Вы тут

Газеце «Звязда» спаўняецца 105 гадоў


 Газета «Звязда» адзначае сёння 105-годдзе. Першы нумар газеты выйшаў 9 жніўня 1917 года. У 1917 годзе частка нумароў выйшла пад загалоўкамі «Молот» і «Буревестник».


Газета «Звязда» з’яўляецца старэйшым грамадска-палітычным выданнем Беларусі, ёй належыць асаблівая роля ў станаўленні і развіцці айчынных друкаваных сродкаў масавай інфармацыі. На старонках «Звязды» друкаваліся самыя вядомыя беларускія пісьменнікі, такія як Кузьма Чорны, Кандрат Крапіва, Паўлюк Трус, Андрэй Макаёнак, Іван Чыгрынаў. Таксама ў газеце ў розныя гады працавалі і друкаваліся вядомыя дзяржаўныя і грамадскія дзеячы. Унікальная «Звязда» і тым, што яна адна з першых асвятляла самыя значныя гістарычныя падзеі Беларусі, газета стала сапраўдным летапісам жыцця беларускага грамадства.

У Нацыянальнай бібліятэцы Беларусі захоўваюцца арыгіналы газеты «Звязда» з 1919 года і да гэтага часу.

У час акупацыі Беларусі германскімі войскамі з 1918 года газета выдавалася ў Смаленску, а затым зноў у Мінску. У пачатку Вялікай Айчыннай вайны ў выніку акупацыі Мінска яна выдавалася ў Магілёве і Гомелі. З 1944 года «Звязда» зноў стала выдавацца ў Мінску.

У Беларусі былі ўстаноўлены чатыры помнікі падпольшчыкам, якія працавалі над выпускам «Звязды». Мінскія вуліцы названы імёнамі рэдактара падпольнай «Звязды» Героя Савецкага Саюза Уладзіміра Амельянюка і супрацоўніка даваеннай пары Аляксандра Русановіча. Да 60-годдзя перамогі ў Вялікай Айчыннай вайне ў Мінску з’явіўся праспект газеты «Звязда». Газета ўзнагароджана ордэнамі Айчыннай вайны і Працоўнага Чырвонага Сцяга.

Газета «Звязда» — адзінае штодзённае дзяржаўнае выданне на беларускай мове, заснавальнікамі якога з’яўляюцца Савет Рэспублікі і Палата прадстаўнікоў Нацыянальнага сходу, Савет Міністраў.

Сёння газета «Звязда» — шматграннае выданне са сваім адметным, непаўторным стылем, яно паспяхова спалучае традыцыі і сучасныя інфармацыйныя тэхналогіі. За больш чым стагадовую гісторыю газета, па сутнасці, ніколі не мяняла сваіх прыярытэтаў, якімі і сёння застаюцца ўсебаковае асвятленне дзяржаўнай палітыкі, дзейнасці кіраўніцтва краіны, органаў дзяржкіравання (у першую чаргу сацыяльнага блока: працы і сацабароны, культуры, адукацыі, аховы здароўя). Таксама адным з асноўных прыярытэтаў у публікацыях і дзейнасці рэдакцыі «Звязды» з’яўляецца захаванне культуры і чысціні беларускай мовы, выхаванне пачуцця гордасці за свой народ, за сваю Радзіму, за яе багатую гісторыю.

Выдавецкі дом «Звязда» быў створаны восенню 2012 года шляхам аб’яднання рэдакцыйна-выдавецкай установы «Литература и искусство» і рэдакцыі газеты «Звязда». Акрамя кнігавыдавецкага блока і штодзённай беларускамоўнай газеты «Звязда», у яго ўвайшлі літаратурна-мастацкія выданні: газета «ЛіМ», часопісы «Полымя», «Нёман», «Маладосць», «Вожык». Усе названыя перыядычныя выданні — з уласнай вялікай творчай гісторыяй, са значным аўтарытэтам у асяроддзі творчай інтэлігенцыі, што дало магчымасць стварыць на базе новай установы цэнтр развіцця і актыўнага прымянення сучаснай беларускай мовы, пляцоўку для творчасці і дыялогу аб нацыянальных каштоўнасцях.

За мінулы з моманту стварэння выдавецкага дома «Звязда» час пашырылася праблемна-тэматычнае поле выданняў — да холдынга далучыліся часопісы «Алеся» (часопіс для жанчын) і «Родная прырода» (навукова-папулярны экалагічны часопіс), а таксама выданні для беларусаў замежжа — газета «Голас Радзімы» і часопіс «Беларусь» (выдаецца на трох мовах: беларускай, англійскай і кітайскай).

Прэв’ю: БелТА

Выбар рэдакцыі

Грамадства

Што агульнага ў космасу з патэльняй? ​У сям’і Якубоўскіх з Жодзіна з фізікай сябруюць усе

Што агульнага ў космасу з патэльняй? ​У сям’і Якубоўскіх з Жодзіна з фізікай сябруюць усе

Як сямейная пара настаўнікаў фізікі робіць складанае простым.

Калейдаскоп

Усходні гараскоп на наступны тыдзень

Усходні гараскоп на наступны тыдзень

АВЕН. У аўторак падзеі будуць развівацца спрыяльна для вас, нечакана могуць узнікнуць новыя перспектывы для кар'еры. 

Калейдаскоп

5 важных рэчаў, якім бацькі абавязаны навучыць сваіх дзяцей

5 важных рэчаў, якім бацькі абавязаны навучыць сваіх дзяцей

Быць бацькамі — вялікая адказнасць. Кожны з нас хоча выхаваць дзіця ўпэўненым, добрым і шчырым. І самае галоўнае — шчаслівым.