Згодна са звесткамі статыстыкі, на пачатак года ў рэгіёне налічваецца 790 незавершаных будынкаў. Пакуль работа па скарачэнні іх колькасці вядзецца нізкімі тэмпамі, адзначыла начальнік упраўлення кантролю галін гаспадаркі і грашова-крэдытнай сферы Камітэта дзяржкантролю Гродзенскай вобласці Наталля Жур. Так, за мінулы год удалося выканаць толькі 56% ад вызначанага плана. Уведзена ў абарот 122 будынкі замест 217.
Да 2020 года неабходна рэалізаваць каля 600 мерапрыемстваў па даўгабудах — альбо дабудаваць, альбо перапрафіляваць і прадаць, альбо знесці. Найбольшая колькасць незавершаных аб'ектаў знаходзіцца ў Ваўкавыскім, Слонімскім, Смаргонскім раёнах, а таксама ў Гродне. Рэкардсменам па даўгабудзе можна назваць будынак аэравакзала Гродзенскага аэрапорта, які прастойвае яшчэ з 80-х гадоў мінулага стагоддзя. Каля 20% незавершаных будынкаў стаяць не адно дзесяцігоддзе. Ужо сёлета выяўлена 34 новыя аб'екты, якія трапілі ў спіс звышнарматыўнага незавершанага будаўніцтва. Такая сітуацыя абумоўлена як недахопам сродкаў, так і пачаткам будаўніцтва без наяўнасці поўнага фінансавання, падкрэсліла Наталля Жур.
У ліку даўгабудаў абласнога цэнтра такія значныя аб'екты, як інтэрнат для студэнтаў-медыкаў на 1030 месцаў, паліклініка на 650 наведванняў, рэканструкцыя абласной філармоніі, пашырэнне станцыі абезжалезвання вады. Некаторыя аб'екты амаль поўнасцю завершаны, неабходна толькі належным чынам аформіць іх акты ўводу ў эксплуатацыю, канстатуюць спецыялісты дзяржкантролю. Замест гэтага заказчыкі нясуць дадатковыя расходы па ўплаце падаткаў на нерухомасць і зямлю, прычым па завышаных стаўках.
— У 2017 годзе плануецца скараціць звышнарматыўнае незавершанае будаўніцтва на 120 аб'ектаў. За першы квартал рэалізавана 36% плана, — паведаміў старшыня камітэта па архітэктуры і будаўніцтве Гродзенскага аблвыканкама Міхаіл Петух. — Будаўніцтва такіх важных для горада аб'ектаў, як студэнцкі інтэрнат і філармонія, было прадугледжана рэспубліканскай і абласной інвестпраграмамі, але выдаткаваных сродкаў не хапіла. Першы пускавы комплекс абласной філармоніі завершаны, але значных сродкаў патрабуе аздабленне памяшканняў, закупка абсталявання. Магчыма, завяршэнне філармоніі будзе закладзена ў бюджэт наступнага года. А вось доўгачаканую паліклініку ў мікрараёне Вішнявец мы плануем здаць у канцы гэтага года.
У вобласці больш за 160 аб'ектаў, якія пераходзяць у разрад даўгабудаў, праінфармаваў Міхаіл Петух. У асноўным гэта будынкі сельгаспрадпрыемстваў і сферы ЖКГ. «Лічу, што сёння немэтазгодна ўкладваць сродкі ў тыя аб'екты, якія наўрад ці запрацуюць. Калі, напрыклад, у райцэнтры ці аграгарадку дзесяць гадоў будуецца клуб, дык ён наўрад ці будзе запатрабаваны, — мяркуе чыноўнік. — Каб пазбегнуць у далейшым даўгабудаў, суб'ектам гаспадарання забаронена пачынаць будаўніцтва новых аб'ектаў, калі не будзе поўнага аб'ёму іх фінансавання».
Маргарыта УШКЕВІЧ
У тэму:
Самы вялікі будаўнічы патэнцыял рэгіёна асвойваецца ў Астраўцы. На развіццё інфраструктуры з рэспубліканскага бюджэту сёлета выдзелена 130 млн рублёў. Ужо ўведзены ў строй дзіцячы сад-яслі на 190 месцаў і жылы шматпавярховік на 84 кватэры. На чарзе — праектныя і будаўнічыя работы па забудове вуліц, аб'ектаў ваеннага гарадка па ахове АЭС, комплексу пагранічнай заставы ў Астравецкім раёне.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
