Вы тут

Што вядома пра новую тэнісную зорку — Крысціну Дзмітрук


У беларускім жаночым тэнісе — чарговая перамога. Крысціна Дзмітрук заваявала тытул у адзіночным разрадзе на турніры серыі ITF Women’s World Tennis Tour з прызавым фондам $25 000 у Іспаніі. Для 18-гадовай спартсменкі гэта трэці адзіночны тытул у кар’еры і першы тытул на турнір з прызавым фондам $25 000. Гэтая тэнісістка збіраецца і далей здзіўляць тэнісных аматараў. Расказваем, што вядома пра ўзыходзячую зорку тэніса.


З 2018 па 2020 гады Крысціна заваявала пяць юніёрскіх тытулаў. Падчас свайго выступлення на юніёрскім узроўні яна ўваходзіла ў топ-10 сусветнага юніёрскага рэйтынгу. «Я добра разумею, што на дарослым узроўні яшчэ больш моцных і таленавітых тэнісістак. Аднак мне цікава „заходзіць“ у дарослы тэніс. Гэта як выклік самой сабе. Гэта цяжка, але цікава. Цяжкасці не даюць мне расслабіцца». — расказвала Крысціна год таму ў інтэрв’ю «Звяздзе».

Тэнісістцы аднолькава цікавы і парны, і адзіночны разрад. Сярод яе адзіночных тытулаў пачэснае месца займае перамога ў парным разрадзе юніёрскага турніра Уімблдона. Тытул яна заваявала разам з расіянкай Дзіянай Шнайдэр. У 2019 годзе ў яе быў тытул у пары на турніры ў Турцыі. Крысціна ўпэўнена, што з парнай гульні можна многае пераняць для адзіночнай — злёт, прыём, касыя.

У арсенале Крысціны Дзмітрук — матч супраць першай ракеткі Беларусі Арыны Сабаленкі. Праўда, Крысціна яго прайграла. «Чаго хаваць — хвалявалася, нават па гульні гэта было відаць. Але я перажывала не за тое, як пройдзе матч, свае шанцы я разумела, а перажывала за тое, як пакажу сябе ў гэтым матчы», — успамінала Крысціна. Ну затое які вопыт.

Свой стыль гульні Крысціна называе разнастайным. «Трэба адразу паказаць, што ты мацнейшы і вышэйшы, прымусіць саперніцу нервавацца. Я пачынаю з неагрэсіўнага тэніса, а першыя 2-3 геймы гляджу, што саперніца робіць, як яна гуляе справа, што робіць з прыёму, як падае. А потым, калі разумею стыль гульні, то ўжо выбіраю тактыку і стыль сваёй гульні на гэты матч». — расказвала Крысціна. Тэнісістка адзначала, што можа гуляць і ў абароне, і ў атацы, увесь матч мяняючы сваю гульню.

Куміраў у маладой тэнісісткі няма. Ад кожнага топавага спартсмена яна стараецца браць нешта сваё. Напрыклад, паводзіны на корце і характар — ад Вікторыі Азаранкі, пластычнасць — ад Гаэля Манфіса.

Валерыя СЦЯЦКО

Фота Беларуская тэнісная федэрацыя

Выбар рэдакцыі

Грамадства

Захаваць. Нельга знесці

Захаваць. Нельга знесці

Знакі прыпынку нарэшце расстаўлены.

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.