Вы тут

Лукашэнка: Задача нумар адзін — спрацаваць не горш за мінулы год


Прэзідэнт Беларусі Аляксандр Лукашэнка прыняў удзел у пасяджэнні Савета Міністраў. На парадку дня — пытанні функцыянавання эканомікі ва ўмовах санкцый і меры па іх пераадоленні.


Адкрываючы пасяджэнне, кіраўнік дзяржавы падкрэсліў, што, згодна з Канстытуцыяй, Прэзідэнт мае права склікаць урад і старшынстваваць на яго пасяджэнні. Па яго словах, гэта сур’ёзнае мерапрыемства, але не надзвычайнае, а прамежкавае. «Вельмі ўсё будзе сур’ёзна па выніках года. Хацелася, каб па выніках года ў нас была добрая размова, мы паціскалі адзін аднаму руку і радаваліся таму, што адносна невялікая краіна па сусветных маштабах, сярэднееўрапейскага памеру вытрымала беспрэцэдэнтны, жудасны, нічым не абгрунтаваны ціск. Задачы ўсім зразумелыя», — сказаў Прэзідэнт.

Аляксандр Лукашэнка падкрэсліў, што добра ведае сітуацыю, бывае на месцах, размаўляе з людзьмі і мае інфармацыю з дзясятка крыніц мінімум, акрамя сродкаў масавай інфармацыі. «Разумею, у якой сітуацыі мы знаходзімся. Таму задача была даведзена і прэм’ер-міністру, і ўраду — мы не павінны спрацаваць горш, чым у мінулым годзе. Я заўсёды стаўлю пад сумненне, а ці зможам мы спрацаваць на ўзроўні мінулага года, усё ж санкцыі беспрэцэдэнтныя. Бываючы на ??месцах і вывучаючы тыя ці іншыя праблемы, я пераканаўся: мы можам гэта зрабіць і з невялікім напружаннем. Той, хто напружваецца, той і працуе нядрэнна. А той, хто апусціў рукі, думаючы, што само сабой рассмокчацца, прабачаць — так не будзе. Празмернае напружанне, пошук новых лагістычных ланцужкоў, новых спажыўцоў нашых тавараў і гэтак далей і да таго падобнае — пытанне нумар адзін», — заявіў Прэзідэнт.

Кіраўнік дзяржавы падкрэсліў, што ў Беларусі дастаткова міністраў ва ўрадзе, адносна невялікія аб’ёмы і нагрузкі ў параўнанні з іншымі дзяржавамі. Таму, па яго словах, кожны міністр павінен адказваць за свой участак. Прэзідэнт яшчэ раз зрабіў акцэнт на тым, што задача нумар адзін — спрацаваць не горш за мінулы год. Памерці, але вытрымаць.

«Калі мы не хочам ваяваць (у кожнага ёсць дзеці), калі вы не хочаце, каб нашы дзеці са стрэльбай адстойвалі свой суверэнітэт і незалежнасць, мы павінны мець моцную эканоміку. Гэта стабільнасць у нашым грамадстве. Калі вы хочаце паваяваць — калі ласка, гэта вельмі хутка ўсё прыходзіць. Усё пачынаецца з зямлі, з малога, з канфліктаў. Хтосьці бяднейшы, хтосьці багацейшы. Адзін на аднаго коса паглядзелі, пачалі зайздросціць адзін аднаму, як мы ўмеем добра гэта рабіць, потым твар набілі, потым узяліся на стрэльбу ці вінтоўку і сталі адзін на аднаго каціць. Вопыт ёсць — 2020 год, гэта быў мініканфлікт. А потым нам „дапамогуць“, нас хутка падпаляць, і будзе горш, чым ва Украіне. Я гэта нутром адчуваю, калі вы гэта не адчулі, паверце мне чарговы раз», — сказаў Аляксандр Лукашэнка. Ён звярнуў увагу, што абстаноўка і сітуацыя вельмі сур’ёзныя.

«Накормленыя, напоеныя, апранутыя — усё пакуль ёсць, але гэта ўпадзе ў адно імгненне, калі мы расслабімся. І тады нас паспрабуюць узяць цёпленькімі, як у 2020-м, але, я думаю, памылкі яны не дапусцяць. Не паспеем азірнуцца.. Я зыходжу з гэтага: эканоміка нумар адзін. Будзе эканоміка — усё ў нас атрымаецца», — канстатаваў Прэзідэнт.

