Вы тут

Як будуць святкаваць Дзень Незалежнасці ў Мінску


Традыцыйна маштабная праграма мерапрыемстваў з нагоды Дня Незалежнасці Рэспублікі Беларусь адкрыецца ўрачыстым сходам і канцэртам ад майстроў мастацтваў «Краіна маёй мары», які пачнецца ў Палацы Рэспублікі 30 чэрвеня ў 17:30.


— У аснову гэтага канцэрта закладзена ідэя, што ўсе мары павінны спраўджвацца ў нашай краіне, — падкрэслівае начальнік упраўлення дзяржаўных спецыяльных культурных мерапрыемстваў Міністэрства культуры Іна Адамовіч. — Праграма мерапрыемства раскрывае такія важныя і знакавыя паняцці, як патрыятызм, незалежнасць, гістарычная памяць, сямейныя і духоўныя каштоўнасці, мір і стваральная праца. Сімвалічна, што на адной сцэне выступяць як вядучыя артысты краіны, так і таленавітая моладзь.

Рэжысёрам канцэрта майстроў мастацтваў «Краіна маёй мары» выступае Агата Мацко. Гледачоў чакае шмат прэм’ер новых цікавых музычных кампазіцый у выкананні вядучых артыстаў беларускай эстрады і оперы, а таксама прадстаўнікоў розных рэгіёнаў Беларусі. Таксама шырока будзе прадстаўлена наша таленавітая моладзь — акцёры тэатраў і кіно з усіх куткоў Беларусі.

У фае другога паверха Палаца Рэспублікі разгорнецца выстава «Хлеб. Мір. Стварэнне». Экспазіцыя з 10 блокаў будзе прысвечана гісторыі збожжавых культур і хлебапячэння, рэгіянальным і сартавым разнавіднасцям хлябоў, сучасным дасягненням Рэспублікі Беларусь у справе забеспячэння харчовай бяспекі.

Свята працягнецца ў Вялікім тэатры оперы і балета, дзе адбудзецца ўрачыстая цырымонія ўзнагароджання работнікаў культуры і гала-канцэрт майстроў мастацтваў Беларусі «Мастацтва Беларусі ў свеце і стварэнні». Рэжысёрам канцэрта выступае галоўны рэжысёр Вялікага тэатра Ганна Маторная. Таксама будзе арганізавана выстава «Культура Беларусі сёння», дзе можна пазнаёміцца з дасягненнямі нашай культуры. Што датычыцца канцэртнай праграмы, там будуць прадстаўлены нумары ў выкананні не толькі зорак Вялікага тэатра, але і артыстаў беларускай эстрады, таксама будуць прадстаўлены і рэгіёны.

Тэмай года міру і стваральнай працы прасякнуты абсалютна ўсе мерапрыемствы Дня Незалежнасці, куды плануецца запрасіць ветэранаў Вялікай Айчыннай вайны і вайны ў Афганістане, ветэранаў працы, прадстаўнікоў Узброеных Сіл і рэспубліканскіх органаў дзяржаўнага кіравання, дыпламатычнага корпуса, а таксама вядомых спартсменаў, дзеячаў культуры, абласныя дэлегацыі.

Дзень Незалежнасці непасрэдна 3 ліпеня адкрые традыцыйнае ўскладанне кветак на Кургане Славы. У ім возьмуць удзел прадстаўнікі органаў дзяржаўнага кіравання, дэлегацыі абласцей і сталіцы, удзельнікі акцыі «Цягнік памяці», якая ўжо праходзіць па ўсёй краіне.

— Традыцыйна адкрые праграму ўрачыстае ўскладанне вянкоў і кветак да манумента Перамогі ў 10 раніцы. Тут жа адбудзецца сімвалічнае завяршэнне гарадской акцыі «Каляндар і кніга памяці»,— удакладніў начальнік упраўлення культуры Мінскага гарадскога выканаўчага камітэта Віталь Брэль.

— У мерапрыемстве прымуць удзел кіраўнікі органаў дзяржаўнага кіравання, прадстаўнікі грамадскасці Мінска, вядомыя дзеячы культуры, спартсмены і многія іншыя. Хэдлайнерам канцэртнай праграмы стане папулярны расійскі гурт Filatov & Karas. Мерапрыемства пачнецца ў 21.00. Будзе арганізавана яго прамая трансляцыя, — дадала Іна Адамовіч.

