Беларускія самбісты заваявалі пяць медалёў чэмпіянату свету ў Арменіі

У сталіцы Арменіі Ерэване набліжаецца да завяршэння чэмпіянат свету па самба, удзел у якім у нейтральным статусе прымалі беларускія спартсмены, паведамляе БелТА.

У заключны дзень спаборніцтваў былі разыграны сем камплектаў узнагарод, нашы самбісты сёння засталіся без медалёў. Бліжэй за ўсіх да п’едэстала былі Аляксандр Кокша і Сяргей Лясяк у мужчынскім спартыўным самба. У катэгорыі да 79 кг Кокша дайшоў да паўфіналу, прайшоўшы Бубкера Эссуфі з Марока, Мухамада Альфаіса з Інданэзіі і казахстанца Нурбола Серыкава. У 1/2 фіналу беларус саступіў армяніну Барысу Шатверану, а ў паядынку за бронзу — расіяніну Ягору Сухапараву. У вазе да 98 кг Сяргей Лясяк стартаваў з перамогі над бразільцам Фяліпэ Алівейрам, але затым прайграў будучаму фіналісту з Расіі Антону Канавалаву. У сутычцы за трэцяе месца наш спартсмен не справіўся з грузінам Давіці Ларыяшвілі.

У жаночых спаборніцтвах беларускі Карына Шут і Валерыя Хрушчова пакінулі турнір ужо пасля першых паядынкаў. Шут, якая выступае ў катэгорыі да 80 кг, саступіла ўкраінцы Галіне Кавальскай, а Хрушчова ў вазе звыш 80 кг выбыла пасля паражэння ад Б’янкі Продан з Румыніі.

Акрамя таго, у мужчынскім баявым самба наш Васіль Астапец (вага да 71 кг) атрымаў перамогі над Годвінам Лангбаянам з Філіпін і карэйцам Ін Ву Пакам, але ў чвэрцьфінале саступіў прадстаўніку Таджыкістана Худаёру Раджабзадэ. Яшчэ адзін беларус Яўген Алексіевіч (да 88 кг) выбыў з барацьбы ў першым раўндзе, прайграўшы расіяніну Саіду Саідаву.

Такім чынам, за тры спаборніцкія дні нашы самбісты заваявалі пяць узнагарод галоўнага старту сезона: па адной залатой і сярэбранай, а таксама тры бронзавыя. Чэмпіёнкай свету сярод жанчын у вагавой катэгорыі да 65 кг стала наша Даніэла Ждан, а ў вазе да 72 кг другое месца заняла Анжэла Жылінская. На трэцюю прыступку п’едэстала падымаліся Анфіса Капаева (да 50 кг), Таццяна Мацко (да 59 кг) і Уладзіслаў Бурдзь (да 58 кг). Усяго першынства планеты ў Ерэване сабрала больш за 330 спартсменаў з 65 краін, беларускую каманду прадстаўлялі 19 самбістаў.