Захоўваецца інвестыцыйны імідж краіны

З дакладам аб процідзеянні санкцыям выступіў прэм’ер-міністр Раман Галоўчанка. Ён канстатаваў, што знешнія ўмовы для работы эканомікі істотна пагоршыліся, бо ўведзеныя санкцыі датычацца ўсіх этапаў экспарту: ад дастаўкі тавару да атрымання выручкі. Раман Галоўчанка падкрэсліў, што для таго, каб замясціць прыбыткі, якія выпалі з-за санкцый, прыняты комплекс мер для нарошчвання вытворчасці і экспарту ў іншых галінах. Дадатковая вытворчасць канкрэтных тавараў дасць прырост валавога выпуску і забяспечыць дадатковае паступленне выручкі. Нягледзячы на санкцыі, экспарт тавараў штомесяц расце і ў чэрвені практычна дасягнуў узроўню мінулага года, а ў Расію — дасягнуў гістарычнага максімуму $2 млрд за месяц. «Эканоміка сціснулася, але, на наш погляд, дэманструе гістарычна высокія якасныя паказчыкі збалансаванасці. Гэта падкрэслівае высокую адаптыўнасць эканомікі да знешніх шокаў і адэкватнасць і дзейснасць мер, што прымаюцца», — заявіў Раман Галоўчанка. Так, валавы знешні доўг знаходзіцца на мінімуме за апошнія 7 гадоў, зніжаецца пазыковая нагрузка прадпрыемстваў, суадносіны доўгу да выручкі крыху больш за 50 %, што стала найлепшым паказчыкам за апошнія 6 гадоў. Доля стратных арганізацый скарацілася ў 1,5 раза, рэнтабельнасць продажаў склалася на ўзроўні 8,1 працэнта і знаходзіцца на максімуме за 10 гадоў. Прамыя замежныя інвестыцыі на чыстай аснове за першы квартал склалі $1,8 млрд — максімум за ўвесь перыяд назіранняў. «Гэта пацвярджае, што, нягледзячы на ??знешні ціск, захоўваецца інвестыцыйны імідж краіны, які адлюстроўвае яе надзейнасць, і актыўная работа па рэінвеставанні сродкаў у эканоміку замежнымі кампаніямі», — адзначыў прэм’ер-міністр.

Безумоўным прыярытэтам для работы ўрада прэм’ер-міністр назваў павышэнне якасці жыцця і дабрабыту грамадзян. Ён расказаў пра меры, якія прыняты для павышэння росту даходаў насельніцтва. У бюджэтнай сферы гэта павышэнне базавай стаўкі, рост мінімальнай заработнай платы на 14 працэнтаў з пачатку года з наступнай індэксацыяй. З 1 сакавіка працоўныя пенсіі выраслі на 7 %, з 1 жніўня — на 10 %.

Ва ўрадзе бачаць тры асноўныя фактары аднаўлення эканамічнага росту: экспарт, інвестыцыі і спажыванне. Раман Галоўчанка падкрэсліў, што неабходна стымуляваць унутранае спажыванне. З улікам залішняй ліквіднасці, якая ўтварылася ў банкаўскай сістэме, урад мае намер устанавіць для дзяржаўных банкаў павышаныя заданні па росце крэдытавання для спажывецкіх, інвестыцыйных мэт і дзейнасці прадпрыемстваў. «Лічу, што час падысці да ўстанаўлення працэнтных ставак у эканоміцы на эфектыўным узроўні. Шокавы стан ужо прайшоў, і высокія працэнтныя стаўкі сваю ролю адыгралі. Высокія стаўкі, як мы ўсе цудоўна разумеем, не могуць з’яўляцца элементам доўгатэрміновай грашова-крэдытнай палітыкі. Пры гэтым паводзіны фізічных асоб змяніліся. На працягу першага паўгоддзя насельніцтва з’яўляецца ўстойлівым прадаўцом валюты. Больш за тое, насельніцтва стала больш зберагаць. З пачатку года тэрміновыя рублёвыя дэпазіты насельніцтва выраслі больш як на 10 працэнтаў», — падкрэсліў Раман Галоўчанка. Кіраўнік урада звярнуў увагу і на праблему росту цэн. Па яго словах, энергетычны і харчовы крызісы прывялі да росту інфляцыі ў шэрагу краін і могуць прывесці да рэцэсіі найбуйнейшых эканомік свету, падзення даходаў насельніцтва і росту беднасці. У Беларусі рост цэн некрытычны і актыўнасць на спажывецкім рынку істотна не змянілася. «Інфляцыйныя працэсы ўдалося стрымаць у разумным калідоры перш за ўсё за кошт жорсткага адміністрацыйнага кіравання, і мы бачым запаволенне тэмпаў інфляцыі», — канстатаваў Раман Галоўчанка.

