У пачатку тыдня Старшыня Савета Рэспублікі Наталля Качанава разам з членамі сакратарыята верхняй палаты парламента наведала Полацк з рабочым візітам. На парадку дня стаяла пытанне выхаду на фінішную прамую ў падрыхтоўцы аб'ектаў да правядзення Форуму рэгіёнаў Беларусі і Расіі.
ХІ Форум рэгіёнаў пройдзе ў канцы чэрвеня ўпершыню ў трох гарадах: Полацку, Наваполацку і Віцебску. Арганізатары маштабнага мерапрыемства — Савет Рэспублікі Нацыянальнага сходу Беларусі і Савет Федэрацыі Федэральнага сходу Расіі — ставяць перад сабой мэту не толькі ўзмацнення міжрэгіянальных сувязяў, але і знаёмства з гарадамі паўночнага рэгіёна, іх багатай гісторыяй і славутасцямі.
Старшыня верхняй палаты парламента адзначыла, што работнікі сакратарыята, якія ўзялі ўдзел у рабочай нарадзе, будуць замацаваныя за аб'ектамі, што стануць пляцоўкамі для правядзення секцый. Адказныя будуць глядзець, як вырашаюцца пытанні на месцах, узаемадзейнічаць з раённай і абласной уладамі. «Мы выйшлі на фінішную прамую, калі ўсё павінна быць адточана».
Наталля Іванаўна падкрэсліла, што трэба выкарыстоўваць кожны пагодны дзень і сонечную хвіліну, каб паспець прывесці інфраструктуру гарадоў у нармальны стан. Яна нагадала, што ў канцы сакавіка ў паўночны рэгіён прыбудзе перадавая дэлегацыя Савета Федэрацыі, каб ацаніць падрыхтаваныя аб'екты. Нягледзячы на тое што значная работа ўжо праведзена, застаюцца прабелы, якія ў зімовых умовах выправіць было немагчыма. «У Полацку трэба паправіць тратуарную плітку, звярнуць асаблівую ўвагу не толькі на добраўпарадкаванне саміх аб'ектаў для работы секцый і харчавання, але і прылеглую да іх тэрыторыю.
З гэтага ў гасцей і будзе складацца агульнае ўражанне», — звярнула ўвагу Наталля Качанава.
Пытанне эстэтызацыі гарадскога асяроддзя таксама было пастаўлена на кантроль. Па словах Старшыні Савета Рэспублікі, значная работа ў гэтым кірунку будзе праведзена да 80-годдзя вызвалення Беларусі ад нямецка-фашысцкіх захопнікаў, Усебеларускага народнага сходу, але і звыш таго па меры магчымасцяў трэба ўстанавіць дадатковыя бігборды і светладыёдныя экраны з сімволікай Форуму рэгіёнаў.
Старшыня Полацкага райвыканкама Ігар Марковіч расказаў прысутным, на якім этапе падрыхтоўкі горад і раён знаходзяцца цяпер. Так, усе аб'екты ахоплены рамонтам, распрацаваны комплексны план работ па добраўпарадкаванні ўездаў на тэрыторыю Полаччыны. Заканчваецца конкурс на афармленне фасадаў сацыяльна значных будынкаў (іх у плане каля 70), адказныя арганізацыі цяпер займаюцца ўкладкай пліткі на гарадской плошчы і рамонтам асфальту на дваровых тэрыторыях. Заканчваецца конкурс на выбар падрадчыка дзеля добраўпарадкавання тэрыторыі Сафійскага сабору. Адно з пытанняў, якое вырашыць у кароткія тэрміны не атрымліваецца, — рэстаўрацыя помніка Францыску Скарыне.
«Уезды ў Полацкі раён павінны быць зроблены на найвышэйшым узроўні, гэта правільна. Траса ад Віцебска да Полацка таксама павінна быць здадзена да мерапрыемства. Як мясцовая, я на свае вочы бачу, дзе трэба нешта выправіць: на праспекце Скарыны рамонту патрабуе агароджванне. Я прашу кіраўніцтва Полацка і Наваполацка зараз зрабіць усё магчымае. Аблезлых фасадаў быць не павінна, усё толькі на самым высокім узроўні», — падкрэсліла Наталля Іванаўна.
У Полацку будзе арганізавана работа пяці секцый, у суседнім Наваполацку — дзвюх і маладзёжнага форуму. Старшыня Віцебскага абласнога Савета дэпутатаў Дзмітрый Дзямідаў, які дагэтуль узначальваў Наваполацкі гарвыканкам, расказаў, што на форум моладзі плануюць запрасіць прадстаўнікоў васьмі гарадоў-пабрацімаў. Наталля Качанава ўнесла прапанову пашырыць геаграфію ўдзельнікаў і запрасіць у Наваполацк прадстаўнікоў іншых гарадоў — пабрацімаў Віцебскай вобласці.
Асаблівую ўвагу спікер надала падрыхтоўцы аб'ектаў абласнога ўзроўню: Сафійскага сабору і Музея беларускага кнігадрукавання. «Таксама важна вырабіць якасную сувенірную прадукцыю, каб яна выглядала цікава і яе хацелася набыць», — заўважыла яна.
Па словах Старшыні Савета Рэспублікі, рэклама ў горадзе таксама павінна быць актуальнай, своечасовай і размешчанай лагічна: «Полацк — калыска нашай дзяржаўнасці — на кожным кроку дыхае гісторыяй. Гэта наша турыстычная Мекка, таму яго слаўная гісторыя павінна прасочвацца паўсюдна: у афармленні фасадаў, назвах кіёскаў і аб'ектаў гандлю і харчавання».
У рамках рабочага візіту Наталля Качанава наведала Полацкі дзяржаўны ўніверсітэт імя Ефрасінні Полацкай, у якім запланавана правядзенне трох секцый. Старшыні верхняй палаты парламента прадставілі абноўлены інтэр'ер у будынку былога езуіцкага калегіума, аўдыторыі, студэнцкую сталовую і канферэнц-залу. Рэктар ПДУ Юрый Раманоўскі расказаў, што да Форуму рэгіёнаў студэнты прадэманструюць новыя распрацоўкі ў ІТ-сферы і вобласці дадатковай рэальнасці. З улікам таго што ў бягучым годзе Беларусь адзначае 80-годдзе вызвалення, адпаведныя інтэрактыўныя пляцоўкі ва ўніверсітэце будуць падрыхтаваны таксама. Рэктар падкрэсліў, што вучоныя ПДУ прадэманструюць распрацоўкі ў галіне малатанажнай хіміі на аснове сыравінных рэсурсаў, якія выпускае ААТ «Нафтан» у рамках работы секцыі па прамысловасці на нафтаперапрацоўчым заводзе.
Супрацоўнікі сакратарыята Савета Рэспублікі ў гэты дзень таксама наведалі аб'екты, за якімі яны замацаваныя. У далейшым будзе абмеркаваны шэраг пытанняў, звязаных з лагістыкай і размяшчэннем удзельнікаў Форуму.
Аляксандра ГВОЗДЕВА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
