На пачатку пашыранай нарады, якая адбылася 20 лютага ў Цэнтральным доме афіцэраў, Аляксандр Лукашэнка адзначыў, што сустрэча ў такім складзе з’яўляецца пэўным арыенцірам на будучыню, дазволіць зарыентаваць, у якім ключы праводзіць выніковыя калегіі сілавых структур. Найбольш вострыя пытанні ў сферы нацыянальнай бяспекі абмяркоўваліся адкрыта і па-мужчынску. На пашыранай нарадзе максімальна аб’ектыўна, без прыкрас ацанілі рэальную абстаноўку, якая складваецца ў Беларусі і вакол нашай краіны.
Кіраўнік дзяржавы перакананы, што кожны на сваім узроўні ведае абстаноўку, але прапанаваў паглядзець на яе праз прызму экзістэнцыйных пагроз, якія ўзніклі ні сёння і ні ўчора. Пры гэтым Прэзідэнт падкрэсліў, што мала іх бачыць. Трэба разумець глабальную палітычную кан’юнктуру, аб’ектыўна ацэньваць прычыны і перадумовы. Асабліва цяпер, калі свет зноў падышоў да краю прорвы.
Беларускі лідар заўважыў, што няма на планеце краіны і народа, якія апошнія дзясяткі гадоў маглі б адчуваць сябе ў абсалютнай бяспецы. Ваенная сіла, па яго словах, зноў стала галоўным аргументам сусветных цэнтраў вырашэння пытанняў. Як быццам і не было мільённых страт і жахаў Першай і Другой сусветных войн.
«Цяпер нас літаральна накрыла інфармацыйнай хваляй так званага прадчування трэцяй сусветнай вайны, аб якім толькі не сказаў лянівы, — удакладніў Аляксандр Лукашэнка. — І падставы для асцярог ёсць. Паглядзіце на тэндэнцыю росту колькасці гарачых кропак. Толькі за мінулы год былі развязаны або працягваліся больш за 25 ваенных канфліктаў. Гэта ў шматлікіх рэгіёнах і кантынентах. І амаль кожны выкарыстоўваецца як нагода ўвесці міратворчы кантынгент. Спачатку развязваюцца канфлікты, а потым прапаноўваюць улагоджваць. Вы ведаеце, для чаго. Каб расставіць людзей са зброяй, пазначыць зону свайго ўплыву — гэта значыць свет метадычна ператвараецца ў палігон глабальнага супрацьстаяння».
Кажучы аб падзеях на Блізкім Усходзе, Прэзідэнт нагадаў аб тым, што ўжо адкрыта гучаць пагрозы прымянення ядзернай зброі. «Цэлыя гарады сціраюцца з твару зямлі разам з іх мірнымі жыхарамі, — канстатаваў ён. — І аказваецца, так можна рабіць, не трапляючы пад санкцыі, не становячыся ізгоем у вачах так званага цывілізаванага грамадства, носьбітаў “сапраўдных” дэмакратычных каштоўнасцяў».
Не спакайнейшая сітуацыя і на еўрапейскім кантыненце, у тым ліку каля нашых граніц. Аляксандр Лукашэнка паведаміў, што ў непасрэднай блізкасці ад Беларусі і Расіі ў рамках аперацый Альянсу, якія праводзяцца ў Еўропе, размешчаны каля 32 тысяч вайскоўцаў аб’яднаных узброеных сіл НАТА і ЗША. «Гэта больш за тысячу адзінак бронетэхнікі, каля 160 артылерыйскіх сістэм і мінамётаў, 235 самалётаў і верталётаў, — канкрэтызаваў ён. — Усё гэта сведчыць як мінімум аб дэманстрацыі сілы. Аб тым, што мы фактычна знаходзімся ў эпіцэнтры найбуйнейшага ваенна-палітычнага крызісу, які зацягнуўся, з выкарыстаннем старых, як свет, метадаў запалохвання».
Па словах кіраўніка дзяржавы, прагнозы несуцяшальныя. Беларускі лідар папярэдзіў, што апетыты і актыўнасць калектыўнага Захаду будуць толькі нарастаць. «Вашынгтон і яго саюзнікі працягнуць пашыраць НАТА — сітуацыя для іх больш як спрыяльная, — дадаў ён. — Скажу прама, без лішняй дыпламатыі: амаль усе еўрапейскія лідары ператварыліся ў падданых Злучаных Штатаў Амерыкі. У тым, чыя палітыка, чые інтарэсы дамінуюць на тэрыторыі Еўрасаюза, няма ніякіх сумненняў. Уступленне ў НАТА Фінляндыі, а вось-вось і Швецыі — гэта чарговы этап экспансіі на ўсход. Будуць уцягваць у Альянс Боснію і Герцагавіну, Малдову, Грузію, Сербію. І ўсё гэта будзе па сцэнарыі Украіны».
Прэзідэнт прапанаваў узгадаць, чым скончыліся гульні з украінскімі лідарамі ў так званую «партнёрскую» палітыку. «Фарміраваннем праслойкі агентаў перамен для наступнай змены ваенна-палітычнай арыентацыі на празаходнюю і вайной, — нагадаў ён. — Цяпер з Украінай таксама гуляюць. Прывідная перспектыва членства ў блоку паспяхова выкарыстоўваецца заходнімі куратарамі для матывацыі і падштурхоўвання кіеўскай улады да працягу баявых дзеянняў. І нас хочуць усімі праўдамі і няпраўдамі ўцягнуць у гэтую вайну».