Асобна Прэзідэнт спыніўся на супрацоўніцтве з заходнімі краінамі. Ён лічыць неабходным нават ва ўмовах санкцый не скідаць з рахункаў рынак Еўрасаюза і працаваць з адпаведнымі краінамі па папулярызацыі айчынных тавараў. Няправільнай ён назваў рыторыку аб тым, што замест недружалюбных краін Беларусь будзе працаваць выключна з дружалюбнымі. «Нам ні ў якім разе нельга сыходзіць з Еўрасаюза. Гэта наш найбліжэйшы сусед. Мы палову там, па-мойму, працавалі па экспарце. З імі трэба працаваць. Шаленства палітыкаў ужо ідзе на задні план. Бізнес ёсць бізнес», — заявіў ён.

Прэзідэнт прывёў у прыклад высокі попыт у свеце на мінеральныя ўгнаенні і нафтапрадукты, якія вырабляе Беларусь. Па яго словах, цікавасць да пакупкі нашых тавараў ёсць і ў партнёраў у Еўрасаюзе. «Можа быць, мы недастаткова актыўныя ў прасоўванні сваёй прадукцыі ў гэтых умовах на тыя рынкі. Калі яны маюць патрэбу ў нашых таварах, то таксама шукаюць шляхі, каб купіць іх. Таму ні ў якім разе нельга адкідаць іх і нават у пэўнай рыторыцы, тэрміналогіі нельга гэта выключаць. Наадварот, туды трэба ісці, ствараючы новыя ланцужкі для таго, каб гандляваць», — заявіў беларускі лідар.

Трэба займацца экспартам!

Асаблівую ўвагу кіраўнік дзяржавы надаў кадрам. Ён расказаў, што кіраўніку Адміністрацыі Прэзідэнта даручана да канца года далажыць па кадравым рэестры цалкам. «Не таму, што вы такія дрэнныя. Калі нехта не цягне ці не хоча, хлопцы, трэба будзе сыходзіць. Таму трэба варушыцца. Моцна трэба варушыцца. Выкарыстоўваць усё. Палякі, іншыя ўносяць нам ужо прапановы: „Давайце размаўляць“. Добра, давайце. Але пакуль у МЗС яшчэ ў нас так — з нагі на нагу пераступаюць. Яны лічаць: мы расказалі, як нам цяжка і якія несправядлівыя санкцыі — і на гэтым усё, больш нічога не трэба рабіць», — сказаў Аляксандр Лукашэнка.

У сувязі з гэтым Прэзідэнт запатрабаваў ад дыпламатаў у першую чаргу займацца пытаннямі гандлю, а не абмяжоўвацца толькі заявамі аб тым, наколькі несправядлівыя санкцыі. «Раман Аляксандравіч, вы былы дыпламат, я вам даручаў у гэтым годзе сустрэцца з пасламі і катэгарычна ад іх запатрабаваць выніку. Нічога не трэба больш, на прыёмы хадзіць. Займіцеся толькі экспартам» , — сказаў Аляксандр Лукашэнка. Ён адзначыў, што ў Расіі новы пасол. Нядаўна Прэзідэнт сустракаўся з паслом Беларусі ў Кітаі. «У нас маса праблем, якія мы можам развязаць, і мы павінны іх вырашыць. Але пакуль мы працуем у нейкіх такіх расслабленых умовах», — канстатаваў кіраўнік дзяржавы.

