Напярэдадні Дня памяці воінаў-інтэрнацыяналістаў у Брэсцкім аблвыканкаме адбылася сустрэча з актывам абласной арганізацыі грамадскага аб'яднання «Беларускі саюз ветэранаў вайны ў Афганістане». З ветэранамі сустрэўся намеснік старшыні аблвыканкама Вадзім Краўчук.
Віцэ-губернатар адзначыў, што ў вобласці сёння пражывае больш за чатыры тысячы воінаў-інтэрнацыяналістаў, каля тысячы з іх маюць баявыя ўзнагароды. У сярэдзіне лютага ў рэгіёне традыцыйна праходзяць памятныя мерапрыемствы. На думку Вадзіма Краўчука, апошнім часам добра зарэкамендавала сябе такая форма работы ветэранаў з маладымі, як дыялогавая пляцоўка: «Ветэранаў Вялікай Айчыннай становіцца ўсё менш, прыходіць той час, калі менавіта воіны-інтэрнацыяналісты могуць данесці да свядомасці падрастаючага пакалення праўду пра вайну і найвышэйшую каштоўнасць — мір».
На сустрэчы ўзнімаліся пытанні змянення заканадаўства, якое датычыцца льгот ветэранам баявых дзеянняў. Гаворка ідзе, напрыклад, пра бясплатны праезд у гарадскім транспарце, забеспячэнне лекамі і некаторымі медыцынскімі паслугамі, штогадовае санаторна-курортнае лячэнне, ільготы пры аплаце камунальных паслуг. Гэта выглядае асабліва актуальным у святле будучага разгляду змяненняў у Закон аб ветэранах у Палаце прадстаўнікоў Парламента краіны.
Старшыня Брэсцкай абласной арганізацыі ГА «Беларускі саюз ветэранаў вайны ў Афганістане» Юрый Караба расказаў, што арганізацыя налічвае 1580 чалавек. Але грамадскае аб'яднанне стараецца па магчымасці дапамагаць усім, у тым ліку тым, хто з розных прычын не ўдзельнічае у грамадскім руху. Пад асаблівай увагай — удовы і маці загінулых, а таксама інваліды.
На сустрэчы шмат увагі было ўдзелена пытанням захавання памяці пра тых, хто з гонарам выканаў свой вайсковы абавязак. Вадзім Краўчук паведаміў, што ў кожным раёне адной-двум навучальным установам будзе прысвоена імя воінаў-інтэрнацыяналістаў, і папрасіў кіраўнікоў раённых арганізацый унесці свае прапановы наконт кандыдатур і навучальных устаноў. Гэта асабліва важна зрабіць сёлета, у Год міру і стварэння. Кіраўнік Брэсцкай гарадской арганізацыі Сяргей Пухальскі агучыў прапанову адкрыць у абласным цэнтры кадэцкае вучылішча.
Святлана ЯСКЕВІЧ
Фота Валерыя КАРАЛЯ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.