Прэзідэнт агучыў закрытую інфармацыю: «Мы дакладна ведаем, што думае наконт гэтага начальнік генеральнага штаба адной з вядучых краін — членаў НАТА: “Мы не змаглі ўцягнуць Беларусь у канфлікт. Актыўны ўдзел Мінска ў вайне падарваў бы рэжым у Беларусі і Лукашэнкі. Гэта магчымасць усё яшчэ адкрыта”. І палякі падвіскваюць: “Вайна ва Украіне дае ім магчымасць змяніць беларускі рэжым”. Нашым беглым. Гэта цытата».
Па словах беларускага лідара, за гэтымі слоўнымі гульнямі стаіць жаданне нарэшце задаволіць свае застарэлыя тэрытарыяльныя амбіцыі. «Я ўжо пра гэта гаварыў, але паўтару яшчэ раз, — акцэнтаваў увагу кіраўнік дзяржавы. — Яны ў Еўропе лічаць, што (даслоўна) “па выніках гэтай вайны павінны адбыцца тэрытарыяльныя змены. Польшча мае законныя правы на частку сучаснай Беларусі. А “дэмакратычная Беларусь” у якасці кампенсацыі павінна атрымаць частку тэрыторыі пераможанай Расіі”. Вось і ўся стратэгія. Закрытая нарада кіраўнікоў “ястрабаў”. У гэтым іх стратэгія — нанесці глабальнае паражэнне Беларусі і Расіі, потым разабрацца і з тэрыторыямі, і іншым. Вы разумееце, які замес, якая бойня разгорнецца на гэтых землях».
Аляксандр Лукашэнка адзначыў, што фарміруюцца перадумовы для новага перадзелу еўрапейскага кантынента. І ўдзельнікамі гэтага працэсу мараць стаць нашы суайчыннікі, якія збеглі з тэрыторыі краіны. «Для нас жа больш важна звярнуць увагу на рэальнага ворага, — арыентаваў Галоўнакамандуючы. — У бенефіцыяраў вайны няма інтарэсу спыняць бойню чужога для іх народа. Занадта высокія стаўкі, ды і прыбыткі — неймаверныя. Кошт аднаго натаўскага 155-міліметровага артылерыйскага снарада, напрыклад, вырас з пачатку вайны ва Украіне ў чатары разы — з 2 да 8 тысяч еўра. Як гаворыцца, без каментарыяў».
Асаблівасць цяперашняй фазы цывілізацыйнага супрацьстаяння Усход — Захад Прэзідэнт ахарактарызаваў так — маскі поўнасцю скінуты. «Калі раней для задавальнення сваіх геапалітычных амбіцый Вашынгтон хаця б прыдумляў важкую падставу (усе памятаюць прабірку — Ірак), выкарыстоўваў мяккую і разумную так сказаць сілу, інспіраваў каляровыя рэвалюцыі, гібрыдныя і проксі-вайны па даверанасці, то сёння пераходзіць да адкрытай агрэсіі і фізічнага знішчэння непажаданых — без якіх-небудзь інфармацыйных прэлюдый», — патлумачыў кіраўнік дзяржавы.
Па словах беларускага лідара, цяпер нам скідваюць тэзіс аб тым, што шматпалярны свет — гэта свет некантраляванага росту агентаў хаосу, патрэбен адзін глабальны паліцэйскі (так пішуць вядучыя сродкі масавай інфармацыі Захаду). «Хлусня, — падкрэсліў Аляксандр Лукашэнка. — Так званы некантралюемы рост справакаваў і ўсё яшчэ спрабуе кантраляваць Вашынгтон. Гэта іх агонія. Толькі шматпалярны свет здольны ўсталяваць раўнавагу і гарантаваць бяспеку на ўсіх кантынентах. Пераход да яго вельмі стрэсавы і драматычны. А па-іншаму і не можа быць».
Кажучы аб граніцах нашай краіны і інтарэсах беларускага народа, Прэзідэнт задаў рытарычнае пытанне: якія ў заходнееўрапейскіх палітыкаў ёсць рэальныя прычыны пашыраць склад рознага кшталту кааліцый і ваенна-палітычнага альянсу? «Навошта гэтыя зусім абсурдныя неправавыя санкцыі, маштабная мілітарызацыя, дэманстрацыйная і дэманстратыўная гульня мускуламі, у тым ліку ваенная актыўнасць паблізу нашых граніц? — удакладніў ён. — Якія ў іх для гэтага падставы? Хто ім пагражае? І калі такое было ў гісторыі, каб мы камусьці пагражалі?» Кіраўнік дзяржавы нагадаў, што ўсе самыя крывавыя паходы ішлі на захад на ўсход і з ганьбай адкатваліся ў адваротны бок, і падкрсэліў, што пры гэтым гінулі мільёны людзей.
«І нагоды што тады, што цяпер надуманыя: то вера ў нас не тая, то палітычная сістэма не адпавядае нейкаму стандарту, то чыесьці правы парушаюцца, — канстатаваў беларускі лідар. — Сапраўдныя прычыны інтарэсу да нашых земляў мы ведаем, але размова не пра тое. Нам вайна не патрэбна, таму мы павінны быць да яе гатовы і ментальна, і стратэгічна. Што датычыцца ўсведамлення сур’ёзнасці моманту, адкінем усе ілюзіі аб магчымасці дыпламатычнага ўрэгулявання глабальнага канфлікту. Не ў сілах зняць напружанне і міжнароднае права. Нічога ўжо не працуе».