Трэба сыходзіць у раённыя цэнтры

З дакладам выступіў старшыня Камітэта дзяржкантролю Васіль Герасімаў. У прыватнасці, ён расказаў, што далёка не ва ўсіх раёнах мясцовыя кіраўнікі выступілі з прапановай стварэння экспартна арыентаваных, інавацыйных невялікіх вытворчасцяў. Раман Галоўчанка пацвердзіў, што такая праблема існуе. Ён звярнуў увагу, што не ва ўсіх кіраўнікоў прысутнічае стратэгічнае бачанне развіцця свайго рэгіёна. Многія кіраўнікі проста займаюцца паўсядзённым рэчамі. У гэтым плане ўрад гатовы падключыцца і прапанаваць праекты. Раёны краіны ўжо ўмоўна падзялілі на тры групы — прамысловыя, аграрна-прамысловыя і аграрныя, прааналізавалі на ўзроўні Мінэканомікі канкрэтныя перавагі кожнага рэгіёна, запасы сыравіны, наяўнасць рабочай сілы. «Ужо робім карту індустрыялізацыі. Гэтыя праекты будзем „насаджаць“ рэгіёнам. Я іншага шляху не бачу», — сказаў кіраўнік урада.

У сувязі з гэтым Аляксандр Лукашэнка папярэдзіў губернатараў, што гэтае палітычнае рашэнне павінна няўхільна выконвацца. «Прыгожа сказана: „Будзем, будзем...“ Але калі хтосьці з губернатараў думае, што я пажартаваў, вы памыляецеся. Вы не разумееце: гэта — палітычнае рашэнне Прэзідэнта», — сказаў ён.

Аляксандр Лукашэнка звярнуў увагу, што невялікія населеныя пункты — гэта не Мінск, людзі там небагатыя і ім трэба даць добрыя працоўныя месцы. «Там кожнага беспрацоўнага відаць. Трэба ціснуць, каб усе працавалі. Але трэба прапанаваць працоўнае месца. І, самае галоўнае, чаму палітычнае рашэнне, — разгрупаванне працоўнай сілы. Прынамсі, каб не было прытоку з рэгіёнаў у Мінск. Вы ж задыхняцеся хутка ў гэтым Мінску», — адзначыў кіраўнік дзяржавы. Ён нагадаў, што з мэтай не сцягваць людзей з усёй краіны ў сталіцу прымаўся шэраг рашэнняў, рэалізоўвалася праграма па развіцці гарадоў-спадарожнікаў. «Туды трэба сыходзіць — у гэтыя гарады, раённыя цэнтры. Там трэба ствараць нармальнае жыццё. Гэта значыць, разгрупаваць людзей. Тамму, думаючы, што ж прапанаваць, я ішоў ад зямлі. Вось кожны старшыня райвыканкама няхай падумае», — сказаў кіраўнік дзяржавы. Гэтая ж тэма ўздымалася і падчас нядаўняй паездкі Прэзідэнта ў Мёрскі раён. Тады абмяркоўвалася, што ў кожным раёне ў залежнасці ад наяўнасці працоўных рэсурсаў трэба ствараць невялікія прадпрыемствы. «Каб там людзі маглі жыць і працаваць. Гэта даручэнне, якое не раптам нарадзілася. І губернатары мяне не чуюць. Глядзіце, з агнём, хлопцы, гуляеце, вы не абароніцеся», — папярэдзіў Аляксандр Лукашэнка.

Прэзідэнт зрабіў акцэнт на тым, што агульная карціна заўсёды складаецца з дробязяў і для дасягнення выніку неабходна ўсяму ўдзяляць увагу. Асабліва — падтрыманню парадку. «Будзе вельмі сумна, калі па выніках года нехта недзе нечага недацягне. Гэта датычыцца ўсіх», — дадаў ён.

Не трэба працаваць дзеля вынікаў

На пасяджэнні з дакладам выступіла старшыня Нацыянальнага статыстычнага камітэта Іна Мядзведзева. Яна далажыла, што скарачэнне вытворчасці прамысловай прадукцыі ў параўнанні са студзенем — чэрвенем 2021 года назіраецца ў 9 з 13 галін апрацоўчай прамысловасці. Прычым значнае падзенне прамысловасці — не заўсёды вынік санкцыйных абмежаванняў.

