Тавараабарот паміж Беларуссю і Таджыкістанам трэба павялічваць

Старшыня Палаты Прадстаўнікоў Уладзімір Андрэйчанка сустрэўся з Надзвычайным і Паўнамоцным Паслом Таджыкістана ў Беларусі Бахтаварам Сафарзадой.

Спікер ніжняй палаты парламента падкрэсліў, што гэта ўжо не першая сустрэча. «Вы не чужы для нас чалавек. Мы ведаем вас як парламентарыя, паўнамоцнага прадстаўніка парламента Рэспублікі Таджыкістан у Парламенцкай асамблеі АДКБ», — сказаў Уладзімір Андрэйчанка. Ён выказаў упэўненасць, што прызначэнне Бахтавара Сафарзады паслом Таджыкістана ў Беларусі будзе садзейнічаць развіццю адносін паміж дзвюма краінамі. «Падмурак для гэтага створаны добры. У нас на ўсім працягу наладжаны і дружба, і супрацоўніцтва. Вядома, стрыжнем гэтых адносін з’яўляюцца кіраўнікі нашых дзяржаў. Прадуктцыйна працуе наш урад, парламент. Важна, каб гэтыя канструктыўныя палітычныя адносіны адбіваліся на канкрэтных выніках гандлёва-эканамічнага супрацоўніцтва. У наш час гэта самае галоўнае», — сказаў ён. Па словах Уладзіміра Андрэйчанкі, сёння неабходна ўзяць на кантроль пытанне рэалізацыі дарожнай карты двухбаковага супрацоўніцтва на 2022–2026 гады, падпісанай кіраўнікамі дзяржаў у Душанбэ. «У карце адлюстраваны ўсе напрамкі работы. Таму трэба больш актыўна працаваць і браць на парламенцкі кантроль, як рэалізоўваюцца ўсе гэтыя напрамкі. Таму што працаваць ёсць над чым. Ваша краіна і Рэспубліка Беларусь зацікаўлены ў тым, каб нарошчваць гандлёва-эканамічнае супрацоўніцтва. 78 мільёнаў долараў за 2022 год, паводле нашых звестак, — знешнегандлёвы абарот паміж нашымі краінамі. Гэта, вядома ж, невялікая лічба. Сёлета за 8 месяцаў на 15 працэнтаў дадалі. Але, думаю, яшчэ вельмі шмат у нас ёсць магчымасцяў. І гэтыя лічбы, вядома ж, не адпавядаюць патэнцыялу і вашай краіны, і нашай краіны, — сказаў Уладзімір Андрэйчанка. — Эканоміка на сёння — самае галоўнае. Будзе эканоміка — будуць зарплаты, стабільнасць, дабрабыт людзей, а галоўнае — бяспека дзяржавы».

Старшыня Палаты прадстаўнікоў таксама заўважыў, што парламентарыі Беларусі і Таджыкістана цесна супрацоўнічаюць на двухбаковай аснове і ў міжнародных парламенцкіх арганізацыях. Ён падзякаваў таджыкскім парламентарыя за аператыўную ратыфікацыю мемарандума аб уступленні Беларусі ў ШАС. «У гэты няпросты час, калі ціск ідзе з боку Захаду, санкцыйны ціск, шантаж, мы павінны яшчэ больш актыўна супрацоўнічаць. Такі час сёння — пераход да шматпалярнага свету, і мы павінны ў гэтым выпадку ў міжнародных арганізацыях аказваць адзін аднаму падтрымку. Больш згуртавана павінны працаваць», — сказаў Уладзімір Андрэйчанка.

У сваю чаргу, Бахтавар Сафарзада падкоэсліў, што міжпарламенцкія сувязі Беларусі і Таджыкістана трэба выводзіць на больш высокі ўзровень. «Для гэтага ў нас ёсць палітычная воля на самым высокім узроўні. Нашыя прэзідэнты на гэтым робяць свой акцэнт, настаўляюць дыпламатычны корпус, каб на ўзроўні парламенцкай дыпламатыі былі добрыя сувязі і супрацоўніцтва развівалася на належным узроўні», — адзначыў пасол.

Валерыя СЦЯЦКО

Фота: БелТА