Вялікая Айчынная вайна прынесла страты амаль у кожную сям'ю. Не выключэнне і сям'я Якуба Коласа. Адзін з трох яго сыноў, Юрый, які на той час служыў у войску, дадому не вярнуўся. Пісьменнік спадзяваўся да апошняга. Нават у 1945 годзе ён працягваў чакаць свайго Юрку, спадзяваўся, што хлопец мог трапіць у палон. Калі надзеі зніклі, у памяць пра сына класік пасадзіў побач з сядзібай дуб.
У Дзяржаўным літаратурна-мемарыяльным музеі Якуба Коласа ў хуткім часе плануюць правесці выстаўку, прысвечаную менавіта сярэдняму сыну пісьменніка.
Ужо на трэці дзень вайны згарэў дом Коласа, у які сям'я засялілася ў 1927 годзе. Дзякуючы сучасным тэхналогіям удалося стварыць трохмерную мадэль як самога будынка, так і сумежных вуліц. Пасля 3 ліпеня відэастужку можна будзе паглядзець у музеі.
Як заўважыла праўнучка Коласа, галоўная захавальніца фондаў літаратурна-мемарыяльнага музея Васіліна Міцкевіч, на жаль, тады нічога не ўдалося выратаваць. Захаваліся толькі сейф з чарачкамі — падарункам Янкі Купалы Якубу Коласу на сярэбранае вяселле, абгарэлы гадзіннік, які належаў жонцы пісьменніка (цяпер ён захоўваецца ў сям'і), і кубачак, што знайшлі на папялішчы. Згарэлі ў тым ліку рукапісы і творы, якія яшчэ не былі апублікаваныя. Дом быў вельмі прыгожы, з густам аформлены, з распіснымі столямі. З аздабленнем будынка сужэнцам дапамагаў брат Марыі Дзмітрыеўны Аляксандр. Захаваліся архіўныя матэрыялы, дзе сябры і знаёмыя згадваюць, як выглядалі пакоі пісьменніка. І хочацца верыць, што новыя тэхналогіі, няхай і віртуальна, дапамогуць наведвальнікам трапіць у будынак, дзе класік правёў найлепшыя гады свайго жыцця.
У планах установы таксама аднаўленне даваеннага кабінета пісьменніка.
Алена ДЗЯДЗЮЛЯ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
