Вы тут

Наспеў час збору не толькі яблыкаў, але і не менш цудоўных пладоў — сліў


Гэты фіялетавы, сонечна-жоўты ці чырвоны плод быў любімым сезонным ласункам многіх беларусаў, калі бананы і ківі яшчэ не ляжалі на прылаўках у любы час года. І сапраўды, хто ў дзяцінстве не залазіў на гэтае дрэва, якое расце практычна ў кожным садзе, не абрываў з яго галін салодкія, з кіслінкай, плады? А памятаеце варэнне са сліў, якое на дачы варыла мама ў эмаляваным тазе, адганяючы вос-ласух і здымаючы вялікай лыжкай смачную плеўку?


 pixabay.com

Калій плюс магній — для сэрца і нерваў

Але давайце пакінем настальгію па дзяцінстве і разбярэмся, чым жа карысная сліва. Перш за ўсё, гэта скарбніца нутрыентаў, а таксама харчовых валокнаў і рэчываў, якія памяншаюць рызыку тромбаўтварэння — кумарынаў. Пад пругкай сіняй альбо залацістай скуркай, у мядова-жоўтай мякаці ўтрымоўваюцца вітаміны групы В, Е, С і А, а таксама калій, жалеза, цынк, кальцый. Антыаксіданты ў сліве здольныя дапамагчы ў прафілактыцы анкалогіі, а таксама ў захаванні маладосці скуры.

З мікраэлементаў найбольш багаты плод каліем. У адной буйной сліве змяшчаецца амаль 200 мг гэтага рэчыва, якое ўмацоўвае здароўе сэрца. Кісла-салодкі плод з сямейства Ружовых дапаможа справіцца з дэпрэсіяй, прычым не толькі дзякуючы цудоўнаму густу і водару. У сліве змяшчаюцца магній і вітамін В6, карысныя для нервовай сістэмы, а трыптафан паляпшае настрой, спрыяючы выпрацоўцы сератаніну.

Усім вядомая ўласцівасць слівы ўзмацняць перыстальтыку кішэчніка, дзякуючы харчовым валокнам і пекцінам. Пры гэтым адбываецца мяккае ачышчэнне арганізма, нармалізуецца ўзровень халестэрыну, у якасці бонуса — расставанне з лішняй вагай. Сліва мае мяккі мачагонны і жоўцегонны эфект, абараняе печань ад уздзеяння таксінаў.

Каліт і дыябет? Не налягайце на сліву

На слівавую рознакаляровасць лепш не спакушацца тым, хто пакутуе на хваробы страўніка і кішэчніка — язвы гэтых органаў, гастрыт, каліт. Прычына — высокае ўтрыманне ў сліве арганічных кіслот. Зрэшты, пару пладоў у дзень пасля прыёму ежы ў гэтым выпадку наўрад ці нашкодзяць. Не ешце багата слівы, калі такія станы, як метэарызм і ўздуцце жывата, знаёмыя вам не па чутках. Пры камянях у нырках і жоўцевым пухіры кісла-салодкі плод таксама не рэкамендуецца, паколькі змяшчае аксалаты — солі шчаўевай кіслаты, якія могуць пагоршыць захворванне. Павышанае ўтрыманне ў сліве цукру патрабуе асцярожнасці і разумных абмежаванняў у выпадку цукровага дыябету.

Што прыгатаваць і як захаваць?

З духмянай садавіны вараць варэнне, джэмы, гатуюць павідла і мармелад, канфіцюр і жэле, а таксама начынне для пірагоў, піражкоў, блінцоў. Хатнія пірагі са слівай, кубак чаю ці кавы за столікам на дачнай верандзе, у коле сям’і — незабыўныя ўспаміны аб шчодрым жніўні сагрэюць вас зімовымі вечарамі.

Вядома, свежая сліва, з’едзеная ў сезон, прынясе вашаму здароўю найвялікшую карысць. Каб захаваць набытыя ці знятыя з дрэва плады як мага даўжэй, захоўвайце іх у халадзільніку, але абавязкова забяспечце ім доступ паветра — у закрытым пластыкавым пакеце слівы хутка страцяць свае смакавыя і карысныя якасці.

Агата СЛАВІНА

Выбар рэдакцыі

Грамадства

Сёння распачынае работу УНС у новым статусе

Сёння распачынае работу УНС у новым статусе

Амаль тысяча дзвесце чалавек збяруцца, каб вырашаць найважнейшыя пытанні развіцця краіны. 

Навука

Наколькі эфектыўна працуе сістэма інтэлектуальнай уласнасці?

Наколькі эфектыўна працуе сістэма інтэлектуальнай уласнасці?

Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.

Здароўе

У Нацыянальны каляндар плануюць уключыць новыя прышчэпкі

У Нацыянальны каляндар плануюць уключыць новыя прышчэпкі

Як вакцыны выратоўваюць жыцці і чаго можа каштаваць іх ігнараванне?

Грамадства

Курс маладога байца для дэпутата

Курс маладога байца для дэпутата

Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.