Вы тут

Фестывальны трамвай ездзіць у Віцебску


ХХХІІІ Міжнародны фестываль мастацтваў «Славянскі базар у Віцебску» пройдзе ў паўночнай сталіцы з 9 па 15 ліпеня. На мінулым тыдні адкрыўся продаж квіткоў на мерапрыемствы, якія пройдуць на сцэне Летняга амфітэатра, а па Віцебску прайшоў фестывальны трамвай.


«Славянка» даўно стала не толькі сусветным культурным брэндам, але і адным з самых доўгачаканых летніх фестываляў для беларусаў і гасцей краіны. Штогод арганізатары на старце продажу квіткоў, які пачынаецца яшчэ зімой, падрыхтоўваюць для прыхільнікаў творчасці — першых наведвальнікаў білетных кас — падарункі і сюрпрызы. Гэты год, які стаў у гісторыі «базара» трыццаць трэцім, не стаў выключэннем. 

16 лютага па горадзе на Дзвіне ўпершыню праехаў першы фестывальны трамвай з сімволікай форума мастацтваў. Дырэкцыя «Славянскага базару» разам з Віцебскім трамвайна-тралейбусным упраўленнем вырашылі сумясціць два сімвалы горада, тым больш, што ў мінулым годзе віцебскаму трамваю споўнілася 125 гадоў. «Разынкай» грамадскага транспарту стала нават не тэматычнае афармленне, а голас, які абвяшчае прыпынкі. «Паважаныя пасажыры! Запрашаю вас у фестывальны трамвай. З вамі Алена Спірыдовіч, і я жадаю вам добрага настрою, прыемных спадарожнікаў і шчаслівых квіткоў. Да сустрэчы на 33-м Міжнародным фестывалі мастацтваў “Славянскі базар у Віцебску”!» Да самага закрыцця форуму ў ліпені голас бяззменнай вядучай Алены Спірыдовіч будзе запрашаць жыхароў і гасцей горада на Дзвіне ў падарожжа па шостым маршруце. 

Першых пасажыраў сустракалі супрацоўнікі Цэнтра культуры «Віцебск» з паветранымі шарамі, сувенірамі і музыкай. Віцябчане з задавальненнем адказвалі на пытанні, звязаныя з гісторыяй фестывалю, спявалі і нават парадзіравалі зорак эстрады. Адным словам, арганізатарам у поўнай ступені ўдалося палепшыць гэты шэры лютаўскі дзень і нагадаць пра насычанае фестывальнае лета. 

З 16 лютага стартаваў продаж квіткоў на закрытую праграму праектаў у Летнім амфітэатры. У касах ЦК «Віцебск» па 19 сакавіка пры набыцці трох квіткоў пакупнікам прадастаўляецца зніжка на кожны трэці квіток у памеры 33 працэнтаў ад найменшага кошту квітка. Гэта акцыя не стане апошняй, прыхільнікаў форуму мастацтваў чакаюць 33 дні акцый. 

На якія праекты пакуль можна набыць валошкавыя квіткі? 9 ліпеня на сцэне амфітэатра прэзентуюць творчы праект з удзелам блогераў, маладзёжных выканаўцаў і лепшых юнацкіх калектываў «Госці з будучыні». 10 ліпеня арганізатары запрашаюць усіх ахвотных на «Рок-панараму», а ўрачыстае адкрыццё 33-га форуму адбудзецца 11 ліпеня. У пятніцу 12 ліпеня пройдзе гала-канцэрт «Саюзная дзяржава запрашае...», а ноччу з галоўнай сцэны будуць раздавацца гукі «Залатога хіта». ХХХІІІ Міжнародны конкурс выканаўцаў эстраднай песні «Віцебск» пройдзе 13 і 14 ліпеня, 14 ліпеня прыхільнікаў гумару запрашаюць на Кубак «Славянскана базару ў Віцебску» з удзелам каманд Вышэйшай лігі КВЗ і гасцей. Урачыстае закрыццё адбудзецца ўвечары 14 ліпеня, а 15 ліпеня пройдзе гала-канцэрт «Шансон ТБ — УСЕ ЗОРКІ». Квіткі на мерапрыемствы на іншых фестывальных пляцоўках з’явяцца пазней.

Аляксандра ГВОЗДЗЕВА

Фота «Витебские вести»

Выбар рэдакцыі

Грамадства

Сёння распачынае работу УНС у новым статусе

Сёння распачынае работу УНС у новым статусе

Амаль тысяча дзвесце чалавек збяруцца, каб вырашаць найважнейшыя пытанні развіцця краіны. 

Навука

Наколькі эфектыўна працуе сістэма інтэлектуальнай уласнасці?

Наколькі эфектыўна працуе сістэма інтэлектуальнай уласнасці?

Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.

Здароўе

У Нацыянальны каляндар плануюць уключыць новыя прышчэпкі

У Нацыянальны каляндар плануюць уключыць новыя прышчэпкі

Як вакцыны выратоўваюць жыцці і чаго можа каштаваць іх ігнараванне?

Грамадства

Курс маладога байца для дэпутата

Курс маладога байца для дэпутата

Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.