Раіса Сцяпанаўна Васільева, пенсіянерка, г. Гомель:
Калі гэта пачалося, — зараз не ўспомню. Такое ўражанне, што «Звязду» я чытала заўсёды. Яна была маёй спадарожніцай, маёй настаўніцай. Так, настаўніцай, бо беларускую мову я вучыла напрыканцы 40-х, а потым дапамагалі кнігі, радыё і мая «Звязда».
Дзякуючы ёй я заўсёды ведала, што адбываецца ў краіне і свеце, набывала такі патрэбны ўсім жыццёвы досвед: як лячыць, як вучыць (па прафесіі я настаўніца матэматыкі), як пасадзіць і пасеяць, што прыгатаваць...
Я заўсёды захаплялася музыкай і жывапісам, лічыла і лічу, што нельга не ведаць гісторыю сваёй краіны. Таму заўсёды чакала (і чакаю) субот са звяздоўскай «Жырандоляй» і аўторкаў з «Ігуменскім трактам». У вольны час я сама рабіла (і раблю) карціны з саломкі (адбыліся ўжо тры выставы), таму заўсёды ўзіралася ў шыкоўныя здымкі Анатоля Клешчука. Мне вельмі хацелася болей даведацца пра жыццё людзей, якія дасягнулі нейкіх жыццёвых поспехаў, бліжэй пазнаёміцца з «зоркамі». Таму я ўдзячна «Звяздзе» за цікавыя сустрэчы і гутаркі.
Па радыё выпадкова пачула новую песню «Белая, белая яблыня». Спадабалася — цэлы дзень напявала яе на лецішчы. А вечарам разгарнула свежы нумар «Звязды» — а там... словы! Хіба ж гэта не цуд? Я ўжо не кажу пра «Алё, народ на провадзе!» і конкурс «Хто каго?». Тут сустрэнеш часам такое — колькі чытаеш, столькі смяешся!
А «Фотаслова» Яўгена Пясецкага! А...
Карацей, расказваць пра вартасці «Звязды» я магу бясконца. За той час, што яна ў нашай хаце, па-беларуску навучыўся чытаць мой муж (ён родам з Чарнігаўшчыны) і мае ўнукі-расіяне. Вельмі многае яны разумеюць самі, астатняе пытаюцца ў мяне, але галоўнае, што ім хочацца чытаць тое, што напісана... Ім таксама цікава!
Таму падчас падпіскі ў мяне сумненняў няма: «...Як кахаць, дык каралеву! Як выпісваць, то «Звязду»!
Запісала Валянціна Доўнар.
P.S. Вы таксама выбралі для сябе «родную газету на роднай мове»? І хацелі б расказаць, чаму? Тады пішыце, дасылайце свой фотаздымак. Самыя цікавыя лісты будуць надрукаваны.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?