Усё часцей на дарогах нашай краіны можна ўбачыць аўтамабілі з зялёнымі рэгістрацыйнымі знакамі. Не, гэта не трэнд, які толькі цяпер набірае сілу, а дзеючае правіла, згодна з якім з лета 2020 года ўсе электрамабілі атрымалі своеасаблівую адметную пазнаку. Калі ў двух словах апісаць электракар, то гэта звычайная машына, у якой рухавік унутранага згарання і ўсе спадарожныя дэталі і механізмы замененыя электраакумулятарам. Здавалася б, выдатна, бо цяпер, каб пазбавіцца ад перажыванняў з-за чарговага падаражэння паліва, дастаткова купіць сабе «электрычку».
Днямі, падчас сустрэчы Прэзідэнта Беларусі Аляксандра Лукашэнкі з маладзёжным актывам, ён звярнуў увагу на гэтую тэму. Па словах беларускага лідара, прыярытэт будзе аддавацца стварэнню электрамабіляў. У Беларусі ёсць вялікія напрацоўкі і іх трэба развіваць. Па сутнасці, у айчынных вытворцаў усё ёсць, акрамя батарэі. «Аўтамабіль у нас будзе. Будзе асноўны добры аўтамабіль, і дадаткова мы яшчэ прыцягваем сюды інвестараў, каб яны выраблялі аўтамабілі», — сказаў кіраўнік дзяржавы.
Па словах экспертаў, для таго каб зразумець галоўную перавагу выкарыстання электрамабіля, неабходна адна ўмова — такіх машын павінна быць шмат. Тады паветра стане чысцейшае, бруду на вуліцах стане менш, знізіцца шум. На дадзены момант у Беларусі зарэгістравана больш за 10 тысяч электракараў, але гэтай колькасці недастаткова, каб адчуць іх станоўчы ўплыў на навакольнае асяроддзе.
Глабальны недахоп у электрамабіляў адзін — прымяняюцца розныя стандарты раз’ёмаў. У электрамабілях з ЗША, Еўропы і Кітая прымяняюцца розныя тыпы канектараў. Гэта стварае складанасці для аператараў зарадных станцый, ім неабходна прадугледзець магчымасць зарадкі для ўсіх. А астатняе — хутчэй не недахопы, а складанасці. Уладальнікі электрамабіляў сутыкаюцца з такой праблемай, як недахоп зарадных станцый у дварах, каля гандлёвых цэнтраў, крам, кавярняў і рэстаранаў.
Складана і дорага самастойна ўстанавіць станцыю на паркоўках каля жылых дамоў і ў падземных паркінгах — гэта патрабуе мноства ўзгадненняў. Складанасці могуць паўстаць і з рамонтам — усё ж такі гэта не аўтамабіль народнай маркі, якіх па нашых дарогах ездзіць непараўнальна больш.
Сёння на аўтарынку можна адшукаць як аўто прэміум-класа, так і бюджэтныя «электрычкі». Галоўнае адрозненне машын розных катэгорый — ёмістасць акумулятара, ад якога наўпрост залежыць магчымы прабег на адным зарадзе.
Ці ўсё ў нас у краіне зроблена для выкарыстання электрааўтамабіляў? Як аказалася, пакуль не.
У поўнай меры выкарыстаць увесь патэнцыял такіх машын можна толькі тады, калі ў краіне будзе створана паўнавартасная інфраструктура для зарадкі. Электрамабіль залежыць ад наяўнасці разеткі. Большасць «электрычак» абмежаваныя ёмістасцю батарэй, якія выкарыстоўваюцца ў іх. Можа быць, праз некалькі гадоў батарэя з запасам ходу 1000 кіламетраў стане стандартам нават для недарагіх электрамабіляў, а пакуль што гаворка ідзе пра паказчыкі ў разы меншыя. Асноўная маса электрамабілістаў — людзі, якія маюць магчымасць зараджаць свае машыны дома. Каб новага транспарту стала больш, неабходна інфраструктура. Не ўсе жывуць у сваіх дамах, таму ўмоўнаму жыхару Сухарава ці Зялёнага Луга Мінска патрэбна магчымасць зараджацца ноччу каля свайго дзевяціпавярховіка. Таму ідэальная сітуацыя, калі ты можаш зарадзіць тэхніку заўсёды і ўсюды і не думаць пра гэта. Прычым для гэтага патрэбна не толькі развітая сетка зарадных станцый, але і гарантаваныя вольныя месцы на станцыях для зарадкі.
Напрыклад, ты прыязджаеш на АЗС заправіцца бензінам, там запаркаваны аўтамабіль, а яго ўладальнік спіць дома.
Абсурдная сітуацыя. А яна тыповая для электракараў: на месцах для зарадкі паркуюцца звычайныя аўтамабілі. Хутка пачнуць дзейнічаць папраўкі ў Правілы дарожнага руху, які забараняе рабіць гэта. Напэўна, з’явяцца прэцэдэнты з выпісваннем штрафаў.
Паўсюдны пераход ад бензінавых аўто да электрамабіляў патрабуе шмат часу і выдаткаў. Дастаткова паглядзець на навіны з Еўропы, дзе плануюць поўную адмову ад выпуску і продажаў традыцыйных аўтамабіляў праз некалькі гадоў. Калі ўсё спраўдзіцца, мы па інерцыі апынемся на гэтым шляху.
Электрамабіль — гэта ўжо не будучыня, а сучаснасць многіх краін. У Беларусі таксама зроблены крокі да пераходу на машыны з акумулятарнымі батарэямі, у прыватнасці, павялічваецца колькасць электразарадных станцый. Калі ж мы цалкам адмовімся ад машын з рухавіком унутранага згарання, сказаць пакуль складана.
Сяргей КУРКАЧ
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
