Дэпутаты прынялі ў двух чытаннях законапраект аб бюджэце пазабюджэтнага фонду сацабароны насельніцтва

Дэпутаты на пасяджэнні дзявятай сесіі Палаты прадстаўнікоў Нацыянальнага сходу сёмага склікання прынялі ў двух чытаннях законапраект «Аб бюджэце дзяржаўнага пазабюджэтнага фонду сацыяльнай абароны насельніцтва Рэспублікі Беларусь на 2023 год», перадае БелТА.

Законапраект унесены ў Палату прадстаўнікоў Саветам Міністраў. Дакумент распрацаваны ў адпаведнасці з арт. 21 Бюджэтнага кодэкса і падрыхтаваны з улікам тэндэнцый выканання бюджэту дзяржаўнага пазабюджэтнага фонду сацыяльнай абароны насельніцтва бягучага года, а таксама на падставе прагнозных макраэканамічных паказчыкаў развіцця рэспублікі ў наступным годзе.

Законапраект вызначае крыніцы фарміравання даходаў бюджэту фонду, іх аб’ём і напрамкі выкарыстання сродкаў фонду, устанаўлівае парадак выканання бюджэту фонду. Даходы бюджэту фонду разлічаны ў суме Br25,2 млрд, або 116 працэнтаў да бюджэту фонду за 2022 год.

Як адзначыла міністр працы і сацыяльнай абароны Ірына Касцевіч, страхавыя ўзносы работадаўцаў і працуючых грамадзян складуць Br22,4 млрд, страхавыя ўзносы фізічных асоб, якія самастойна выплачваюць гэтыя ўзносы, — Br146 млн, узносы на прафесійнае пенсійнае страхаванне — Br278 млн. Непадатковыя даходы бюджэту фонду плануюцца на ўзроўні амаль Br504 млн. З іх найбольшая ўдзельная вага (63,3 працэнта) прыпадае на даходы ад размяшчэння сродкаў прафесійнага пенсійнага страхавання ў суме Br319 млн, іншыя непадатковыя даходы складаюць Br184,8 млн.

Субвенцыі з рэспубліканскага бюджэту ў 2023 годзе прагназуюцца на ўзроўні Br1,934 млрд, асноўная маса якіх гэта расходы з рэспубліканскага бюджэту.

Расходы бюджэту ФСАН разлічаны ў суме Br24,7 млрд, або 116 працэнтаў да бюджэту фонду за 2022 год. Асноўную суму расходаў — Br18,8 млрд (76,3 працэнта расходаў бюджэту фонду) прадугледжваецца накіраваць на фінансаванне пенсійнага забеспячэння. У тым ліку на працоўныя пенсіі — Br18,4 млрд, на сацыяльныя і шэраг іншых разнавіднасцей пенсій — Br433 млн.

«У 2023 годзе плануецца сярэднямесячны памер пенсій па ўзросце непрацуючага пенсіянера — Br692. Адпаведна павялічыць пенсіі ў наступным годзе плануецца на 15 працэнтаў. Фінансаванне выплат дапамог з’яўляецца наступным па велічыні артыкулам расходаў бюджэту фонду. Агульная сума расходаў, што накіроўваюцца на фінансаванне ўсіх відаў дапамог у 2023 годзе, чакаецца на ўзроўні Br5,5 млрд, або 22 працэнты ад усіх расходаў бюджэту фонду. Тэмп росту — 117,7 працэнта, або плюс Br800 млн да ўзроўню бягучага года», — расказала міністр.

Паводле слоў намесніка старшыні Пастаяннай камісіі па бюджэце і фінансах Палаты прадстаўнікоў Юліі Мурынай, бюджэт фонду на 2023 год сфарміраваны з перавышэннем даходаў над расходамі за кошт сродкаў прафесійнага пенсійнага страхавання ў суме Br536,5 млн. «Гэта дазволіць гарантаваць выплаты ўсіх відаў пенсій і дапамог у запланаваных аб’ёмах», — звярнула ўвагу яна.