Макей не бачыць асаблівага сэнсу ў размяшчэнні расійскіх ваенных баз на тэрыторыі Беларусі

Міністр замежных спраў Беларусі Уладзімір Макей не бачыць асаблівага сэнсу ў размяшчэнні замежных ваенных баз, уключаючы расійскія, на тэрыторыі Беларусі. Аб гэтым ён заявіў у інтэрв’ю «РІА Навіны» на палях сесіі Генеральнай асамблеі ААН у Нью-Ёрку, паведамляе БелТА са спасылкай на МЗС Беларусі.

Міністр адзначыў, што Прэзідэнт Беларусі як адказны палітык, які разумее, што ад яго рашэнняў залежыць лёс дзяржавы, удзяляе вялікую ўвагу ўмацаванню абараназдольнасці Беларусі і ставіць канкрэтныя задачы Міністэрству абароны, дзяржаўнаму сакратарыяту Савета бяспекі па павышэнні боегатоўнасці Узброеных сіл, забеспячэнні належнага ўзроўню абараназдольнасці. «Гэта першая задача ў цяперашніх умовах. Таму што мы бачым, наколькі непрадказальныя сёння паводзіны нашых партнёраў», — сказаў кіраўнік МЗС.

Адказваючы на пытанне, ці актуальна размяшчэнне ў Беларусі расійскіх ваенных баз з улікам ваеннага нарошчвання НАТА на заходніх рубяжах, Уладзімір Макей сказаў: «Размовы гэтыя вядуцца ўжо даўно. Ніхто не ведае, што можа адбыцца, і нельга нічога выключаць у будучым з улікам непрадказальнасці развіцця сітуацыі, непрадказальнасці паводзін нашых партнёраў. Але на гэты момант з улікам таго высокага ўзроўню ваенных тэхналогій, які дасягнуты сёння, я думаю, што няма асаблівага сэнсу ў размяшчэнні дадатковых замежных, у гэтым выпадку расійскіх ваенных баз на тэрыторыі Беларусі».

«Дастаткова размясціць адпаведную тэхніку ў Смаленскай вобласці, недзе яшчэ, і гэта будзе, можа, нават больш эфектыўна выглядаць, чым размяшчэнне канкрэтных расійскіх баз у Беларусі», — лічыць Уладзімір Макей.

Ён нагадаў, што ў Беларусі з Расіяй створана сумесная групоўка войскаў, існуюць сумесныя трэніроўкі, планы па правядзенні сумесных вучэнняў. «І Прэзідэнт Расіі Пуцін адназначна заявіў у ходзе аднаго з мерапрыемстваў або нейкага інтэрв’ю, што калі нехта паспрабуе ўчыніць нейкія замахі супраць Беларусі, то мы будзем разглядаць гэта як нападзенне на Саюзную дзяржаву, чытай: нападзенне на Расійскую Федэрацыю», — сказаў кіраўнік беларускага МЗС.

Ён таксама адказаў на пытанне аб актуальнасці размяшчэння расійскай ядзернай зброі на тэрыторыі Беларусі. «Наконт гэтага нашы прэзідэнты таксама выказаліся некаторы час таму, і аб тым, што пэўныя тыпы самалётаў будуць мадэрнізаваны і аснашчаны ў тым ліку адпаведнымі сродкамі дастаўкі ядзернай зброі. Не выключаны і іншыя нейкія варыянты. Але, я так разумею, што ўсё будзе залежаць ад паводзін нашых партнёраў, ад тых непасрэдных пагроз для Беларусі і Расіі. І калі такія крокі з боку нашых заходніх партнёраў будуць зроблены, то мы, вядома ж, разам з Расіяй будзем выпрацоўваць адэкватныя меры рэагавання», — заявіў Уладзімір Макей.

«У тым ліку ў сэнсе размяшчэння нейкіх ядзерных узбраенняў?» — было зададзена журналістам удакладняльнае пытанне.

«Я не магу цяпер сказаць, не магу браць на сябе такую адказнасць. Але я ведаю, што гэтыя пытанні абмяркоўваліся нашымі кіраўнікамі і па лініі міністэрстваў абароны. І, думаю, што калі таго запатрабуе абстаноўка, то нашы краіны будуць гатовы пайсці на самыя рашучыя крокі, каб забяспечыць надзейную бяспеку для нашых краін, для нашых народаў», — адказаў міністр.

Прэв’ю МЗС Беларусі