Вы тут

Колькасць выпадкаў гепатыту зніжаецца


Тэндэнцыя зніжэння захваральнасці на гепатыты В і С назіраецца ў Беларусі апошнія 15 гадоў. У першую чаргу гэта адбываецца за кошт заканамернага зніжэння захваральнасці на вострыя формы, адзначыла дацэнт кафедры эпідэміялогіі і мікрабіялогіі Беларускай медыцынскай акадэміі паслядыпломнай адукацыі Ірына Глінская.


— У Беларусі за апошнія 15 гадоў ёсць тэндэнцыя да зніжэння захваральнасці на гепатыты В і С, у першую чаргу за кошт таго, што змяншаюцца паказчыкі захваральнасці на вострыя формы такіх гепатытаў. Гэта заканамерна, асабліва калі мы гаворым пра вірусны гепатыт В. Тут у нас дастаткова сур’ёзныя перамогі сярод прышчэпленых, у першую чаргу дзяцей. Выпадкі рэгіструюцца вельмі рэдка, далёка не кожны год. Гэта дзякуючы менавіта вакцынапрафілактыцы, — расказала Ірына Глінская.

На сёння беларусы ва ўзросце да 34 гадоў добра абароненыя з дапамогай вакцынацыі супраць гепатыту В. Яны атрымалі прышчэпкі пры нараджэнні або ва ўзросце 13 гадоў.

— У наш час па нашым нацыянальным календары вакцынацыя супраць гепатыту В прадугледжана для дзяцей ва ўзросце да года, пачынаючы з першых 12 гадзін з моманту нараджэння. Вакцына паказала сябе як высокаэфектыўная і бяспечная. На працягу некалькіх дзесяцігоддзяў ахоп вакцынацыяй супраць гепатыту В складае больш як 97 працэнтаў. Наша сістэма імунізацыі пабудаваная добра і дае станоўчыя вынікі, — адзначыла дацэнт.

Летась у Беларусі з удзелам Сусветнай арганізацыі аховы здароўя было праведзена спецыяльнае даследаванне на павярхоўны антыген віруса гепатыту В сярод прышчэпленых дзяцей. Яго вынікі паказалі, што толькі ў аднаго дзіцяці быў выяўлены HBsAg, гэта значыць распаўсюджанасць меншая за 0,5 працэнта. І тое — сведчанне высокай эфектыўнасці праграмы імунізацыі, дзеці абароненыя з дапамогай вакцынацыі.

Вакцыны супраць віруснага гепатыту В, якія выкарыстоўваюцца ў краіне, закупляюцца за кошт бюджэту і даюцца насельніцтву бясплатна. Яны паказалі сябе як высокаэфектыўныя і бяспечныя прэпараты.

Разам з тым пэўным чынам на тэндэнцыі адносна захворвання адбілася пандэмія COVІD-19: частка выпадкаў хранічных вірусных гепатытаў не была выяўлена ў 2020–2021 гадах і гэта кампенсуецца іх «адкладзеным выяўленнем». У выніку паказчыкі захваральнасці на гепатыт у 2022 годзе павялічыліся.

Алена КРАВЕЦ

Выбар рэдакцыі

Спорт

Сяргей Блоцкі: Наша задача — навучыць спартсмена думаць

Сяргей Блоцкі: Наша задача — навучыць спартсмена думаць

Як у Мазыры асвойваюць навуку перамагаць.

Эканоміка

Якія задачы стаяць перад машынабудаўнікамі сёлета?

Якія задачы стаяць перад машынабудаўнікамі сёлета?

Змяняецца вектар у знешнім гандлі.