэта яе новы асабісты рэкорд. Дзмітрый Карпук стаў пераможцам гэтага ж турніру ў штурханні ядра. У найлепшай спробе ён зафіксаваў вынік на адзнацы 20 м 33 см. Медаль маладзёжнага чэмпіянату Еўропы заваяваў і дыскабол Яўген Багуцкі. У найбольш удалай спробе яго снарад адляцеў на 61 м 21 см і прынёс беларусу «серабро».

Максім Недасекаў заняў трэцяе месца на этапе Брыльянтавай лігі ў Манака. У сектары для скачкоў у вышыню яму пакарылася вышыня ў 2 м 25 см. Таксама Максім Недасекаў перамог на міжнародным турніры ў Венгрыі. Ён пераадолеў планку ў 2 м 37 см, устанавіў новы нацыянальны рэкорд і заваяваў «золата» спаборніцтваў. На гэтым жа турніры беларуска Настасся Мірончык-Іванова заняла трэцяе месца. У сектары для скачкоў у даўжыню яна паказала вынік 6 м 60 см. Эльвіра Герман стала сярэбранай медалісткай турніру. Беларуска выступала на дыстанцыі 100 метраў з бар’ерамі.

Ірына Жук стала бронзавым прызёрам у скачках з шастом на этапе Брыльянтавай лігі ў Швецыі.

Няўдача тыдня. Беларускія валейбалісткі ўступілі ў трэцім матчы групавога этапу маладзёжнага чэмпіянату свету. Гэтым разам саперніцы з Італіі былі мацнейшыя за беларусак. Вынік сустрэчы — 3:0. Самымі выніковымі у беларускай камандзе сталі Дар’я Вакулка (14 балаў) і Дар’я Саўчук (10 балаў). Да гэтага беларускія валейбалісткі перамаглі каманду Егіпта — 3:2 і прайгралі камандзе Польшчы — 0:3.

Пасля трох тураў беларуская каманда займае трэцяе месца ў групе D і з двума баламі працягвае выступленне ў суцяшальным раўндзе кантынентальнага першынства, дзе будуць разыграны 9-16 месцы ў выніковай класіфікацыі чэмпіянату.

Турнір тыдня. Беларускія пяціборцы выступілі на чэмпіянаце Еўропы ў Расіі. Беларусы Яўген Арол, Іван Хамцоў і Арцём Еўсцігнееў сталі бронзавымі прызёрамі турніру ў камандным першынстве. У суме яны набралі 4288 балаў. Ілья Палазкоў і Яраслаў Радзюк выйгралі сярэбраныя медалі турніру. Па выніках мужчынскай эстафеты яны набралі 1485 балаў. Вольга Сілкіна і Настасся Пракапенка заваявалі «золата» чэмпіянату Еўропы. У жаночай эстафеце яны набралі 1430 балаў.

Параалімпійцы тыдня. Алеся Макрыцкая выйграла «золата» этапу Кубка свету па фехтаванні на калясках «Шабля Кілінскага — 2021» у Варшаве. Беларуская шпажыстка, якая выступае ў катэгорыі В, у вырашальным паядынку супраць украінкі Алёны Фядоты выйграла з вынікам 14:12.

Барэц Георг Адамян заваяваў «бронзу» чэмпіянату свету па грэка-рымскай барацьбе сярод спартсменаў з парушэннямі слыху ў Турцыі.

Валерыя СЦЯЦКО

Выбар рэдакцыі

Грамадства

«Сацыяльная зніжка» — каму і на што? Як купіць прадукты танней на 10 %

«Сацыяльная зніжка» — каму і на што? Як купіць прадукты танней на 10 %

На зніжку могуць разлічваць пенсіянеры, шматдзетныя сем'і і.

Палітыка

Андрэй Савіных: Якасць абраных стратэгій не правяраецца ў ідэальных сітуацыях

Андрэй Савіных: Якасць абраных стратэгій не правяраецца ў ідэальных сітуацыях

Беларускі парадак дня нікому не дае расслабіцца, час не дазваляе.

Грамадства

Экстраная дапамога. Як працуе Цэнтр аператыўнага кіравання МНС

Экстраная дапамога. Як працуе Цэнтр аператыўнага кіравання МНС

Дзяжурныя службы — вушы і вочы Міністэрства па надзвычайных сітуацыях. 

Палітыка

Пасол Беларусі ў КНР: З 1992-га тавараабарот з Кітаем вырас больш як у 130 разоў

Пасол Беларусі ў КНР: З 1992-га тавараабарот з Кітаем вырас больш як у 130 разоў

Наперадзе юбілей беларуска-кітайскіх адносін — 30 гадоў.