«Сучасная беларуская літаратура» — у адным праекце

Выдавецтва «Аверсэв» і Саюз пісьменнікаў Беларусі ініцыіравалі новы творчы кнігавыдавецкі праект — серыю «Сучасная беларуская літаратура», прэзентацыя якога адбудзецца 23 студзеня 2024 года Дзяржаўным літаратурна-мемарыяльным музеі Якуба Коласа. 

Мяркуецца, што свет пабачаць 12 кніг пад агульным брэндам, што адлюструе шматаблічны характар развіцця беларускай прозы, якая шукае сябе ў новых жанрах, часам парушаючы межы традыцыйных. Серыя кніг сабрала самыя значныя творы беларускай мастацкай літататуры, створаныя сучаснікамі. Творы папярэдне друкаваліся ў дзяржаўных літаратурна-мастацкіх перыядычных выданнях. Чытачоў чакае сустрэча з героямі аповесцяў, навэл, апавяданняў, дэтэктываў, фантастычных вандровак і нават аўтарскіх фантазій на тэмы беларускіх легенд і міфаў. Аўтары вядуць з чытачамі дыялог, грунтуючыся на сённяшніх рэаліях. Кожная кніга — гэта дуэт літаратуры і жывапісу: у афармленні вокладак выкарыстаны рэпрадукцыі карцін з калекцыі Нацыянальнага мастацкага музея Беларусі.

Пакуль што выйшла сем кніг. Першая − «Дараванне» − адлюстроўвае стан развіцця беларускай аповесці. Другая — «Душа твая светлая» − дэманструе, што пісьменнікі здольны на некалькіх старонках апавядання разгарнуць сюжэт, які кранае самыя тонкія стрункі чалавечых душ. У трэцяй кнізе серыі − «Чароўная скарбніца» − сабраны казачныя гісторыі трох таленавітых пісьменнікаў. Гэтыя светлыя, дзівосныя творы хочацца прачытаць і абмеркаваць перад сном разам з дзецьмі. Выдадзены таксама зборнік жаночай навэлы «Размова з люстэркам», «мужчынскія» апавяданні сучасных беларускіх аўтараў «Інструкцыя па спакушэнні замужніх жанчын», зборнік «Цені Дзікага палявання», дзе пісьменнікі працягваюць традыцыі фальклорна-міфалагічнай і гісторыка-дэтэктыўнай прозы, закладзеныя Янам Баршчэўскім і Уладзімірам Караткевічам. А «Планета ў падарунак» спадабаецца аматарам навуковай фантастыкі і містыкі. 

23 студзеня з чытачамі сустрэнуцца Алена Стэльмах, Навум Гальпяровіч, Людміла Рублеўская, Віктар Шніп, Алесь Бадак, Алесь Бычкоўскі, Алена Брава, Таццяна Дашкевіч, Валянціна Драбышэўская, Зіновій Прыгодзіч, Кацярына Хадасевіч-Лісавая, Ясенія Аляксеева, Сяргей Трахімёнак, Таццяна Сівец, Алесь Бычкоўскі, супрацоўнікі выдавецтва «Аверсэв». У душэўным дыялогу будуць разглядацца пытанні, якія хвалююць сучасных беларускіх творцаў і чытачоў, што натхняе пісьменнікаў на стварэнне новых твораў, якія тэмы імі узнімаюцца і ў чым сакрэт поспеху. Пачатак а 18 гадзіне. Адрас музея — Мінск, вуліца Акадэмічная, 5. 

Да сустрэчы! Чытайце сучасную беларускую літаратуру!

Сяргей ШЫЧКО