Міжнародны конкурс дзіцячых фатаграфій «У абдымках прыроды» пяты год запар ладзіцца для падлеткаў з гарадоў-спадарожнікаў АЭС Расіі, Венгрыі і цяпер — Беларусі

Міжнародны конкурс дзіцячых фатаграфій пад назвай «У абдымках прыроды» пяты год запар ладзіцца для падлеткаў з гарадоў-спадарожнікаў АЭС Расіі, Венгрыі і цяпер — Беларусі. Сёлета да яго далучыліся і юныя фатографы з Абхазіі, а найлепшыя фотамастакі паўдзельнічалі таксама ў экалагічным дзіцячым форуме, які ў гэтым годзе прайшоў у Беларусі. Выстаўка работ і ўзнагароджанне пераможцаў прайшло ў Інфармцыйным цэнтры па атамнай энергіі ў Мінску.

— Дарослыя, якія стамляюцца ад штодзённай працы і клопатаў, не могуць бачыць таго, што даступнае дзіцячым вачам. Работы вельмі цікавыя, у іх адлюстравана цудоўная прырода, і яны наглядна ілюструюць, што атамная энергетыка — гэта не толькі надзейная крыніца электраэнергіі, але і залог стабільнай будучыні і захавання прыроднай разнастайнасці, — заўважыла, вітаючы ўдзельнікаў конкурсу, Лілія ДУЛІНЕЦ, намеснік дырэктара Дэпартамента па ядзернй энергетыцы Міністэрства энергетыкі.

Работы падлеткаў з кожным годам становяцца ўсё больш сур'ёзнымі, адзначаюць як прафесійныя фатографы, так і ганаровыя госці выстаўкі, якую да канца года, дарэчы, змогуць убачыць таксама ў Расіі, Венгрыі і Абхазіі.

— Я ўражаны ўзроўнем і якасцю работ, хоць і не спецыяліст у гэтай галіне, — прызнаўся Віктар СВІЛА, намеснік старшыні Пастаяннай камісіі па дзяржаўным будаўніцтве, мясцовым самакіраванні і рэгламенце Палаты прадстаўнікоў Нацыянальнага сходу. — Канкурсантам удалося данесці да гледача думку, што атамная энергетыка — гэта бяспечна, і за ёю будучыня. Спадзяюся, што ў наступныя гады ў вашых здымках з'явяцца і пазнавальныя мясціны нашай Астравеччыны.

Сёлета ў конкурсе змагалася каля тысячы юных фотамастакоў, і толькі 37 з іх (найбольш адметныя) паўдзельнічалі яшчэ і ў экалагічным дзіцячым форуме. Падчас майстар-класаў пад кіраўніцтвам прафесійных фатографаў з розных краін падлеткі пазнаёміліся з беларускай сталіцай, Брэсцкай крэпасцю, Белавежскай пушчай, Хатынню, Дудуткамі, Мірскім замкам.

— Некаторыя члены журы прызналіся, што проста зайздросцілі такім здымкам. Галоўнае, што гэта было не проста навучанне, як на курсах, а пагружэнне ў розныя мясціны і прыроду, дзе падлеткі спрабавалі сябе ў розных жанрах фатаграфіі, — выказаўся Расціслаў МАШЫН, член праўлення Саюза фатографаў дзікай прыроды, пад кіраўніцтвам якога канкурсанты ўдасканальвалі майстэрства фотаздымкаў.

Узнагароды пераможцы атрымалі ў намінацыях «Пейзаж», «Рэпартаж», «Партрэт», «Макра», «Жывая прырода». Дзіцячыя фатаграфіі сапраўды ўражвалі сваім выкананнем і работай з колерам, святлом і кампазіцыяй, а члены журы адзначылі іх непасрэднасць і натуральнасць. «Апошнім часам фатаграфія ідзе па шляху «фоташопу» ў яго штучнай форме: цені, святло, графіка — усё павінна стаяць на сваім месцы. Аднак у такіх здымках няма самога фатографа, а ёсць толькі сучасныя трэнды і крытэрыі, якія нам дыктуе час. Знікае магія фотаздымкаў. Але ў вашых работах яна ёсць», — выказаліся яны.

А яшчэ дзякуючы гэтаму конкурсу падлеткі змаглі выйсці з «каменных джунгляў» населеных пунктаў і акунуцца ў наш «натуральны дом», з якога выйшла чалавецтва, — заўважылі арганізатары.

Ірына СІДАРОК, фота аўтара