Кіраўнікі адміністрацый Мінска павінны займацца ўсімі пытаннямі: ад правапарушэнняў да эканомікі — для гэтага ў іх ёсць усе паўнамоцтвы. Неабходна выконваць усе паказчыкі сацыяльна-эканамічнага развіцця комплексна. І для гэтага павінны існаваць самая жорсткая дысцыпліна і парадак, перакананая Наталля Качанава, Старшыня Савета Рэспублікі, упаўнаважаная Прэзідэнта па горадзе Мінску. Аб гэтым было сказана на сустрэчы з актывам сталіцы пры абмеркаванні выканання прагнозных паказчыкаў сацыяльна-эканамічнага развіцця за першы квартал.
Спікер адзначыла, што пэўныя праблемы існуюць у гандлі, будаўніцтве, сістэме ЖКГ, у рабоце са зваротамі грамадзян. Выкананы толькі адзін паказчык — па зніжэнні затрат, пра які казаў Прэзідэнт, астатняе — не. Яна нагадала пра неабходнасць уважліва слухаць выступленні Прэзідэнта на розных узроўнях, бо на іх ён дае дакладныя інструкцыі да дзеян-
ня, якія трэба праламляць на сябе і задацца пытаннем «а як у
мяне?»:
— Прэзідэнт быў на мотавелазаводзе. Пакуль ён туды не прыехаў і не сказаў, ні ў каго і думкі не ўзнікла, што можна выкарыстоўваць гэтую пляцоўку як арэндную. А цяпер са 150 тысяч м2 плошчы там 120 ужо закантрактаваныя, і прадпрыемствы ды вытворчасці чакаюць, калі заселяцца туды і пачнуць працаваць. Пры гэтым працуе і сам завод без спынення.
Трэба думаць, дзе і як замяшчаць даходы, якія прыносілі сферы, што з-за аб'ектыўных прычын сёння «праселі», звярнула ўвагу Наталля Качанава.
— У нас павінна быць прадукцыя, якую можна рэалізоўваць, не запаўняючы склады. Напрыклад, прадукцыя прадпрыемства «Камволь» сёння практычна ў кожнай краме. Наша задача цяпер — выпускаць большы асартымент тканін і напаўняць імі крамы. Было заданне 6 мільёнаў пагонных метраў тканіны выпускаць — значыць трэба выпускаць, і сёння ёсць куды яе прадаць. І цана добрая — метр тканіны — 12-13, самая дарагая — 16 рублёў, гэта прымальны кошт.
Наталля Качанава перакананая, што работа сістэмы ЖКГ павінна быць абсалютна іншай, бо бадай што палова зваротаў грамадзян датычыцца менавіта дадзенай сферы. Яна згадала сітуацыю, з якой да яе на прыём па асабістых пытаннях прыйшла мінчанка:
— Жанчына задаецца пытаннем, чаму сёння плата за прыборку і асвятленне месцаў агульнага карыстання ў доме бярэцца ў залежнасці ад плошчы кватэр, а не ад колькасці жыльцоў. І я цалкам згодная, што гэта няправільна. І кіраўнік адміністрацыі мог бы ўзняць гэтае пытанне, каб яго вырашалі на самым высокім узроўні. У людзей невырашэнне пытанняў па іх зваротах, калі іх накіроўваюць ад адной інстанцыі да іншай, што выклікае незадавальненне. А гэта як лакмусавая паперка фарміравання даверу да ўладаў.
Капітальны рамонт павінен быць выкананы якасна, а не так, каб людзі гадамі хадзілі і дабіваліся выпраўлення яго хібаў. Вясенні абход зрабілі — расказалі ў прэсе, дзе што будзе сёлета зроблена, каб людзі ведалі. Адносна адсялення таксама трэба дакладна вызначаць: сектар адсяляюць — значыць адсяляюць. Навошта пераносіць тэрміны, калі людзі не ведаюць, абнаўляць ім сваё жыллё ці чакаць адсялення. Або здараецца, што ўвогуле перадумалі адсяляць, ці наадварот — тэрмінова трэба выязджаць заўтра.
— Гэта ўжо работа службаў архітэктуры — дакладна вызначыць, дзе што будзе рабіцца. Ёсць генплан, растлумачце людзям, дзе раён індывідуальнай забудовы застаецца, а дзе — не, — заклікала Наталля Качанава, звяртаючыся да кіраўніцтва сталіцы. — Сёння вы можаце прапанаваць свае варыянты, як будзе працаваць гэтая сістэма, дакладна выбудаваная, у сталіцы. Унесены змяненні ў дырэктыву ЖКГ, але ж гэта не застылы дакумент. Усё павінна быць гібкім і дакладным, але са зменай умоў павінны мяняцца і вы, каб знаходзіць метады, як працаваць з людзьмі. Павінны перавесці на падземныя крыніцы Мінск да 2025 года? Трэба тлумачыць людзям, што мы працуем у графіку і будзе, як і запланавана.
Трэба звярнуць увагу і на арганізацыю работы па аказанні рытуальных паслуг і адносна могілак, засяродзіла ўвагу сенатар. Яна прывяла прыклад жанчыны, якой ужо за 80, і яна ўсё жыццё ходзіць на пагост да мужа і сына, які памёр маленькі. А цяпер ёй кажуць, што на месцы побач з роднымі, якое яна для сябе падрыхтавала, ёсць нейкае пахаванне. Разабраліся — няма там пахавання. Але ж з'явіліся яшчэ нейкія праблемы: напэўна, нехта вельмі зацікаўлены ў гэтым кавалачку зямлі. Падобныя пытанні неабходна кантраляваць.
Грошы павінны расходавацца эфектыўна, і так, каб быў вынік. Шмат пытанняў узнікае адносна даўгабудаў і кошту жылля. Тры тысячы за квадратны метр для тых, хто мае патрэбу ў паляпшэнні жыллёвых умоў — хіба гэта магчыма? — задалася пытаннем спікер і выказала меркаванне, што можна было б будаваць больш панэльных, а не каркасна-маналітных дамоў для людзей такой катэгорыі. У сталіцы, дарэчы, каля 180 тысяч чалавек, якія стаяць на чарзе.
— Панэльныя будынкі будуць каштаваць танней, і чарга асоб, якія маюць патрэбу ў жыллі, будзе рухацца хутчэй. Давайце больш будавацца ў гарадах-спадарожніках, у тых жа Смалявічах, Рудзенск развіваць, іншыя рэгіёны, каб людзі не жылі па 20 гадоў у інтэрнатах.
Што датычыцца гандлю, то тут усё неадназначна, ахаратарызавала сітуацыю Наталля Качанава:
— Усе крамы, нават тыя, што ў крокавай даступнасці, павінны выглядаць прыстойна, мець добры асартымент, раскладку і ўмераныя цэны. А айчынная прадукцыя ў іх — змяшчацца на цэнтральных паліцах, як і тавары з нацыянальнай сімволікай. Тое ж самае датычыцца і заправак.
Ірына СІДАРОК
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.