Божухна, як пралятае час! З гадамі толькі тое і робіш, здаецца, што прыбіраеш ёлку ды разбіраеш…
Карацей — хутка зноў у лазню.
Туды, як вы памятаеце, вельмі шмат хто ходзіць 31 снежня, бо гэта ўжо традыцыя. Цяпер, яна, праўда, трохі змянілася: з таго ж 31-га шмат хто ходзіць без... грошай. Што, напэўна, заканамерна — святы, падарункі, госці. Нехта да нас, да некага мы — пехатой, на кані, на машыне, у новых боціках (для жанчын гэта, кажуць, лекі, а на леках не эканомяць!), у валёнках…
Вы ўжо глянулі на верхні здымак і зразумелі, што сёння гутарка (а павядуць яе, ну, вядома ж, чытачы «Звязды»!) пра самае галоўнае! («Рух — гэта жыццё», — пачула адна жанчынка і пайшла на каток. Пакаталася там на каньках, потым — на каленях, потым — тварам па лёдзе, а ўрэшце — на «хуткай» — у бок найбліжэйшай бальніцы.)
Але ж зараз не пра яе.
«Модна цяпер праводзіць розныя тэсты, — у першых радках свайго ліста піша спадар Валерый Гаўрыш з Чавусаў. — Ну, вось напрыклад: кампаніі маладых (ці не вельмі) прапануецца „набор“ з адмысловых рознакаляровых фігур. Нехта выбірае сабе чорны квадрат, нехта — жоўты круг, чырвоны трохкутнік, зялёны авал... І такім чынам „гаворыць“ іншым, што ён за чалавек, які ў яго настрой, як ён можа павесці сябе ў пэўных абставінах...»
Нешта падобнае, як лічыць Валерый Мікалаевіч, прапануецца і на здымку, што, згадзіцеся, цалкам лагічна:
Калі на спаднічку
ты глядзіш ўпарта,
Значыцца, сяброўку
ўжо заводзіць варта.
А калі спачатку
позірк на валёнкі,
Каб нацерла спіну,
папрасіся ў жонкі.
Калі ж ты вачыма
выбіраеш колы,
То — чакай —
даішнік
спыніць невясёлы.
Ён цябе адпусціць, —
ты паедзеш з сумам,
Не да цешчы ў госці —
на замену гумы.
Што трэба, тое трэба. Ніхто з тым не спрачаецца: спадар Юрый Вінаградаў з Докшыцкага раёна проста канстатуе факт:
Завядзёнка — на машынах
Пад зіму мяняць рызіну...
Яно б лепш па халадзіне
У валёнках і дзяўчыне:
Яе роўненькія ножкі
Больш не мерзлі б на дарожках.
Чыстая праўда (у Аўцюках — сталіцы беларускага гумару — бывае чыстая брахня): у валёнках, ну, вядома ж, цяплей, але…
Грош такі — у ім два бакі: з тога ж канверта і пра тую ж (?) дзяўчыну:
Вельмі смелая Аленка
Паказала ўсім каленкі...
Хлопцы
елі іх вачамі
Не маглі заснуць
начамі!
А ў Ганны —
справы швах:
Дзеўка
ходзіць у штанах —
Ніхто вокам не вядзець,
Бо няма на што глядзець.
Спрэчная выснова, бо штаны цяпер бываюць такія, што ўсе «міні» адпачываюць! (Адна дзяўчына ў такое прыбралася, пакруцілася перад люстэркам, перад хлопцам, пытаецца: «Слухай, калі я нахіляюся, трусікі не відаць?» — «Не, — адказвае той, — але магла б і надзець».)
Гэта — вы здагадаліся — быў анекдот. Зноў жа чыстая праўда ад спадарыні Соф’і Кусянковай з вёскі Лучын, што на Рагачоўшчыне:
На гулянку
сёння Бэла
Порткі-клёшыкі
надзела.
Гала хітрая была:
У чым стаяла,
у тым пайшла:
Хлопцам,
ведала, «у модзе»,
Калі голая па «годзе».
Зрэшты, гэта ўсё — што называецца — за кадрам.
А шкада — у прыватнасці спадару Аляксандру Матошку з Расоншчыны:
Фотку, дзе валёнкі-колы,
Хтось абрэзаў для прыколу.
Той, хто цалкам бы глядзеў,
Далібог, памаладзеў!
Якраз гэта ўжо і праверана, прытым — найлепшым чынам, то-бок — на сабе: з таго самага «канверта» (у двукоссі, — бо па электроннай пошце):
Гляджу на боты,
ножкі, брук...
Як падшыванец,
як хлапчук!
А за плячыма —
голас жонкі:
— Пара б табе
купіць валёнкі.
Наша показка: не заглядвайся на чужых жанок — не скасееш, дык здурнееш. А здрурнеўшы, паводле спадара Івана Янкава з Мінска, чаго толькі не зробіш:
Перахоплівае дых,
Калі бачыш маладых!..
Каб суставы не мяняў,
Так, здаецца б, і дагнаў!
Амаль гэткія ж думкі і ў спадара Цімошкі з Валожыншчыны:
На падворку ў Міколы
Брукаванка і два колы,
Ножкі...
Шкода — састарэў,
Без валёнак бы сагрэў!
Як той казаў, волас сівее — розум шалее. Ну дагнаў (паводле спадара Янкава — з рызыкай для суставаў, а то і жыцця), ну сагрэў: далей — болей, як той казаў, а вось лепей ці не — пытанне.
Адказ ад класіка:
Мы гэткіх шлюбаў
многа знаем:
На кветках жэняцца карчы.
І тым карчам мы спачуваем,
Але не можам памагчы.