Прэзідэнт звярнуў увагу, што ўстаноўкі калектыўнага Захаду простыя да бязладдзя: тых, хто не з імі, будуць браць сілай. І няважна, ёсць на гэта падстава або не. «Аўтарытэт жа міжнародных арганізацый канчаткова дыскрэдытаваны, вазьміце Арганізацыю Аб’яднаных Нацый, — канстатаваў ён. — Пляцоўкі некаторых з іх адкрыта выкарыстоўваюцца для абслугоўвання інтарэсаў канкрэтных краін. Ведаеце якіх. І Беларусь не ў іх ліку. Таму за мяжой спрабуюць стварыць новыя, але ўжо падкантрольныя Злучаным Штатам і Еўрапейскаму Саюзу рэгіянальныя ініцыятывы».
Прэзідэнт перакананы: план да немагчымасці прымітыўны. Ён павінен уключыць у сябе, акрамя Польшчы, Румыніі, Венгрыі і Славакіі, нейтральныя — Украіну і Беларусь. Пры ўмове, што Беларусь будзе «адрэзана» ад Расіі. Зразумела, афіцыйны Мінск разглядаецца як сатэліт Польшчы. «Вам гэта нічога не нагадвае?», — пацікавіўся ў прысутных беларускі лідар і падкрэсліў, што сёння вельмі важна не проста рэальна ацэньваць абстаноўку і разумець, што адбываецца, але і аператыўна дзейнічаць. Пры гэтым пастаўлена задача — дзейнічаць на апярэджанне.
«Мы ўсе, у першую чаргу людзі ў пагонах, проста абавязаны быць гатовы да адбіцця любых пагроз, — падкрэсліў Галоўнакамандуючы. — Памылкі пры гэтым недапушчальныя. Вы ж ведаеце, што хаваецца пад фармулёўкай маючых адбыцца вучэнняў узброеных сіл НАТА і ЗША “Абаронца—2024”. Ведаеце, што значыць іх правядзенне на тэрыторыі краін Балтыі, Германіі і Польшчы для нас. Па атрыманых дадзеных, каля 90 тысяч вайскоўцаў з 32 краін, членаў і партнёраў Альянсу, будуць стаяць на парозе нашага дома, адпрацоўваць стратэгію (цытата) “адлюстравання спробы расійскай агрэсіі супраць адной з краін Альянсу”. Як яны збіраюцца адлюстроўваць агрэсію, мы ў курсе. Спецслужбы трымаюць сітуацыю на кантролі».
«Мы павінны быць гатовыя да таго, што яны прыдумаюць новыя трыгеры для дэстабілізацыі грамадства»
Кіраўнік дзяржавы дадаў, што ўсе здабытыя разведкай сцэнарыі шматлікага роду правакацый, правядзення экстрэмісцкіх акцый з задзейнічаннем баевікоў, якія знаходзяцца на тэрыторыі Украіны, Польшчы і Літвы, беларускаму боку вядомыя і, наколькі гэта магчыма, неадкладна надаюцца агалосцы.
«Вось і цяпер падтрымаем гэтую традыцыю: яшчэ адна аператыўная інфармацыя, — падзяліўся эксклюзіўнымі звесткамі Аляксандр Лукашэнка. — Даслоўна цытую (гэта ўжо для палякаў важна): “Польская і амерыканская разведкі рыхтуюць буйнамаштабную правакацыю супраць цывільнага насельніцтва Польшчы, у якой абвінавацяць Расію і Беларусь”. Разумееце, патрэбна нагода, заварушка. Усё старое, як свет. Калісьці фашысты, Гітлер падрыхтаваў такую аперацыю на граніцы з Польшчай, каб справакаваць пачатак ваенных дзеянняў. Цяпер — гэтыя мярзотнікі. Ну ладна амерыканцы: ім усё роўна, што апошні ўкраінец або апошні паляк памрэ. Але як могуць палякі з амерыканцамі дамаўляцца аб такім сцэнарыі — гэта пытанне. Пасля гэтага пачнецца енк, што ў нас, што ў іх: “Ах, тут ён нагнятае сітуацыю, палохаючы палякаў, гэтага не можа быць”. Слухайце, я сказаў, а вы рабіце высновы. Я кажу палякам і іншым. Пажывём — убачым. Але мы папярэдзілі па-братэрску польскі народ, каб былі акуратныя і асцярожныя».
Прывёў беларускі лідар і яшчэ адзін факт з даных разведкі: «Варшава спрабуе завербаваць высокапастаўленых беларускіх чыноўнікаў», якія змогуць замяніць нашых «ціхушак» і «лахушак». «Разумеюць: яны (“ціхушкі” і “лахушкі”. — “Зв”.) не здольныя перавярнуць Беларусь, — канстатаваў Аляксандр Лукашэнка. — Яны не здольны рэалізаваць сцэнарый ужо не каляровай пэўнай рэвалюцыі і пэўнага марш-кідка сюды, у Беларусь. І не змогуць рэалізаваць узброенае ўварванне. Мы сочым за гэтым працэсам. Мы бачым іх падыходы да кіраўнікоў як у сферы ваеннай, так і цывільнай у Беларусі».
Прэзідэнт удакладніў, што яны будуць шукаць і ствараць новых лаяльных Захаду і больш эфектыўных дзеячаў у нашай краіне. Прычым, па словах кіраўніка дзяржавы, у ход пойдуць усе метады — ад банальных подкупу і шантажу да пагроз жыццю і здароўю.
«У фокусе ўвагі можа быць хто заўгодна, — папярэдзіў Аляксандр Лукашэнка. — Усе павінны разумець рэальнае становішча і нашу дасведчанасць і тут, і там. Гэта прынцыповая пазіцыя. Тым больш цяпер, напярэдадні рознага роду палітычных падзей. У бліжэйшы час пройдуць найважнейшыя для краіны мерапрыемствы: адзіны дзень галасавання, фарміраванне УНС. Нас зноў паспрабуюць расхістаць. Гэта відавочна. Схема не змянілася. Але мы павінны быць гатовыя да таго, што яны прыдумаюць новыя трыгеры для дэстабілізацыі грамадства».