Пра сітуацыю ў прамысловасці асобна далажыў міністр прамысловасці Пётр Пархомчык. «Сур’ёзных прэтэнзій да работы прамысловасці не было. Мы практычна выканалі ўсе даведзеныя паказчыкі па выніках работы за шэсць месяцаў. І ўжо дакладна відаць, што станоўчая дынаміка па росце аб’ёмаў вытворчасці, росце экспарту захоўваецца і па выніках сямі месяцаў. З упэўненасцю можна сказаць, што мы захаваем гэтыя тэмпы на ўзроўні дзевяці месяцаў. Хоць цяжкасцяў дастаткова, але гэта вырашальныя пытанні», — сказаў міністр. Ён падкрэсліў, што Прэзідэнт вельмі жорстка паставіў пытанне імпартазамяшчэння. У рамках супрацоўніцтва з Расійскай Федэрацыяй назіраецца рэалізацыя 14 інвестыцыйных праграм, прытым яны датычацца ў асноўным прамысловых прадпрыемстваў Мінпрама.

«Усё павінна быць разумна. Я разумею так па-гаспадарску: калі ты можаш прадаць сёння тысячу БелАЗаў, ты іх вырабі. Але калі ты можаш прадаць 1500 і на гэтым грошы зарабіць — ты іх вырабі. Трэба працаваць не дзеля паказчыкаў», — сказаў Аляксандр Лукашэнка. Ён акцэнтаваў увагу на тым, што не павінна быць работы толькі дзеля паказчыкаў.

«Я так зразумеў, што ў канцы года ў нас непрыемных размоў па прамысловасці быць не павінна», — заўважыў кіраўнік дзяржавы.

«Выканаем на 110 працэнтаў», — запэўніў Пётр Пархомчык.

Для сельскай гаспадаркі санкцыі — гэта добра

Прэзідэнт паведаміў, што другі год запар у сельскай гаспадарцы не ўдаецца пераламіць адмоўную дынаміку вытворчасці. «Вось што недапушчальна (падзенне вытворчасці. — Удакл.), дык гэта сельская гаспадарка, — падкрэсліў кіраўнік дзяржавы. — Не ў плане ўвагі, якая ёй аказваецца, а ў плане таго, што санкцыі іх (аграрыеў. — Удакл.) практычна не закранулі. Санкцыі ім на карысць — вязі і прадавай. Асабліва ў Расіі. І самы маржынальны рынак сёння — расійскі». Пры гэтым кіраўнік дзяржавы папрасіў не страціць кітайскі рынак і рэзюмаваў, што для сельскай гаспадаркі санкцыі — гэта добра.

Па словах Аляксандра Лукашэнкі, Бог падарыў нам цудоўны ўраджай па ўсіх відах культур, таму на сельскую гаспадарку ўскладзены вялікія надзеі. Міністр сельскай гаспадаркі і харчавання Ігар Брыло расказаў, што па выніках года стаіць задача — дасягнуць 7,8 млрд долараў экспарту, такім чынам прыбавіўшы да ўзроўню мінулага года 1,1 млрд долараў. Акрамя таго, кіраўнік ведамства дадаў, што сёння на складах практычна няма ніякіх запасаў, а экспарт толькі расце. Кажучы пра ўнутраны рынак, ён паведаміў, што да кожнай вобласці даведзены аб’ёмы, узгоднены пастаўкі — адным словам, сітуацыя трымаецца на кантролі.

Адказваючы на пытанне Прэзідэнта, ці ёсць на рынку дэфіцыт у пэўных таварах, Ігар Брыло абазначыў праблему са знікненнем такога віду ўпакоўкі, як тэтрапак, — такім чынам, складваецца ўражанне, што малака на магазінных паліцах стала менш. У сувязі з гэтым Аляксандр Лукашэнка заўважыў, што людзі не ядуць тэтрапак, галоўнае — тое, што ўнутры. Аднак, па словах беларускага лідара, насельніцтву ўсё ж патрэбна патлумачыць, што ў нас з тэтрапакам праблема, і парэкамендаваць людзям купляць той жа прадукт, але, напрыклад, у пакетах. Міністр паабяцаў зрабіць усё магчымае, каб не страціць аб’ём малака ў гандлёвых сетках.

Нельга расслабляцца

Прэзідэнт паставіў задачу паскорыць рэалізацыю планаў па імпартазамяшчэнні. Заўважыў пры гэтым, што гэта вельмі важнае пытанне. «Мы гаворым аб праграмным забеспячэнні на некаторае абсталяванне, што ёсць праблемы, — удакладніў ён. — У нас цэлы ІT-парк, нам прапаноўваюць шырэй задзейнічаць айцішнікаў з Парка высокіх тэхналогій». Пры гэтым кіраўнік дзяржавы звярнуў увагу на тое, што не трэба толькі на айцішнікаў арыентавацца: на прадпрыемствах ёсць добрыя ІT-кампаніі, якія ствараюць праграмны прадукт для таго ці іншага працэсу. Акадэмія навук — не выключэнне.

