Літаральна ў апошнія дні мінулага года ў шэрагу медыцынскіх устаноў Брэстчыны прайшлі ўрачыстыя мерапрыемствы, якія сталі своеасаблівым аглядам праведзенай работы па абнаўленні, мадэрнізацыі, папаўненні ўстаноў аховы здароўя новым абсталяванннем і тэхнікай.
Напрыклад, у Жабінцы, горадзе-спадарожніку абласнога цэнтра, адкрылі абноўленае аддзяленне анестэзіялогіі і рэанімацыі цэнтральнай раённай бальніцы. Якое значэнне мае названае аддзяленне ў справе правядзення аперацый ды і, наогул, ратавання жыцця пацыента ў крытычнай сітуацыі, гаварыць не трэба. Тое, што рэанімацыя стала выглядаць па-сучаснаму, не горш чым у сталіцы альбо абласным цэнтры, сведчыць пра ўзровень раённай медыцыны.
На ўрачыстым мерапрыемстве старшыня Жабінкаўскага райвыканкама Андрэй Кузьміч выказаў падзяку будаўнікам, камунальнікам, якія займаліся мадэрнізацыяй не толькі гэтага аддзялення, але і правялі добраўпарадкаванне тэрыторыі, заасфальтавалі пад’язныя шляхі. Усяго, паводле слоў кіраўніка раёна, было патрачана тры з паловай мільёны рублёў з абласнога і раённага бюджэтаў на паляпшэнне медыцынскай галіны раёна. Працягваецца рамонт хірургічнага і дзіцячага аддзяленняў бальніцы, падыходзіць да завяршэння рамонт паліклінікі.
Падчас адкрыцця была агучана і такая інфармацыя: за год у Брэсцкай вобласці адрамантавана 208 фельчарска-акушэрскіх пунктаў, 69 амбулаторый урача агульнай практыкі, 13 бальніц сястрынскага догляду. Значыць, сельская медыцына не застаецца па-за ўвагай дзяржавы, хоць большасць сродкаў, вядома, укладваецца ў гарадскія ўстановы.
Скажам, у канцы снежня ў Брэсцкай гарадской бальніцы хуткай медыцынскай дапамогі адкрылі новую аперацыйную. Для гэтага ў лячэбнай установе правялі рэканструкцыю аперацыйнага блока, у выніку якой на месцы дэзінфекцыйнага аддзялення паявілася другая аперацыйная траўматалогіі. Такім чынам, у траўматалагічнага аддзялення паявіліся новыя магчымасці. Работы фінансаваліся з дзвюх крыніц — за кошт пазабюджэтных сродкаў, якія зарабіла сама бальніца, і спонсарскай дапамогі. Акрамя таго, з гарадскога бюджэту было выдзелена 80 тысяч рублёў на закупку аперацыйнага стала. На наступны год для новай аперацыйнай закупяць рэнтгенаўскі апарат з электронна-аптычным пераўтваральнікам, наркозны апарат і артаскапічную стойку. Тут стане магчымым правядзенне ў тым ліку высокатэхналагічных аперацый. Дарэчы, установа аказвае экстранную і планавую траўматалагічную дапамогу не толькі жыхарам абласнога цэнтра, але і пацыентам з Брэсцкага, Маларыцкага, Камянецкага, Жабінкаўскага раёнаў.
На цырымонію ўручэння новых аўтамабіляў у Брэсцкую гарадскую паліклініку № 5 за тры дні да новага года прыбылі кіраўнікі медустаноў з усёй вобласці. У снежні было закуплена 55 спецыяльных аўтамабіляў медыцынскай дапамогі. Новыя машыны Geely Standart 1,5 MT дазволяць палепшыць даступнасць і якасць аказання медыцынскай дапамогі жыхарам рэгіёна.
Як вядома, сярод кірункаў работы ўстаноў аховы здароўя — аказанне неадкладнай дапамогі на даму, выезды ўрачэбных брыгад для аказання паліятыўнай дапамогі, выезды ўрачоў-спецыялістаў для правядзення комплексных медыцынскіх аглядаў пацыентаў з абмежаванымі рухальнымі функцыямі, забеспячэнне дзейнасці шматпрофільных міжраённых і абласных устаноў. Для ўсяго пералічанага патрэбны машыны.
Чатыры новыя аўтамабілі атрымала абласная дзіцячая бальніца, для Пінска і Пінскага раёна закуплена пяць аўтамабіляў, медыкі Пружаншчыны атрымалі два новых аўто, папоўнілі аўтапарк установы іншых райцэнтраў, а таксама Брэсцкая абласная бальніца.
Падчас уручэння машын старшыня Брэсцкага аблвыканкама Юрый Шулейка адзначыў, што ў сферы аховы здароўя дасягнуты неблагія вынікі, а на наступны год запланавана будаўніцтва і рэканструкцыя многіх медустаноў. Аб здароўі людзей як прыярытэце ўлады на месцах гаварыў губернатар і на выніковым пасяджэнні аблвыканкама. На пасяджэнні, напрыклад, прагучала, што ў 2024 годзе плануецца паставіць камп’ютарныя тамографы ў Іванаўскую, Івацэвіцкую, Пружанскую райбальніцы. Чакаюцца пастаўкі 25 аўтамабіляў хуткай дапамогі. Наперадзе — вялікая работа па будаўніцтве і рамонту ўстаноў аховы здароўя. Будзе працягнута будаўніцтва корпуса Брэсцкай абласной бальніцы, рэканструкцыя лячэбнага корпуса Брэсцкай абласной дзіцячай бальніцы. Выдзелена фінансаванне на капітальны рамонт Пінскай дзіцячай бальніцы, рамонт бальніцы ў Мікашэвічах, рэканструкцыю філіяла Давыд-Гарадоцкай бальніцы. Вялікі аб’ём работы запланаваны ва ўстановах аховы здароўя Баранавічаў.
Святлана ЯСКЕВІЧ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.