Вы тут

Аляксандр Турчын правёў прыём грамадзян у Любані


У Любані на прыём да старшыні Мінаблвыканкама Аляксандра Турчына жыхары райцэнтра і населеных пунктаў раёна звярнуліся па хвалюючых іх пытаннях. Хтосьці не можа вырашыць на мясцовым узроўні праблему капітальнага рамонту дома і прылеглай тэрыторыі, кагосьці трывожаць суседзі, якія займаюцца рамонтам аўтамабіляў прама ў двары, паведмляе БелТА.


Гаражны масіў недалёка ад вуліцы Сонечнай стаў прытулкам жадаючых зарабіць на рамонце аўтамабіляў. А рамонт, як вядома, справа шумная, якая стварае пахі, непазбежныя пры афарбоўцы, зварцы і іншых маніпуляцыях з машынай. І калі выконваецца ён у прыстасаваным памяшканні, ды яшчэ і абаграваееца звычайнай печкай, то працэс становіцца небяспечным, у тым ліку і для навакольных. З просьбай дапамагчы навесці парадак у гаражным масіве, а таксама прыцягнуць да адказнасці тых, хто аказвае паслугі па рамонце, парушаючы экалогію і грамадскі спакой, кіраўніка вобласці папрасілі мясцовыя жыхары.

«Трэба разабрацца, падключыць службы. Калі чалавек хоча займацца бізнесам, то вылучыць яму ўчастак зямлі, хай працуе. У невялікім горадзе ўсё навідавоку, і не складзе вялікай праблемы навесці парадак. Перашкаджаць весці сваю справу нікому не трэба, проста рабіць гэта трэба ў рамках прававога поля», — адзначыў Аляксандр Турчын.

Гараджане, якія пражываюць па вуліцы Леніна, 94, асабліва пажылыя, занепакоеныя лёсам свайго горада, дзе падрастаюць іх унукі, усё ніяк не могуць дачакацца добраўпарадкавання тэрыторыі каля дома. Аўтамабілі тут паркуюць на зялёнай зоне, няма парадку на пляцоўцы для збору ЦБА, няма дзе пагуляць і дзецям. Такое ж запусценне пануе на дарозе да дзіцячага садку, побач з якім размешчаны школа і аптэка, — няма тратуара, які вядзе да ўстаноў, збудаванні на пляцоўках выглядаюць несучасна, як і стары газон, які, па словах жыхароў, варта было б перарабіць. Яны б хацелі, каб побач з жылым масівам з’явілася прыгожая алея памяці ў гонар 80-годдзя вызвалення Беларусі ад нямецка-фашысцкіх захопнікаў.

Паводле інфармацыі мясцовага выканкама, ёсць праект па добраўпарадкаванні тэрыторыі 24 дамоў па вуліцы Леніна, у тым ліку рэканструкцыі ліўнёўкі і часткі ачышчальных збудаванняў. Праект прайшоў экспертызу, патрабуецца сур’ёзная сума сродкаў на яго рэалізацыю.

«Калі там няма дваровых тэрыторый, парковак, то іх трэба рабіць. Хай не за год, а за тры-пяць, але парадак паступова трэба наводзіць. Ужо вясной трэба пачынаць гэтую працу, зрабіўшы акцэнт на першачарговых пытаннях. Калі патрабуецца тратуар для бяспечнага перамяшчэння дзяцей у сад і школу, то ён павінен там з’явіцца ў кароткія тэрміны. Але і наракаць толькі на службы жыхарам не варта, а і самім па магчымасці падлучацца да навядзення парадку», — звярнуўся губернатар да прадстаўнікоў мясцовай улады.

Пенсіянер  Мікалай Лысенка, які адрасаваў гэтыя праблемы губернатару, вельмі эмацыйна завяршыў гутарку з Аляксандрам Турчыным. «Перадайце вялікую падзяку нашаму Прэзідэнту. Я лічу, што ён сапраўдны мужык: змог захаваць мір у нашай краіне, робіць усё магчымае для падтрымання парадку. Я сам родам з Каўказа і вельмі добра ведаю, што такое вайна, якая гэта трагедыя, калі гінуць людзі», — адзначыў ён.

З вёскі Крупенікі губернатару задалі пытанне, якое, як і іншыя, можна было вырашыць на мясцовым узроўні. Вяскоўцы хоць і не адразу, але паабяцалі выдаліць аварыйнае дрэва на старых могілках у гарадскім пасёлку Урэчча, і нават тэрміны ўстанавілі — да 1 кастрычніка гэтага года. Толькі заяўка вяскоўкі так і засталася нявыкананай: іншыя дрэвы прыбраны, а аварыйная бяроза працягвае расці. Хоць жанчына атрымала адказ, што дрэва выдалена.

«Усе мы ведаем: калі дрэва падае на могілкі, гэта прыводзіць да разбурэння помніка. І разумеем, колькі каштуе граніт. Калі дрэва ўпадзе па нашай віне, то раённыя службы будуць несці матэрыяльную адказнасць. А падобныя адказы грамадзянам — гэта сапраўдны абсурд», — рэзюмаваў Аляксандр Турчын.

Жыхарка аграгарадка Сосны-2 вымушана жыць у аварыйным доме, які знаходзіцца на балансе мясцовага сельгаспрадпрыемства. Паводле інфармацыі мясцовага выканкама, варыятыўнае жыллё вяскоўцы прапаноўвалі, але, як яна сцвярджае, ні адно з памяшканняў не адпавядае патрабаванням — няма ацяплення, электрычнасці і інш.

«Трэба разгледзець варыянты жылля, на працягу месяца правесці святло, вырашыць пытанне з ацяпленнем. І паставіць нарэшце кропку ў гэтым пытанні», — сказаў Аляксандр Турчын.

Салігарчанін прыехаў на прыём грамадзян, каб устанавіць справядлівасць у сваім пытанні працаўладкавання. Працаваў ён на машыне хуткай дапамогі прадпрыемства «Калійспецтранс», а ў 2020 годзе па стане здароўя атрымаў 3-ю групу інваліднасці. Група па законе рабочая, але мужчыну са стажам больш за 20 гадоў стварылі абстаноўку, у якой працаваць стала немагчыма. У выніку ў 2023 годзе кіроўцу звольнілі па пагадненні бакоў.

«Даручэнне вывучыць сітуацыю ў гэтым калектыве мы перададзім старшыні Салігорскага райвыканкама. Мы прадметна разбярэмся ў гэтым звароце і зробім адпаведныя высновы», — пракаментаваў сітуацыю Аляксандр Турчын.

Фота: БелТА

Выбар рэдакцыі

Грамадства

Захаваць. Нельга знесці

Захаваць. Нельга знесці

Знакі прыпынку нарэшце расстаўлены.

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.