Вы тут

Арына Сабаленка другі раз запар стала пераможцай Australіan Open


27 студзеня наша суайчынніца ў вырашальным паядынку жаночага адзіночнага разраду абыграла ў дзвюх партыях кітайскую тэнісістку Чжэн Цыньвень (15-е месца ў рэйтынгу WTA) з лікам 6:3, 6:2. Сустрэча доўжылася 1 гадзіну 16 хвілін і прайшла з поўнай перавагай беларускі — тры эйсы, ніводнай падвойнай памылкі на падачы і тры рэалізаваныя брэк-пойнты з шасці. Гэты матч стаў самым кароткім — па колькасці згуляных геймаў — фіналам Australіan Open з 2012 года, калі беларуска Вікторыя Азаранка абыграла расійскую тэнісістку Марыю Шарапаву. Пасля суботняй перамогі Арына Сабаленка засталася на другім радку ў рэйтынгу Жаночай тэніснай асацыяцыі, а ўвогуле ў яе цяпер 14 перамог у турнірах, праведзеных пад эгідай WTA.


Члена нацыянальнай зборнай з перамогай павіншаваў Прэзідэнт Беларусі Аляксандр Лукашэнка. «Віншую з упэўненай абаронай тытула чэмпіёнкі Australіan Open. Перамога на турніры „Вялікага шлема“ — вялізнае асабістае дасягненне, прадмет нацыянальнага гордасці, выдатны стымул і прыклад для тысяч дзяцей у Беларусі і па ўсім свеце. Дзякую ўсім, хто мае дачыненне да гэтага трыумфу. Жадаю моцнага здароўя і новых поспехаў», — гаворыцца ў віншаванні.

Таксама свае віншаванні тэнісістцы накіраваў і старшыня Нацыянальнага алімпійскага камітэта. Віктар Лукашэнка адзначыў, што на працягу ўсяго турніру ў Мельбурне Арына Сабаленка даказвала, што па праве з’яўляецца адной з наймацнейшых тэнісістак свету: «Абараніць тытул чэмпіёнкі заўсёды нашмат складаней, чым атрымаць яго ўпершыню. Табе гэта ўдалося зрабіць цудоўна: у кожным матчы ты была найлепшай, пацвярджаючы высокі ўзровень айчыннай школы тэніса». Ён падкрэсліў, што перамога ў фінале турніру «Вялікага шлема» — гістарычнае дасягненне, і пажадаў, каб гэты поспех стаў толькі пачаткам бліскучага сезона.

Год і сапраўды пачынаецца для тэнісісткі ўдала. Яна выдатна пачала турнір у Мельбурне і ўпэўнена дайшла да фіналу, а на шляху да паўфіналу ўвогуле прайграла толькі 16 геймаў ва ўсіх матчах. Нагадаем, што ўпершыню ў кар’еры Арына Сабаленка выйграла турнір серыі «Вялікага шлема» ў мінулым годзе. Летась яна перамагла прадстаўніцу Казахстана Алену Рыбакіну. Такім чынам, Арына Сабаленка паўтарыла дасягненне Вікторыі Азаранка, якая таксама два гады запар станавілася чэмпіёнкай Australіan Open — у 2012 і 2013 гадах.

Уладзімір ВЯРЭНІЧ

Фота НАК Беларусі

Выбар рэдакцыі

Грамадства

У чым пайсці на выпускны баль?

У чым пайсці на выпускны баль?

 Паглядзім, што раяць стылісты і што рэальна набыць у нашых шыротах, пажадана не ўганяючы бацькоў у даўгі.

Калейдаскоп

Усходні гараскоп на наступны тыдзень

Усходні гараскоп на наступны тыдзень

Для Цяльцоў гэты тыдзень будзе напоўнены справамі і клопатамі, звязанымі са сваякамі ці дзецьмі. 

Спорт

Які наш спорт сёння?

Які наш спорт сёння?

«З кожным днём сітуацыя ў свеце мяняецца так, што ў вялікай ступені гэта закранае і спорт».