Прэзідэнт агучыў тры асноўныя сцэнарыі дзеянняў «збеглых» і іх замежных куратараў ад спецслужбаў у дачыненні да нашай краіны.
«Першы, самы жаданы для іх. Гэта арганізацыя дзяржаўнага перавароту ці гвалтоўны захоп улады непасрэдна ў перыяд правядзення электаральных кампаній. Але пры гэтым самі ацэньваюць яго як малаверагодны. Асабліва ў перыяд адзінага дня галасавання — гэта значыць у гэтыя дні. Рэальных перадумоў для расхіствання сітуацыі па аналогіі з 2020 годам яны пакуль не бачаць», — сказаў кіраўнік дзяржавы.
«Другі, асноўны. Выкарыстанне бягучай выбарчай кампаніі ў якасці рэпетыцыі і пачатковага этапа падрыхтоўкі дзяржперавароту ў ходзе маючых адбыцца прэзідэнцкіх выбараў у 2025 годзе. Менавіта на гэты сюжэт будуць кінуты ўсе асноўныя сілы і рэсурсы, актываваны працэс пошуку новых кропак кіпення ў грамадстве, здольных справакаваць новую хвалю пратэсту», — канстатаваў беларускі лідар.
Ён паўтырыў, што казаў раней: «За намі вельмі ўважліва сочаць і чакаюць, калі мы, улада, зробіць памылку, каб яе максімальна выкарыстоўваць у сваіх мэтах. Вось гэтага нам дапусціць нельга».
І, нарэшце, трэці сцэнарый «збеглых» — рэзервовы. «Гульня ў доўгую» — з шырокім задзейнічаннем інструментаў «мяккай сілы» на выпадак правалу першых двух варыянтаў развіцця падзей. Па сутнасці, гэтая гульня вялася, колькі існуе суверэнная Беларусь«, — звярнуў увагу Прэзідэнт. Па яго меркаванні, трэці сцэнарый рэальны, бо першы і другі ў нашай краіне не дапусцяць.
Беларускі лідар канстатаваў, што сёння асобныя інструменты гэтай «мяккай сілы» нейтралізаваны. Кардынальна перагледжаны падыходы да дзейнасці антыбеларускіх фондаў і нібыта праваабарончых арганізацый унутры краіны. Праведзена перарэгістрацыя партый. Аляксандр Лукашэнка заўважыў, што людзі ўбачылі антынацыянальную сутнасць так званых лідараў апазіцыі, якія жабруюць і поўзаюць у заходніх сталіцах. «У Беларусі яны па-за законам, але ўплываць на эмацыйна ўразлівых людзей праз сацсеткі, месенджары, распрацоўваць новыя каналы сувязі і кіравання масамі спрабуюць і будуць спрабаваць, — папярэдзіў ён. — Да таго ж яны ўлічылі свае памылкі. І мы не павінны жыць у ілюзіі абсалютнай перамогі. Для “збеглых” поспех антыбеларускай кампаніі — пытанне выжывання. Радзіма прададзена, грошы заканчваюцца, а жыццё “ў еўропах” дарагое. Таму пойдуць на ўсё».
Што датычыцца глабальных гульцоў на палітычнай арэне, там, па словах беларускага лідара, стаўкі яшчэ вышэйшыя. «Справа нават не ў страчаных мільёнах, выдаткаваных на мецяжы, якія не атрымаліся, — удакладніў Прэзідэнт. — Гаворка ідзе аб рэпутацыйных стратах на ўзроўні міжнароднай палітыкі. Гегемону надакучыла ламаць зубы аб Беларусь, якую нават не кожны амерыканец знойдзе на карце свету».
Аляксандр Лукашэнка заявіў аб неабходнасці зверыць гадзіннік. Ëн пацікавіўся, наколькі сілавы блок краіны гатовы да магчымых правакацый і нестандартных сітуацый у ходзе маючых адбыцца палітычных кампаній з улікам сітуацыі ў рэгіёне і ў свеце. Пры гэтым кіраўнік дзяржавы адзначыў, што моцныя бакі вядомыя, але больш важна паглядзець, дзе трэба дапрацаваць, дзе трэба ўзмацніцца, зыходзячы з сучасных рэалій. Менавіта на гэтых пытаннях Прэзідэнт патрабаваў зрабіць акцэнт у сваіх дакладах ключавых міністраў сілавога блоку. Галоўнакамандуючы арыентаваў быць максімальна гатовымі да нейтралізацыі рызык і пагроз. Для гэтага неабходна забяспечыць вырашэнне першачарговых задач.
Першая задача — узяць на асаблівы кантроль рэалізацыю сістэмных мер па павышэнні абараназдольнасці краіны, падтрыманні баявога патэнцыялу ўсіх суб’ектаў ваеннай арганізацыі дзяржавы. «Пры гэтым хачу папярэдзіць: шалёных грошай у краіны няма, — заўважыў Аляксандр Лукашэнка. — Усё, на чым нам трэба сканцэнтравацца, — гэта контрбатарэйная барацьба, беспілотнікі, РЭБ. І самае галоўнае, я размаўляў са многімі генераламі, камандзірамі, хлопцамі, вагнераўцамі, якія адтуль прыйшлі, усё вырашае на полі бою ў сучаснай вайне ні ракеты і “калібры”, пушчаныя з Чорнага мора і гэтак далей (гэта важна, але ў вайне так не пераможаш), а звычайны салдат са звычайнай стралковай зброяй: аўтаматамі, кулямётамі (пажадана добрымі, сучаснымі), гранатамётамі і іншай стралковай зброяй».
