У штотыднёвым спартыўным аглядзе «Звязды» расказваем пра тое, як праходзіць падрыхтоўка хакейнай і валейбольнай зборных краіны да важных міжнародных турніраў, і падводзім вынікі чарговага тура чэмпіянату краіны па футболе.
1. Зборная Беларусі па хакеі выйграла таварыскі турнір «Кубак трох нацый». Нашы хакеісты спачатку абыгралі французаў 5:2, а потым сталі мацнейшымі за немцаў 3:2.
— Рады, што ў нашай камандзе ёсць «хімія», узаемадзеянне паміж гульцамі, — адзначыў пасля турніру галоўны трэнер зборнай Дэйв Льюіс. — Гэта праяўляецца і на пляцоўцы, і ў раздзявальні, гульцы адчуваюць добры настрой. Мы стараемся ў гэты кароткі прамежак часу, які застаўся да матчаў алімпійскай кваліфікацыі, змясціць як мага больш пазітыўных момантаў. Чакаем канчатковага выздараўлення асноўных гульцоў, тады ўжо будзем прымаць рашэнне, хто дзе згуляе. У нас траўмаваны не толькі Плат, але яшчэ і Кавыршын.
Нагадаем, «Кубак трох нацый» з'яўляецца кантрольным турнірам для дружыны Дэйва Льюіса ў плане падрыхтоўкі да алімпійскай кваліфікацыі, якая пройдзе ў Мінску з 1 па 4 верасня. Сапернікамі беларусаў будуць зборныя: 1 верасня — Даніі (19.00), 2 верасня — Польшчы (19.00) і 4 верасня нашы хакеісты завершаць турнір матчам са Славеніяй (17.00). Лепшая каманда з квартэта D у лютым 2018-га выступіць на Алімпіядзе ў карэйскім Пхёнчхане.
2. Завяршыліся ўсе матчы 20-га тура чэмпіянату краіны па футболе. «Крумкачы» на сваім полі пацярпелі паражэнне ад «Тарпеда-БелАЗ» — 0:2. У Брэсце мясцовае «Дынама» і «Іслач» згулялі ўнічыю — 1:1. «Гарадзея» дома перайграла «Граніт» — 2:0, а «Віцебск» і «Славія» падзялілі ачкі — 1:1. «Нёман» у гасцях з мінімальным лікам адолеў «Мінск» — 1:0. «Нафтан» і «Шахцёр» не змаглі выявіць пераможцу — 1:1, з такім жа лікам завяршыўся матч з удзелам «Слуцка» і мінскага «Дынама». БАТЭ на сваім полі перайграў «Белшыну» — 2:1, але пры гэтым устанавіў антырэкорд па наведвальнасці сезона-2016, матч на «Барысаў-Арэне» наведалі 3590 гледачоў.
3. Мужчынская зборная Беларусі па валейболе пацярпела два паражэнні на міжнародным турніры ў Санкт-Пецярбургу «Мемарыял Вячаслава Платонава». Падапечныя Аляксандра Сінгаеўскага саступілі валейбалістам маскоўскага «Дынама» і «Дынама» з Ленінградскай вобласці з аднолькавым лікам — 2:3.
Нагадаем, у першым туры ў Санкт-Пецярбургу нацыянальная зборная Беларусі атрымала валявую перамогу над белгарадскім «Белагор'ем» — 3:2.
Адзначым, што міжнародны турнір «Мемарыял Вячаслава Платонава» з'яўляецца важным этапам падрыхтоўкі мужчынскай нацыянальнай зборнай да адборачных матчаў чэмпіянату Еўропы. З 15 па 17 верасня ў першым туры ў Турцыі наша каманда згуляе з сапернікамі з Нідэрландаў, Аўстрыі і Турцыі. Другі тур пройдзе 23-25 верасня ў Нідэрландах. Пераможца групы D выйдзе ў фінальную частку чэмпіянату Еўропы, а каманда, якая заняла другое месца, згуляе ў 3-м раўндзе кваліфікацыі.
Дар'я Лабажэвіч
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
