У мінскім Палацы мастацтва праходзіць выстаўка пад назвай «Залессе».
Яна ў сваім родзе незвычайная, бо на адной пляцоўцы спалучаюцца розныя віды і жанры выяўленчага мастацтва — ад жывапісу і графікі да фатаграфіі і этнаграфіі. Этнаграфія прадстаўлена народнымі музычнымі інструментамі — сурмой, дудой, лірай, цымбаламі і скрыпкай, што зроблены рукамі жыхара Валожыншчыны, мастака і музыкі Алеся ЛАСЯ (на фота). У экспазіцыі два аўтары: акрамя самога Алеся прадстаўлены творы светлай памяці мастачкі Яўгеніі Ліс. Назва «Залессе» паходзіць ад славутай вёскі Смаргонскага раёна, у якой на пачатку васьмідзясятых гадоў мінулага стагоддзя маладыя мінскія мастакі, пакінуўшы горад, пачыналі сямейнае і творчае жыццё. Алесь і Яўгенія першыя ў Беларусі адрадзілі батлеечную традыцыю, сталі шукаць аўтэнтычных музыкаў, фатаграфаваць іх, пераймаць аўтэнтычную ігру, рабіць музычныя інструменты. Калекцыя ўнікальных фатаграфій зрабіла экспазіцыю больш атмасфернай і жывой.
— Гэтая выстаўка ў першую чаргу прысвечана Яўгеніі Ліс, яе таленту і творчай спадчыне, — кажа арганізатар і аўтар Алесь Лось.
На адкрыцці майстар і мастак разам з іншымі музыкамі выконваў народныя танцавальныя мелодыі.
Анатоль КЛЯШЧУК
Фота аўтара
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