Не варта скідаць з рахунку і міны. Прэзідэнт расказаў, як у свой час яму прапаноўвалі іх знішчыць. Аднак кіраўнік дзяржавы не пагадзіўся. «У сучаснай вайне без мін немагчыма, — перакананы Галоўнакамандуючы. — Нягледзячы на высокатэхналагічнасць сучаснай вайны, вельмі важнымі застаецца салдат і яго ўзбраенне, асабліва ў нашай лясіста-балотнай мясцовасці. Вельмі важныя апорныя пункты для супраціўлення».
Пры гэтым кіраўнік дзяржавы адзначыў, што воінскія часці і падраздзяленні Дзяржпагранкамітэта і Узброеных Сіл упэўнена прыкрываюць нашы паўднёвыя і заходнія рубяжы. «Дзякуй хлопцам, якія сёння стаяць на граніцы: і пагранічнікі, і наша армія, — падкрэсліў Галоўнакамандуючы. — Вядома, у гэтай місіі вялікае значэнне мае маральная гатоўнасць ваеннаслужачых сілавога блоку абараняць Радзіму. Ведаю, што ў дадзеным пытанні ў нас усё ў парадку, нават больш чым. У шэрагах Узброеных Сіл, не скажу аб грамадстве ў цэлым. Ёсць гарачыя галовы, якія рвуцца хоць заўтра ў бой. А калі глядзець на сітуацыю ў Беларусі праз прызму гібрыднай вайны, мы ўжо даўно ваюем, як я не раз казаў, і робім усё, каб атрымаць перамогу без бітвы. Таму нарошчваем баявую магутнасць нашай арміі».
З мэтай умацавання абараназдольнасці скарэкціравана падрыхтоўка асабовага складу сілавых ведамстваў з улікам спецыфікі вядзення сучасных войнаў. Далі свае вынікі праведзеныя па даручэнні кіраўнка дзяржавы сумесныя заняткі з падраздзяленнямі Узброеных Сіл Расіі, ПВК «Вагнер». «Істэрыя ў заходніх СМІ толькі пацвердзіла своечасовасць і правільнасць гэтага рашэння, — канстатаваў беларускі лідар. — Мы вывучылі рэальны досвед вядзення бою. Яго неабходна аператыўна ўкараняць у паўсядзённую практыку і падрыхтоўкі ўсіх ваеннаслужачых, але асабліва спецпадраздзяленняў».
Узмацняецца ваенна-тэхнічны патэнцыял Беларусі. У строй пастаўлены найноўшыя ўзоры беларускага РСЗА «Паланэз-М» далёкасцю да 300 кіламетраў. На ўзбраенне паступілі два зенітныя ракетныя дывізіёны С-400 і два дывізіёны ракетных комплексаў «Іскандэр-М». Прэзідэнт адзначыў, што пастаўка новых узораў тэхнікі будзе працягнута.
Кіраўнік дзяржавы нагадаў, што на тэрыторыі краіны размешчана расійская тактычная ядзерная зброя. «Сёння гэта найважнейшы элемент стрымлівання любога праціўніка, — падкрэсліў ён. — Мы валодаем усім неабходным, каб гарантавана абараніць сябе і, як кажуць вайскоўцы, нанесці праціўніку непрымальную шкоду. У гэтым сутнасць нашай стратэгіі».
Праведзеныя праверкі баявой і мабілізацыйнай гатоўнасці войскаў пацвердзілі здольнасць злучэнняў і часцей выканаць задачы па прызначэнні. І надалей гэтаму пытанню будзем удзяляцца першарадная ўвага. Аляксандр Лукашэнка акцэнтаваў, што мы ўпершыню ў гісторыі краіны адмабілізавалі цэлую механізаваную брыгаду Заходняга аператыўнага камандавання. «Таксама правялі шэраг праверак падраздзяленняў сіл неадкладнага рэагавання, удакладніў ён. — Пры гэтым змадэлявалі рэальныя ўмовы эскалацыі канфлікту. Як мне паведамляюць, што з задачай у цэлым справіліся».
Разам з тым, як канстатаваў беларускі лідар, выяўлены недапрацоўкі ў якасці падрыхтоўкі войскаў і, у першую чаргу, у прафесійнай падрыхтоўцы афіцэраў. Пэўныя праблемы ёсць з падтрыманнем у спраўным стане тэхнікі і ўзбраення, утрыманнем запасаў ракет, боепрыпасаў і іншых матэрыяльных сродкаў. Не абыходзіцца без недахопаў і ў планаванні і прымяненні сіл неадкладнага рэагавання, нясенні баявога дзяжурства па супрацьпаветранай абароне. Праводзіцца адпаведная работа па ўхіленні гэтых недахопаў.
«Паважаныя мужыкі, я буду рабіць усё, як Прэзідэнт, для таго, каб вы ў тыле мелі менш праблем», — адзначыў кіраўнік дзяржавы. Ëн адзначыў, што ваеннаслужачыя будуць знаходзіцца ў прыярытэце ў вырашэнні жыллёвага пытання. «Мы вырашым вашу праблему на працягу двух-трох бліжэйшых гадоў, — паабяцаў Аляксандр Лукашэнка. — Але не гэта галоўнае. Я міністра заўёды папярэджваю: звярніце асаблівую ўвагу на тэхніку і ўзбраенне, боепрыпасы. Якая вайна, якое супраціўленне, калі танк не можа даехаць да палігона або нейкая іншая браніраваная машына? Гэта галоўнае. І мы гэтаму кірунку ўдзялялі і будзем удзяляць самую сур’ёзную ўвагу. Трэба гэта зрабіць, мужыкі. Трэба трымаць у цэласнасці і захаванасці зброю».