Зрэшты, мы крыху адхіліліся: час вярнуцца да нашых бараноў, то-бок да здымка — з валёнкамі, коламі, дзеўкамі: чаго яны там стаяць, ляжаць ды ходзяць, дакладна ведае спадарыня Войцік з Гродна:
Гаспадар тут!
І «з вусамі»:
Колы — памяняў на сані,
Зараз — боты
на валёнкі...
Вось і до...
Трымайся жонкі!
Добрая парада!
Пра тое ж, толькі здалёк і гледзячы на здымак, — спадар Мікалай Старых з Гомеля:
Янка ўвосень сані
ўзяўся рыхтаваць —
Колы без патрэбы
на траве ляжаць.
Нейкі Бураціна
выставіў валёнкі...
Ды шыбуе міма
дзеўка-незнаёмка,
Бо, падобна, з ёю
ідзе яе жаніх?
...Я, здаецца, сцяміў,
што «звязала» ўсіх:
І разгадка, людцы,
простая такая:
Кожны на тым здымку
пару сваю мае.
А вось як знаходзіць, — пытанне.
Спроба адказу ў лісце спадара Валерыя Гаўрыша, які, гледзячы на здымак, міжволі ўспомніў нашу класіку і, вядома ж, Класіка — Янку Купалу. Данінай павагі яму радкі:
У гэткім строі
на хвілінку
Не ўяўляецца
Паўлінка!
Яе б
Якім не пакахаў...
Быкоўскі б —
хіба пакатаў...
Вось толькі б
сватацца ці стаў?
Пра тое ж толькі іншымі словамі спадарыня Любоў Чыгрынава з Мінска:
Зранку ўдумала Маруся
Стаць какеткаю-спакусай,
Агаліла ножкі файна...
Ні спакусы ўжо,
ні тайны.
Бывае: хацела, мусіць, як лепей, атрымалася, як заўсёды. І каб толькі ў Марусі, а то ж (паводле спадара Мікалая Касмачэўскага з Наваполацка):
Прапануюць дзеўкі смела
Скарыстацца іхнім целам,
Але ўсё ж, зазначыць мушу:
Людзі болей
цэняць душы.
Што яшчэ? Ды відавочна, як лічаць сужэнцы Астроўскія з Мінска:
Тут —
музей пад чыстым небам...
Нам такія
вельмі трэба,
А то ж возьмем ды забудзем,
Як жылі калісьці людзі...
У цяжкай працы,
у горкім горы
Агаляцца?
Ганьба! Сорам...
На вазах усё вазілі,
У валёначках фарсілі...
Дай бог, помніць, разумець,
Гэта значыць — розум мець!
У Аўцюках вельмі трапна казалі: не лічы сябе разумным — будзь ім!
Гэтым прыгожым заклікам можна было б завяршыць сённяшні агляд, але ж ёсць у пошце яшчэ адзін — і не менш патрэбны. Як піша спадар Янкаў:
Я за модай не ганюся —
Мне яе
не даганяць...
Я да моладзі звярнуся,
Каб адно ёй пажадаць:
Ёсць галовы ў вас і сіла,
Можна шчасце будаваць...
Толькі б розуму хапіла
У міры жыць, не ваяваць!
Актуальнае пажаданне! А ўжо на фінішы года... Анекдот: «Фіма, ты ўжо нешта купіў да святочнага стала?» — «Такі-так!.. Адну бутэлечку белага віна, адну баначку чырвонай ікры і многа семак». — «Ой-вэй, а навошта?» — «Віно — каб выпіць, ікру — каб закусіць, а семкі — для таго, каб напляваць на ўсе магчымыя цяжкасці!»
Вось гэтага — аптымізму — хацелася б пажадаць усім чытачам «Звязды», усім удзельнікам конкурсу «Хто каго?».
А напрыканцы яшчэ і нагадаць, што на папярэднім здымку (гл. «Звязда», 25 кастрычніка г. г.) былі аматары плавання (на прыгожай рацэ, на мастках...) і найлепшыя радкі пра іх склалі мінчанка Любоў Чыгрынава і Валянціна Гудачкова з Жыткавічаў, спадары Іван Янкаў з Мінска, Віктар Сабалеўскі з Узды, Мікалай Камароўскі з Оршы, Аляксандр Матошка з Расоншчыны.
Вось з гэтым, апошнім меркаваннем многіх чытачоў, пагадзілася і журы маленькае рэдакцыйнае.
Такім чынам, прыз у выглядзе падпіскі на дарагую сэрцам газету на першы квартал 2024 года накіроўваецца ў вёску Янкавічы Расонскага раёна.
Хочаце, каб родная газета на роднай мове пяць разоў на тыдзень прыходзіла і да вас, тады варыянтаў два: першы — своечасова аформіць падпіску (на месяц, на два, на квартал ці паўгоддзе), другі — уважліва паглядзець на чарговы конкурсны здымак (унізе), прыдумаць подпіс (можна некалькі, але трапных, дасціпных, кароткіх (пажадана — не больш за восем радкоў) і даслаць у рэдакцыю.
Шанс на выйгрыш мае кожны.
Валянціна ДОЎНАР
Ад яе ж шчырыя прабачэнні ўсім, чые варыянты не трапілі на старонкі газеты — на гэты раз. Затое ў наступны…
Адзінае — пры ўмове, што аўтары будуць не толькі нешта пісаць, рыфмаваць, але і перачытваць тое, што атрымалася, думаць: а ці добра ж, ці ўдала, ці нельга лепей? То-бок — трошкі працаваць.
Усім, хто гэта рабіў, робіць і нават хацеў бы ў новым 2024-м — найшчырэйшы дзякуй! Ад чытачоў — таксама! З надыходзячым! І пішыце!
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.