Яшчэ адна праблема, якую абазначыў Прэзідэнт, — трэба да мінімуму скараціць тэрміны разгляду заявак на крэдытаванне праектаў, фінансаванне з інавацыйных фондаў. Ён пагадзіўся, што, напэўна, не па прызначэнні гэта выкарыстоўваем, але горш, па яго словах, калі грошы будуць мёртвым грузам ляжаць, а мы іх нават у вытворчасці не выкарыстоўваем. «Вядома, разбазарваць не трэба, — заўважыў Аляксандр Лукашэнка. — Трэба ўвесці магчымасць банкам ажыццяўляць разлікі турэцкай лірай, у іншых альтэрнатыўных валютах. Трэба забяспечыць айчынныя прадпрыемствы дастатковай колькасцю кантэйнераў, вагонаў і чыгуначных платформ. І прыярытэт — экспарцёрам».

Таксама, па словах беларускага лідара, патрэбна прапрацаваць пытанне павелічэння тэрмінаў выканання вытворчых абавязацельстваў перад пакупніком, якія ўзніклі ў сувязі з прычынамі, што не залежаць ад вытворцы, і прывёў прыклад збою ў пастаўках запчастак і камплектуючых. Трэба ўдасканаліць механізм правядзення закупак у частцы павелічэння яго аператыўнасці ва ўмовах скарачэння прапаноў пастаўшчыкоў з-за нявызначанасці адносін з партнёрамі, перакананы Прэзідэнт.

Пастаўлена задача павялічыць будаўніцтва арэнднага жылля. «Пры гэтым нельга фінансаваць усіх агулам, — заўважыў Аляксандр Лукашэнка. — Святая справа — фінансаваць жыллё ваенным. Яны не павінны зарабляць дзесьці грошы». Таксама Прэзідэнт звярнуў увагу на тое, што трэба дапамагаць шматдзетным. Пры гэтым важна размеркаваць гэтыя інвестыцыі там, дзе патрэбна, па ўсёй краіне. «І не трэба гэтыя бедныя рэсурсы, льготныя, раздаваць усім, хто нават мае жыллё і можа яго пабудаваць, — удакладніў кіраўнік дзяржавы. — Трэба яшчэ раз сканцэнтравацца на льготным крэдытаванні з падтрымкай сем’яў дзяржслужачых, ваенных». Безумоўна, не застануцца без дзяржаўнай увагі і шматдзетныя сем’і. Па словах Прэзідэнта, настаў момант, каб пераарыентавацца і заняцца нармальным будаўніцтвам жылля ў краіне.

Ураду, аблвыканкамам і Мінгарвыканкаму сумесна з Нацыянальным банкам даручана разгледзець прапановы аб тых рэгіянальных групах, аб якіх гаварылася, і прыняць рашэнні па іх рэалізацыі. «Патрэбна забяспечыць па выніках 2022 года тэмпы валавага рэгіянальнага прадукту ў кожнай з абласцей ВУП не ніжэйшым за ўзровень мінулага года — гэта галоўнае», — падкрэсліў Аляксандр Лукашэнка і паставіў задачу папоўніць упушчаную выгаду ад страт у студзені — маі 2022 года экспартнай выручкі на суму прыкладна ў 7 млрд долараў за кошт пераарыентацыі экспарту і актывізацыі супрацоўніцтва з недружалюбнымі краінамі. «Нічога не трэба адкідваць, з усімі краінамі патрэбна весці дыялог, — канстатаваў беларускі лідар. — Санкцыі рана ці позна сыдуць, і гэтыя дзікія адносіны, якія ў нас існуюць з Захадам, таксама сыдуць у нябыт. Нельга губляць гэтыя рынкі, бо потым будзем гераічна на іх вяртацца».

Таксама пастаўлена задача забяспечыць стапрацэнтнае асваенне грашовых сродкаў для аказання падтрымкі малога, сярэдняга прадпрымальніцтва, льготнага крэдытавання жылля, а таксама крэдытавання арганізацый з улікам 93-га Указа. Даручана аднавіць аб’ёмы інвестыцый у асноўны капітал, у тым ліку за кошт падваення тэмпаў меліярацыі, нарасціць аб’ёмы жывёлагадоўлі і раслінаводства з выхадам у бягучым годзе прыкладна на 105 % і не дапусціць зніжэння аб’ёмаў прамысловай вытворчасці не ніжэй за ўзровень мінулага года.