Прэзідэнт звярнуў увагу, што для людзей у пагонах у прынцыпе недапушчальныя фармалізм і разгільдзяйства. «Павінны быць жалезная дысцыпліна і найвышэйшая прафесійная вывучка, — канкрэтызаваў ён. — Тут таксама ёсць пытанні. Без усвядомленага стаўлення да службы, без разумення сур’ёзнасці моманту ўсе нашы дзеянні асуджаныя на правал. І ніякія сучасныя ўзбраенні і тэхналогіі не дапамогуць. Работа з людзьмі павінна быць на першым месцы. Маральны стан і дух кожнага афіцэра, які перадаецца байцам, — найважнейшы элемент».
Галоўнакамандуючы паставіў Міністэрству абароны задачу на наступны год — якаснае пераўтварэнне арміі і ўдасканаленне сістэмы абароны краіны. Даручана ўдзяліць прыярытэтную ўвагу баявой падрыхтоўцы воінскіх часцей і падраздзяленняў. Тым больш што ва Узброеных Сілах 2024 год з’яўляецца Годам палявой вывучкі.
«Урокі сучаснай вайны мы вывучылі на прыкладзе Украіны, і павінен сказаць, мы зрабілі адпаведныя высновы, — канстатаваў Аляксандр Лукашэнка і паставіў задачу звярнуць асаблівую ўвагу на пытанне супрацьдзеяння беспілотным лятальным апаратам. — Сёлета першарадную ўвагу я буду ўдзяляць гэтаму, бо змагацца з беспілотнікамі, выходзяць з ружжом, або з ружжом рэбаўскім, або “Асой” і яшчэ горш, “С-400”, — гэта страляць па веаб’ях з гарматы. Усе гэтыя сістэмы кіруюцца праз электроніку. Мы ж вялікія, мы ж гэта ўмеем рабіць, гэта ж наша тэма. Таму мы павінны навучыцца падаўляць беспілотнікі. Ужо, я гляджу па ўкраінскай вайне, тэрмін з’явіўся — “рой беспілотнікаў”. І запускаюць іх сотні на аб’екты, з вельмі небяспечнымі мінамі і снарадамі, якія знішчаюць масу людзей. Збіць іх практычна немагчыма. Таму РЭБ (радыёэлектронная барацьба. — “Зв”.) і яшчэ раз РЭБ».
Прэзідэнт паставіў задачу засяродзіць увагу на фізічнай, агнявой і тактычнай падрыхтоўцы ваеннаслужачых, пры гэтым трэба сысці ад нікому непатрэбнай «муштры». «Катэгарычна папярэджваю: ад гэтага трэба сыходзіць. Мы кампактная краіна, у нас не служаць хлопцы з Далёкага Усходу, дзесьці заслужылі — трэба і ў адпачынак адпусціць», — сказаў ён.
Кіраўнік дзяржавы адзначыў, што сёння кожны, хто стаіць на абароне дзяржавы або будзе прызваны пад ружжо, павінен дакладна разумець, як яму дзейнічаць, якія задачы ён выконвае. Гэта датычыцца ўсіх, у тым ліку тэрытарыяльнай абароны і народнага апалчэння. Фарміраванні створаны, праведзена сур’ёзная работа па ўдасканаленні заканадаўства. «Мы ўсе разумеем, што для дасягнення пастаўленай мэты толькі законаў недастаткова, — перакананы Прэзідэнт. — Сістэма падрыхтоўкі і арганізацыі народнага апалчэння на практыцы павінна працаваць, як гадзіннік. Неабходна ўлічыць ужо вядомы досвед — украінскі сцэнарый, калі на руках у насельніцтва бескантрольна гуляе зброя. Гэты сцэнарый не для нас, ён недапушчальны».
Разам з тым, як лічыць кіраўнік дзяржавы, на сітуацыю ва Украіне мы ў прынцыпе павінны глядзець як на ўрок, пастаянна ўдасканальваючы падрыхтоўку артылерыстаў, адточваючы метады вядзення контрбатарэйнай барацьбы, мадэрнізуючы сродкі радыёэлектроннай разведкі. «І давайце шчыра: у дачыненні да беспілотнай авіяцыі, дронаў-камікадзэ, маштабнага абсталявання імі арміі, падрыхтоўкі аператараў дронаў мы ўжо адстаем, — канстатаваў беларускі лідар. — А зрабіць трэба было яшчэ ўчора. Таму неабходна наганяць упушчанае. І не толькі Мінабароны, але і МУС, Дзяржпагранкамітэту. Савету бяспекі трэба ўзяць гэтае пытанне на кантроль і працягнуць праверкі якасці падрыхтоўкі асабовага складу сілавых ведамстваў у гэтым годзе».
Яшчэ адна задача — непрыступнасць нашых рубяжоў. «Для аховы граніцы прыцягнуты не толькі пагранічнікі, але і іншыя сілавыя органы, — яшчэ раз паўтарыў Прэзідэнт. — Гэта сіметрычны адказ на нарошчванне пагранічнай інфраструктуры з боку сумежных краін, тэхнічныя магчымасці якой выходзяць далёка за рамкі заяўленых мэт. Аб глабальных прычынах і пагрозах сказана. Усе спадарожныя задуме суседзяў правакацыі, уключаючы незаконнае выцясненне ў Беларусь бежанцаў з тэрыторый Польшчы, Літвы і Латвіі (выкідванне іх проста праз граніцу, часам трупаў), закрыццё шэрагу пунктаў пропуску, штучныя абмежаванні транзіту грузаў, мы ацэньваем адэкватна і рэагуем».
