На «гарачую лінію» нашай газеты звярнуўся заяўнік з вёскі Смаляры Барысаўскага раёна, які паскардзіўся на работу аўтакрамы, што належыць раённаму спажывецкаму таварыству.
Паводле яго слоў, раней яна заходзіла ў вёску дакладна па раскладзе — у сераду і суботу. Але прыкладна з вясны гэты графік не вытрымліваецца. Як сказаў пажылы чалавек, «калі прыедзе, а калі і не». Вяскоўцы звярталіся з гэтым пытаннем і ў сельскі Савет, і ў райвыканкам, але праблема так і не вырашылася. Заяўнік гаварыў, што калі раней з аўтакрамай іх абслугоўваў іншы работнік, такіх праблем ніколі не ўзнікала.
З просьбай пракаментаваць сітуацыю, што склалася, рэдакцыя звярнулася ў Барысаўскае раённае спажывецкае таварыства. Даволі аператыўна мы атрымалі афіцыйны адказ за подпісам першага намесніка старшыні праўлення Наталлі Крываручанкі.
«Згодна з графікам руху аўтакрамы, якая абслугоўвае вёску Смаляры Іканскага сельвыканкама з колькасцю насельніцтва 9 чалавек, дзе, акрамя гэтага населенага пункта, уключана яшчэ 11 вёсак, гандлёвае абслугоўванне ажыццяўлялася па серадах і суботах. У сувязі са звальненнем прадаўца і расфарміраваннем маршруту ў гэтым кірунку адбылося пераразмеркаванне населеных пунктаў паміж іншымі аўтакрамамі, з-за чаго графік руху аўтакрамы змяніўся на сераду і нядзелю. З 15 верасня былі перагледжаны графікі на асенне-зімовы перыяд. Абслугоўванне гэтага населенага пункта будзе ажыццяўляцца па аўторках і пятніцах. Работа аўтакрамы ўзятая гандлёвай службай пад узмоцнены кантроль, адсочваецца якасць тавару, што рэалізуецца, і наяўнасць яго ў шырокім асартыменце».
Сяргей РАСОЛЬКА.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.