Аб праблемных пытаннях у эканоміцы профільнымі міністрамі Прэзідэнту было даложана максімальна канкрэтна. Аднак мала канстатаваць факт — шляхі вырашэння ёсць і над гэтым пачалі працаваць яшчэ ўчора. У выніку размову аб праблемах эканомікі ў перыяд санкцыйнага перыяду сам Прэзідэнт назваў «мазгавой атакай». Па словах кіраўніка дзяржавы, гэта была прамежкавая размова. Вялікая і галоўная размова з урадам наперадзе — яна адбудзецца па выніках года.

Напрыканцы пасяджэння кіраўнік дзяржавы паўтарыў тое, што казаў падчас Дня Незалежнасці, звяртаючыся да беларусаў: «У кожнага — зона адказнасці. Вырашыце кожны свае праблемы. Яны ёсць усюды». Пры гэтым беларускі лідар парэкамендаваў прадстаўнікам малога, сярэдняга бізнесу асабліва не разлічваць на падтрымку. У прыярытэце дзяржаўнай падтрымкі — працоўныя калектывы. «Задача — не забыць сённяшнюю размову, — акцэнтаваў увагу Аляксандр Лукашэнка. — Нам ні ў якім разе нельга давесці краіну да бездані. Не забывайце ўрокі 2020 года і не расслабляйцеся!»

У тэму

Па выніках пасяджэння Савета Міністраў аб функцыянаванні эканомікі ва ўмовах санкцый і мерах па іх пераадоленні міністр сельскай гаспадаркі і харчавання Ігар БРЫЛО расказаў, што сёлета плануецца атрымаць звыш 120 % збожжа і больш як 130 % цукровых буракоў. «У раёне 102,5 % выйдзем па вытворчасці малака, да 102 % падцягнем вытворчасць мяса і ў цэлым па краіне мы павінны выйсці на гэтую лічбу, — удакладніў кіраўнік ведамства. — Гэтая задача ставілася ўрадам яшчэ ў пачатку года. З улікам перасоўвання тэрмінаў пачатку ўборкі і збожжавах, нарыхтоўкі кармоў у наступным месяцы мы плануем выйсці ў раёне 101 %».

Ігар Брыло заўважыў, што пакуль мы крыху залежныя ад паставак імпартнага насення ў нашу краіну, але кожны год айчынная насенняводчая галіна дае свой вынік. «Павялічваем вытворчасць уласнага насення, каб у найбліжэйшыя некалькі гадоў цалкам мінімізаваць імпарт насення з іншых краін», — канкрэтызаваў міністр.

Пракаментаваўшы знікненне ў крамах малака ў тэтра-ўпакоўцы, Ігар Брыло заўважыў, што гэта была імпартазамяшчальная пазіцыя. «Вытворчасць малака ў нас не зменшылася ў краіне, — акцэнтаваў увагу ён. — Вядома, людзі прызвычаіліся да тэтрапакавай упакоўкі, і таму пераход на звычайныя бутэлькі, на пакетаванае малако ў кагосьці выклікае пэўны дысбаланс. Хачу заверыць, што мы прыкладзём усе намаганні, каб аб'ём натуральнамалочнай прадукцыі ў нашых крамах быў дастаткова шырокі. Паралельна працуем з тэтрапакам. Ужо ёсць першыя пастаўкі з Кітайскай Народнай Рэспублікі. Яны яшчэ не настолькі аб'ёмныя, але, тым не менш, першыя крокі зроблены».

Вераніка КАНЮТА

Валерыя СЦЯЦКО

Фота БелТА

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

АВЕН. У аўторак падзеі будуць развівацца спрыяльна для вас, нечакана могуць узнікнуць новыя перспектывы для кар'еры. 

Калейдаскоп

5 важных рэчаў, якім бацькі абавязаны навучыць сваіх дзяцей

5 важных рэчаў, якім бацькі абавязаны навучыць сваіх дзяцей

Быць бацькамі — вялікая адказнасць. Кожны з нас хоча выхаваць дзіця ўпэўненым, добрым і шчырым. І самае галоўнае — шчаслівым.