Аднак, як падкрэсліў Галоўнакамандуючы, да чаго рыхтуюцца па той бок граніцы — сёння не галоўнае пытанне. «Значна важней разумець, ці гатовы мы быць на крок наперадзе ў любым задуманым для нас сцэнарыі, — канкрэтызаваў ён. — Гэтае пытанне нацыянальнай бяспекі, абароны нашых нацыянальных інтарэсаў. А ўсё пачынаецца з граніцы. Праспаць любы сігнал, правакацыю — для нас смерці падобна».
Кіраўнік дзяржавы нагадаў, што зацверджаны рашэнні па ахове Дзяржаўнай граніцы, а таму патрабуе іх няўхільнага выканання. Па яго словах, з улікам беспрэцэдэнтна блізкага да нас размяшчэння ваеннага кантынгенту НАТА і правядзення маштабных вучэнняў Альянсу ўзаемадзеянне органаў пагранічнай службы з Узброенымі Сіламі павінна быць арганізавана на найвышэйшым узроўні. Пры неабходнасці пастаўлена задача падключаць іншыя ведамствы.
Трэцяя задача — павысіць эфектыўнасць дзяржаўнай сістэмы рэагавання на акты тэрарызму з боку тэрарыстычных арганізацый і незаконных узброеных фарміраванняў. «Праведзеныя па маім даручэнні праверкі паказалі, КДБ як каардынатар у гэтай сферы ў цэлым гатовы арганізаваць работу сілавога блока ў выпадку закіду ў нашу краіну баевікоў і здзяйснення тэрактаў, — канстатаваў Аляксандр Лукашэнка. — Але на тактычным узроўні зладжанасць дзеянняў прыданных падраздзяленняў усё яшчэ далёкая ад дасканаласці».
Пры гэтым кіраўнік дзяржавы заўважыў, што матывацыя і гатоўнасць асабовага складу спецпадраздзяленняў сілавых ведамстваў да выканання задач па спыненні актаў тэрарызму высокая. «Але прафесійна павінны быць падрыхтаваны ўсе: не толькі спецпадраздзяленні, — удакладніў ён. — Варта дапрацаваць алгарытмы дзеянняў суб’ектаў сістэмы рэагавання на акты тэрарызму і экстрэмізму, працягнуць далейшае баявое зладжванне і якасную баявую падрыхтоўку ўсіх, хто ўдзельнічае ў гэтай дзейнасці».
Прэзідэнт нагадаў, што сёння з-за мяжы асобныя прыхільнікі «перамен» заяўляюць аб намеры зайсці ў Беларусь для яе «вызвалення». «Захапіць хаця б які-небудзь раённы цэнтр (кшталту Маларыты або Кобрына), аб’явіць там “незалежную Беларусь” і адсюль пачынаць дзейнічаць, — патлумачыў кіраўнік дзяржавы. — Ім трэба легалізавацца ў Беларусі хаця б на квадратным метры, і вырашаць яны гэтую праблему будуць сілавым шляхам. Адзін метад застаўся — узброеная барацьба, на гэта даюць грошы. Рыхтуюць харугвы, палкі, як яны іх называюць, і гэтак далей. Мэта — як мінімум захапіць кавалак зямлі і аб’явіць сябе дзеючай уладай».
Па словах Прэзідэнта, нашы «збеглыя» і іх куратары ад спецслужбаў вядуць мэтанакіраваны пошук і вярбоўку асоб, якія могуць здзейсніць тэракты і дыверсіі. Фактаў хапае. «Гэта добра, што тэрарысты ўстаноўлены і затрыманы, — падкрэсліў беларускі лідар. — Але паўстае пытанне: калі ў нас граніца на замку, то як гэтыя баявікі змаглі даставіць сродкі паражэння і арганізаваць схроны? Гэтую праблему я бачу. Пытанне патрабуе дэталёвага аналізу для недапушчэння падобных выпадкаў далей».
У сувязі з гэтым кіраўніком дзяржавы даручана праверыць сістэмы аховы аб’ектаў сілавых ведамстваў Міністэрства абароны, Дзяржаўнага пагранічнага камітэта, КДБ, МУС, грамадзянскай крытычнай інфраструктуры. Створаная антыдыверсійная сістэма дазваляе забяспечыць іх абарону аб’ектаў. Камітэту дзяржбяспекі даручана працягнуць удасканаленне сістэмы рэагавання на акты тэрарызму. «Усё павінна працаваць дакладна, усе дзеянні давесці да аўтаматызму», — паставіў задачу кіраўнік дзяржавы.
Чацвёртая задача — забеспячэнне найвышэйшага ўзроўню кібербяспекі краіны. Прэзідэнт канстатаваў, што кібератакі — гэта біч сучаснага лічбавага грамадства. Аднак зроблена нямала для абароны дадзеных крытычнай інфармацыйнай інфраструктуры. Кіраўніком дзяржавы падпісаны адпаведны Указ («Аб кібербяспецы»), у якім замацаваны асноўныя напрамкі стварэння нацыянальнай сістэмы забеспячэння кібербяспекі. Аператыўна-аналітычным цэнтрам у гэтым годзе ўпершыню праведзена трэніроўка з сіламі забеспячэння нацыянальнай бяспекі Рэспублікі Беларусь.
«Чакаю дакладу аб выніках, — адзначыў Аляксандр Лукашэнка. — Але ўжо цяпер можна казаць, што праблемныя пытанні ёсць. Нягледзячы на меры, якія прымаюцца, працягваюцца ўзломы дзяржаўных інфармацыйных рэсурсаў. Так, метады ўвесь час удасканальваюцца, абсалютную абарону ад кібератак не гарантуе ні адна сістэма абароны. Але мы павінны мінімізаваць рызыкі. Асабліва ў востры перыяд. І рэагаваць трэба».
