Кныш — далёкі сваяк рускай ватрушкі і аўстрыйскага штрудзеля. Так называўся колісь невялікі круглы піражок з запечаным усярэдзіне (або выкладзеным на паверхні, паміж прыўзнятымі краямі) тварагом. Або варэннем, або пасераванай цыбуляй. Кнышы з цыбуляй і грэцкай кашай у ХІХ стагоддзі падаваліся ў сярэднезаможных дамах як дадатак да мясных страў.
На пачатку мінулага стагоддзя слова «кнышы» спрабаваў зберагчы Вацлаў Ластоўскі, абараняючы яго ў сваім слоўніку ад экспансіі ватрушкі. Паводле яго, «кнышы пякуцца з тварагом, макам, каноплямі і канфітурамі». Ён жа прыводзіць і загадку, няўцямную сёння і дзецям, і дарослым: «Поўна печ перапеч, а пасярэдзіне кныш» (зоркі і месяц).
Страва гэтая чыста русінская (магчыма, трохі болей украінская, чым беларуская), не польская. Даўней палякі казалі: «Русь пячэ кнышы памерлым». Бытапісец пачатку ХІХ стагоддзя Лукаш Галэмбёўскі нават залічваў кнышы, разам з пірагамі і журам, да трох самых тыповых «рускіх» страў. Існаваў звычай, паводле якога сваякі памерлага частавалі кнышамі тых, хто на хаўтурах не спаў пры целе нябожчыка. А вось зусім іншая, пікантная дэталь: яшчэ зусім нядаўна на захадзе Украіны дзяўчаты, якія пяклі кнышы, каб забяспечыць сабе прыхільнасць каханага, мусілі загортваць іх... унутранай паверхняй сцягна! На што не пойдзеш дзеля сапраўднага кахання.
Кнышы можна рабіць не толькі з мучнога, але і з бульбянога цеста. Можна не толькі выпякаць, але і смажыць у фрыцюры. Але паколькі ў сучаснай Беларусі засталося мала слядоў як слова, так і стравы, то цяпер толькі дзякуючы пaлякам і ўкраінцам і захоўваецца нейкая памяць пра кнышы. А яшчэ дзякуючы яўрэям, бо бадай, самымі вядомымі ў свеце з'яўляюцца менавіта эмігранцкія Knіshes.
У Нью-Ёрку па адрасе 137 East Houston Street у Манхэтэне з 1910 года знаходзіцца самая старая дзеючая кныш-пякарня ў свеце. Сам бізнес заснаваны яшчэ раней, каля 1890 года, Ёнам Шымелем, імігрантам з Румыніі (магчыма, з населенай украінцамі Букавіны). Усё пачыналася з гандлю кнышамі ўразнос з тачкі на колах, але паступова кнышы зрабіліся адным з самых знакавых відаў фаст-фуда не толькі ў Нью-Ёрку, але і ў іншых амерыканскіх гарадах. Кажуць, за апошнія 50 гадоў ніводны значны нью-ёркскі палітык не мог усур'ёз разлічваць на абранне, калі не сфатаграфаваўся з кнышом на фоне славутай пякарні.
У апошнія гады цікавасць да кнышоў у беларускім сегменце інтэрнэту досыць адчувальна вырасла. Таму ўсё ж будзем стрымана спадзявацца, што пакаштуем яшчэ сваіх кнышоў, і не толькі жалобных. Для пачатку можна было б перайменаваць у кнышы наяўныя ў нас ватрушкі. І нават штрудзелі ды берлінеры.
Кнышы беларускія з бульбай
Складнікі. Для цеста: 2 шклянкі мукі, крышачку соды, 1/2 лыжачкі солі, 1 яйка, 1/3 шклянкі алею,1/2 шклянкі вады, 1 лыжачка воцату.
Для начынкі: 3 бульбіны сярэдняй велічыні, 1 вялікая цыбуля-рэпка, пучок зялёнай цыбулі, соль, перац на смак, 2 лыжкі алею, жаўток для змазвання.
Спосаб прыгатавання: Муку прасеяць у місу з содай і соллю. Асобна разбоўтаць яйка, дадаць ваду, воцат і алей, перамяшаць. Выліць сумесь у муку, вымяшаць гладкае цеста, загарнуць у плёнку і пакласці ў лядоўню на 30 хвілін. Бульбу зварыць у падсоленай вадзе, абабраць, патаўчы. Падсмажыць пакрышаную рэпчатую цыбулю, дробна пакрышыць зялёную — перамяшаць усё з тоўчанай бульбай.
Цеста падзяліць напалам, кожную частку раскачаць у простакутнік памерам каля
30x40 см. Уздоўж доўгага боку выкласці начынку, астатнюю паверхню тонка змазаць алеем. Звіць у рулон, падзяліць рукой напалам, не надрываючы, прыціскаючы цеста, потым яшчэ і яшчэ раз напалам. Кожны кавалак адкруціць, пакуль не парвецца, сфармаваць у «бочачку», прыціснуць. Выкласці кнышы на бляху, памазаць разбоўтаным жаўтком, паставіць у разагрэтую духоўку, запякаць каля 30-40 хвілін пры 180 °C. Гарачыя кнышы скласці ў місу, накрыць хустачкай і пакінуць на 15 хвілін.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.