Нязменна маштабная канцэртная праграма чакаецца ля Палаца спорту, пачынаючы ўжо з 1 ліпеня. З 13:00 будзе гучаць фонавая музыка, якую з 14:00 і да 21:30 зменіць канцэрт маладых выканаўцаў. Фальклорна-творчы накірунак будзе мець святочная праграма 2 ліпеня: з 14:00 да 21:00 каля Палаца спорту пройдзе канцэрт «У адзінкавым карагодзе». У Дзень Незалежнасці Рэспублікі Беларусь на пляцоўцы адбудзецца канцэрт «Славім імя тваё — Беларусь» (з 12:00 да 23:00). Завершыць святочную праграму на Дзень Незалежнасці гала-канцэрт «Формула міру» і акцыя «Праспяваем гімн разам», якія пройдуць на пляцоўцы ля стэлы «Мінск — горад-герой».

— Эфектным упрыгожваннем фінала свята будзе феерверк, які прагрыміць 3 ліпеня ў 23:00 у 6 пунктах сталіцы — над музейна-паркавым комплексам «Перамога», у парку Паўлава, на набярэжнай парку «Дразды», на пляцоўках ля «Чыжоўка-Арэны» і Нацыянальнай бібліятэкі, у скверы Янкі Купалы (сёлета ён зменіць пляцоўку парку Уга Чавеса), — адзначыў Віталь Брэль.

Будзе, што паглядзець і прыхільнікам ваеннай тэхнікі. У Мінску 3 ліпеня Міністэрства абароны разгорне тэматычныя пляцоўкі ва ўсіх сталічных раёнах: гэта паркі Перамогі, экстрэмальных відаў спорту, Паўлава, 60-годдзя Кастрычніка, Курасоўшчына і Лошыцкі, а таксама ля «Чыжоўка-Арэны», Нацыянальнай бібліятэкі і ў скверы Мулявіна. Дзясятая тэматычная пляцоўка будзе разгорнута каля Кургана Славы.

Як паведаміў начальнік 2-га аддзела ўпраўлення інфармацыі Галоўнага ўпраўлення ідэалагічнай работы Міністэрства абароны Рэспублікі Беларусь Аляксандр Кісель, такім чынам жыхары і госці нашай краіны змогуць азнаёміцца з найноўшымі ўзорамі ваеннай і спецыяльнай тэхнікі, узорамі ваеннай формы і экіпіроўкі. Будзе арганізавана праца фотазон, трэнажораў, кропак прафарыентацыі, правядзенне спартыўных і ваенных конкурсаў. Таксама можна будзе ўбачыць выступленні кінолагаў са службовымі сабакамі, воінаў-чыгуначнікаў, воінаў супрацьміннага цэнтра, вайсковых творчых калектываў і аркестраў. Акрамя таго, вайскоўцы прыгатуюць смачную салдацкую кашу і прапануюць яе ўсім жадаючым. На Кургане славы можна будзе паспрабаваць і свежаспечаны хлеб.

— Праца ваенна-патрыятычных пляцовак у дні дзяржаўных святаў ужо стала добрай традыцыяй. Нашы грамадзяне, асабліва самыя юныя беларусы, з нецярпеннем чакаюць і вельмі рады сустрэчам з вайскоўцамі беларускай арміі. Менавіта таму мы заўсёды стараемся ўсяляк разнастаіць і насыціць нашы пляцоўкі цікавымі і эксклюзіўнымі экспанатамі, конкурсамі і спаборніцтвамі ваенна-патрыятычнай накіраванасці, — падкрэслівае Аляксандр Кісель. — Запрашаем усіх беларусаў і гасцей нашай краіны 3 ліпеня наведаць месцы правядзення святочных мерапрыемстваў — добры настрой, насычаная праграма, шмат сюрпрызаў і эксклюзіў вам гарантаваныя, а актыўным удзельнікам конкурсаў будуць уручаны памятныя сувеніры.

Данііл ХМЯЛЬНІЦКІ

Прэв’ю: БелТА

Выбар рэдакцыі

Грамадства

Такое рознае малако... Каму якое падыходзіць?

Такое рознае малако... Каму якое падыходзіць?

«Малако — паўнавартасны прадукт харчавання, а не напой, гэта важна ўлічваць».