Заява Савета Рэспублікі у сувязі са шматлікімі ахвярамі сярод мірнага насельніцтва ў зоне палесціна-ізраільскага канфлікту

Прэзідыум Савета Рэспублікі Нацыянальнага сходу Рэспублікі Беларусь рашуча асуджае нанясенне ўдараў па аб’ектах грамадзянскай інфраструктуры ў сектары Газа, уключаючы лагеры бежанцаў, шпіталі, школы. Гэта сапраўдная сусветная трагедыя, калі ў выніку абстрэлаў гінуць ні ў чым не вінаватыя людзі, а колькасць ахвяр нападаў — ужо больш за 12 тысяч чалавек, і пераважная большасць з іх — дзеці і жанчыны. Паведамляе тг-канал Савета Рэспублікі Нацыянальнага сходу Рэспублікі Беларусь.

У сектары Газа загінула каля 5 тысяч дзяцей, што перавышае колькасць забітых дзяцей ва ўзброеных канфліктах ва ўсім свеце ў апошнія гады.

Гуманітарная сітуацыя ў сектары Газа набыла катастрафічны характар. Людзям неабходныя абарона, прадукты харчавання, вада, медыкаменты. Далейшае прамаруджванне з аказаннем поўнамаштабнай дапамогі тым, хто жыве ў нястачы, пацягне незваротныя шакавальныя вынікі.

Беларусь як краіна, якая спаўна адчула на сабе ўвесь боль і пакуты Другой сусветнай вайны, якая страціла кожнага трэцяга свайго жыхара, не можа заставацца абыякавай да лёсаў людзей, якія сталі заложнікамі канфлікту.

Мы з вялікім смуткам і горыччу ўспрымаем гібель мірных людзей і настойліва заклікаем парламентарыяў і парламенцкія структуры выступіць у абарону грамадзянскага насельніцтва і далучыцца да зваротаў аб неадкладным спыненні агню ў зоне палесціна-ізраільскага канфлікту.

Выступаючы з гэтым заклікам у Сусветны дзень дзіцяці — дзень, які закліканы забяспечыць дабрабыт дзяцей ва ўсім свеце і падарыць ім надзею на лепшую будучыню, мы хочам яшчэ раз падкрэсліць вечную каштоўнасць жыцця кожнага дзіцяці, кожнага чалавека.