Пытанні, што хвалююць жыхароў Гомельшчыны, разглядаў старшыня аблвыканкама Іван Крупко. Кіраўнік рэгіёна правёў «прамую лінію» і прыём грамадзян у Лоеве.
Адно з актуальных пытанняў, адрасаваных падчас прыёму губернатару, тычылася працэдуры размеркавання арэнднага жылля. Неправамерная сітуацыя, калі заявы на некалькі кватэр прымаліся ад аднаго заяўніка, была заўважана ў Брагінскім раёне. Іван Крупко адразу на прыёме даручыў адказным службам дасканала прааналізаваць гэтае пытанне не толькі ў гэтым раёне, але і ў рэгіёне ў цэлым.
— Трэба вызначыць рэгламент і правесці навучанне, на якім будуць агучаны ўсе нюансы, — падкрэсліў кіраўнік рэгіёну. — Па дому, дзе пацвердзіліся факты, ануляваць рашэнне і правесці працэдуру з захаваннем усіх норм.
Набалелая жыллёвая праблема вымусіла шукаць дапамогі ў кіраўніка рэгіёну і жыхарку пасёлка Суткова Лоеўскага раёна. Як распавяла жанчына, двухкватэрны драўляны дом, у якім яна жыве, — «на балансе» бальніцы.
— Мая кватэра прыватызаваная, другая палова — безгаспадарная. Дом стары, суседняя частка вельмі старая, разбураецца, таму і мая таксама разбураецца. Звярталася з просьбай прадаць мне другую палову, але пытанне не вырашылася, — зазначыла заяўніца.
Агучаную жанчынай сітуацыю кіраўнік рэгіёну ўзяў на асабісты кантроль.
— Вывучым сітуацыю, паглядзім, што можна зрабіць у рамках закона, — запэўніў Іван Крупко.
Адразу некалькі зваротаў, адрасаваных губернатару жыхарамі Лоева, тычыліся вядзення камунальнай гаспадаркі. Так, на якасць правядзення капітальнага рамонту ў доме скардзіўся ветэран працы.
— Дах раскрылі месяц таму, усё цячэ. Сцены мокрыя, столі мокрыя, — з просьбай разабрацца ў сітуацыі звярнуўся да Івана Крупко заяўнік.
«У падвал зайсці немагчыма. Пах даходзіць да верхняга паверха», — так апісаў сітуацыю, з якой сутыкнуліся жыхары іншага дома ў Лоеве, яшчэ адзін заяўнік.
— З моманту засялення ў дом — з 2019 года — у падвале забіваецца каналізацыя. Пісалі ў розныя інстанцыі, аднак нічога не мяняецца, — запэўніў мужчына.
Прагучалі падчас прыёму таксама пытанні добраўпарадкавання тратуарнай дарожкі па вуліцы Садовай у Лоеве і асвятлення ўчастка дарогі, якая вядзе да дзіцячага садка.
Па ўсіх адрасах для дэталёвага вывучэння праблем, з якімі сутыкнуліся грамадзяне, выедуць адказныя службы, запэўніў кіраўнік рэгіёну.
Па адным са зваротаў ад лаеўчан — правядзенні каналізацыі ў раёне жыллёвай забудовы — старшыня аблвыканкама даручыў раённым уладам правесці сустрэчу з людзьмі, каб прыняць аптымальнае для ўсіх бакоў рашэнне.
Як нагадаў Іван Крупко, практыка вырашэння падобных сітуацый ужо выпрацавана ў райцэнтрах Гомельшчыны:
— Калі большасць людзей выкажа згоду, трэба стварыць кааператыў. Праектна-каштарысная дакументацыя вызначыць магчымасці добраўпарадкавання сістэмы, яе кошт, і жыхарам будзе зроблена растэрміноўка, — абазначыў шляхі прапрацоўкі гэтага пытання кіраўнік рэгіёну.
Па кожным звароце, прынятым падчас «прамой лініі» і прыёму грамадзян, Іван Крупко даў канкрэтныя даручэнні адказным службам.
Наталля КАПРЫЛЕНКА
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