У якасці прыкладу Аляксандр Лукашэнка прывёў інфармацыйны ўкід аб нібыта наяўным запасе вакцын ад каранавіруса для кіраўніка дзяржавы ў час пандэміі. «Я сёння прачытаў абсурдную рэч: аказваецца, у час пандэміі для Прэзідэнта Беларусі быў сфарміраваны нейкі там запас вакцын, — удакладніў ён. — Але я ўвогуле не вакцынаваўся, і маю пазіцыю вы ведаеце ў сувязі з гэтай пандэміяй».
У фэйкавай інфармацыі прыведзена спасылка на нейкія размовы ўрачоў, якія абмяркоўвалі, дзе схаваць вакцыну. «І на што спасылаюцца? Што кіберпартызаны або нехта там узламалі нейкі акаўнт, сайт або сервер», — заўважыў Аляксандр Лукашэнка. Абсалютна відавочна, што пытанні, якія датычацца вакцын або якіх-небудзь лекаў для кіраўніка дзяржавы, не ўваходзяць у кампетэнцыю звычайных медыкаў. «Якія ўрачы будуць абмяркоўваць лекі, вакцыны для Прэзідэнта? — задаў рытарычнае пытанне беларускі лідар. — Начальнік Службы бяспекі — адзіны чалавек, які можа ведаць гэтую інфармацыю, але ён упершыню чуе тое, аб чым я сказаў. Яшчэ раз падкрэсліваю: я чалавек, які не вакцынаваўся. Гэта не значыць, што так трэба рабіць, але так у мяне склалася».
Прэзідэнт звярнуў увагу, што рознага кшталту інфармацыйныя ўкіды і кібератакі будуць працягвацца, а таму іх нельга пакідаць без увагі. «Пастаянна будуць падточваць нашых людзей, улазіць у іх мазгі, — канкрэтызаваў Аляксандр Лукашэнка. — Трэба ўмець на гэта рэагаваць. Мы гэта ўмеем рабіць. Нешта робім, але пакуль слаба».
Беларускі лідар парэкамендаваў не перабольшваць роль электронных СМІ. «Жывое слова ў зносінах з людзьмі было і ёсць галоўным інструментам для таго, каб захаваць маналіт і адзінства нашых людзей», — падкрэсліў Прэзідэнт.
Наступная задача, якая адносіцца да ўсіх праваахоўных органаў, у першую чаргу МУС і МНС, — людзі павінны адчуваць сябе ў бяспецы дома, на працы, на вуліцы ў любы час сутак.
Кажучы аб зніжэнні злачыннасці, кіраўнік дзяржавы адзначыў, што паказчыкі ўвогуле нядрэнныя. Зменшылася колькасць асабліва цяжкіх і менш цяжкіх супрацьпраўных дзеянняў. Разам з тым адзначаюцца і негатыўныя тэндэнцыі. Расце колькасць махлярстваў, вымагальніцтваў і кіберзлачынстваў. «Тут важна, каб за сухой справаздачнасцю не заставалася нявырашаных пытанняў, паламаных лёсаў людзей, — звярнуў увагу беларускі лідар. — Я ўжо даў адпаведнае даручэнне па ўдасканаленні норм крымінальнага заканадаўства. Трэба аператыўна правесці гэтую работу».
Як Прэзідэнту дакладваюць, прыняты дадатковыя меры па аператыўным раскрыцці злачынстваў экстрэмісцкай накіраванасці. «Сёння гэта найважнейшы аспект падтрымання правапарадку, спынення дзеянняў адмарозкаў, а таксама прафілактыка тых, хто збочыў, хто яшчэ не да канца разумее, на што іх нацэльваюць замежныя куратары», — адзначыў Аляксандр Лукашэнка.
Ëн канстатаваў, што ўзровень злачыннасці — гэта своеасаблівы зрэз праблем грамадства (як відавочных, так і латэнтных), індыкатар рэальных выклікаў і пагроз нацыянальнай бяспецы. «Проста выяўляць і спыняць іх недастаткова, — патрабуе кіраўнк дзяржавы. — Павінна быць зваротная сувязь паміж усімі суб’ектамі барацьбы з супрацьпраўнымі дзеяннямі і грамадствам. І абсалютна недапушчальна, каб самі супрацоўнікі праваахоўных органаў парушалі закон».
Кажучы аб абароненасці насельніцтва ад стыхійных бедстваў, Прэзідэнт пацвердзіў, што колькасць пажараў і колькасць загінулых на іх зменшылася. Але, па яго словах, варта імкнуцца да нулявых паказчыкаў. «Гінуць і дзеці, што патрабуе прынцыповых мер па прадухіленні такіх трагедый», — канкрэтызаваў Аляксандр Лукашэнка і адзначыў, што за кожную смерць трэба адказваць.
Таксама ён звярнуў увагу на тое, што не да канца вырашана пытанне абсталявання інтэрнатаў, аб’ектаў з масавым знаходжаннем людзей сістэмамі аўтаматычнай пажарнай сігналізацыі і апавяшчэння аб пажары. «Што гэта, праблема? Ці хтосьці не хоча гэтым займацца? Толькі давайце без перабору, каб заўтра эканоміка не спынілася», — арыентаваў кіраўнік дзяржавы.
Рэзюмуючы, Прэзідэнт падкрэсліў, што глядзіць на работу сілавога блока комплексна і дастаткова крытычна, нават прыдзірліва. «Час такі, кожная памылка можа вельмі дорага нам абысціся, — патлумачыў ён. — Цана — мір і бяспека людзей».
Вераніка КАНЮТА
Фота БелТА
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
