Капыльскі ТЦСАН у гэтым годзе адзначыць 20-гадовы юбілей

Сёлета Капыльскі тэрытарыяльны цэнтр сацыяльнага абслугоўвання насельніцтва адзначыць свой 20-гадовы юбілей. За гэты час установа развівалася і ўдасканальвалася. Што ж тут змянілася з 2004 года?

Пачнём з таго, што першапачаткова цэнтр сацыяльнага абслугоўвання насельніцтва размяшчаўся ў аднапавярховым будынку былога дзіцячага садка. Усё змянілася пасля 2017 года, калі цэнтр уключылі ў інвестыцыйную праграму.

І вось цяпер перад жыхарамі і гасцямі Капыля паўстаў новы сучасны цэнтр сацыяльнага абслугоўвання насельніцтва з асобным крызісным пакоем, пашыраным пляцам для працаўнікоў і новымі пляцоўкамі для аддзялення дзённага знаходжання. А яшчэ з вокнаў новага цэнтра адкрываецца від на маляўнічы тэрапеўтычны парк, дзякуючы якому ўстанова ў свой час заняла першае месца ў краіне па добраўпарадкаванні тэрыторыі.

На працягу ўсёй гісторыі развіцця цэнтра каля руля стаяла адданая сваёй справе дырэктар Святлана Маліноўская. У 2017 годзе яна стала чалавекам года Міншчыны, а ў 2022-м была ўзнагароджана Падзякай Прэзідэнта за шматгадовую плённую работу, значны асабісты ўклад у рэалізацыю дзяржаўнай палітыкі ў галіне сацыяльнай абароны насельніцтва. Паводле яе слоў, праца ў гэтай сферы ўнікальная, бо патрабуе асаблівай увагі і цярпімасці, а таксама любові да блізкіх.

Сапраўды, працаваць з людзьмі няпроста. Асабліва з тымі, у каго здарылася бяда. Аднак супрацоўнікі цэнтра ўсімі сіламі імкнуцца палепшыць жыццё тых, хто мае патрэбу ў дапамозе.

— Людзі прыходзяць да нас у цэнтр са сваімі праблемамі і цяжкасцямі. Ім здаецца, што іх ніхто не разумее, але калі яны працуюць разам з намі, то атрымліваюць падтрымку, дапамогу, а таксама ўвагу да сваіх праблем, — расказвае Святлана Маліноўская.

Сярод асноўных кірункаў работы цэнтра сацыяльнага абслугоўвання насельніцтва — садзейнічанне ў сацыялізацыі і адаптацыі інвалідаў.

— У 2004 годзе да нас прыйшлі маладыя людзі, якія ў сям’і былі пад гіперапекай: у асноўным за іх усё рабілі бацькі, — дзеліцца Святлана Маліноўская. — Для іх распрацавана спецыяльная праграма, у рамках якой праводзяцца заняткі. Вынікі выдатныя. Цяпер яны ўмеюць самастойна варыць сабе кашу, рабіць чай, салату, бутэрброды. Адным словам, пачалі разумець, што такое побыт, і актыўна ўключацца ў яго.

За час існавання цэнтра змяніўся і кірунак работы з пажылымі людзьмі. Калі раней гэта было больш пра добрае баўленне часу, то цяпер да гэтага дадалася яшчэ і прафілактыка дэменцыі. Так бы мовіць, сумяшчэнне прыемнага з карысным.

Акрамя таго, у сценах праводзіцца вялікая работа па навучанні блізкіх сваякоў догляду цяжкахворых.

— Калі ў сям’і адбываецца бяда, сваякі пачынаюць задавацца пытаннямі: як жа правільна перавярнуць хворага, як пакласці, якія ёсць сродкі рэабілітацыі, — распавядае дырэктар цэнтра. — Для гэтага ў нас абсталяваны спецыяльны пакой. Людзі прыходзяць, і мы іх навучаем усім тонкасцям, у прыватнасці таму, як захаваць сваё здароўе, даглядаючы цяжкахворага.

Таксама ў цэнтры аказваюцца паслугі сядзелкі. Так, за 2023 год гэтым скарысталася 20 грамадзян.

— Такім чынам, мы даём магчымасць сваякам цяжкахворых хадзіць на працу, не змяняючы свой лад жыцця, — адзначае Святлана Маліноўская. — Яны атрымліваюць даход для сваёй сям’і і маюць магчымасць аплачваць сядзелку, якая даглядае цяжкахворага на працягу дня.

У цэлым цэнтр на працягу ўсіх 20 гадоў дынамічна развіваецца. Больш за тое, ён працягвае рухацца ў тым жа рэчышчы, рэалізоўваючы ўсё новыя і новыя праекты. Яго візітная картка — не толькі вялізны спектр паслуг, новы сучасны будынак з маляўнічай тэрыторыяй, але і прыемны, спагадны калектыў.

Штогод калектыў цэнтра атрымлівае заслужаныя ўзнагароды за сваю працу. Так, па выніках 2023 года цэнтр стаў пераможцам сацыяльна-эканамічнага спаборніцтва сярод цэнтраў сацыяльнага абслугоўвання насельніцтва Мінскай вобласці, пераможцам абласнога этапу конкурсу «105 ідэй для развіцця галіны» ў намінацыі «Разам мы сіла». А таксама пераможцам раённага агляду-конкурсу на найлепшую арганізацыю работы па ахове працы сярод арганізацый (устаноў) невытворчай сферы дзейнасці. Больш за тое, першасная прафсаюзная арганізацыя цэнтра заняла 2-е месца ў раённым аглядзе-конкурсе на найлепшую першасную прафсаюзную арганізацыю. 

Лізавета ГОЛАД

Фота аўтара